‘സംഗീത’ സഹോദരിമാര്ക്ക് ജര്മ്മനിയിലേക്ക് ക്ഷണം
തിരുവനന്തപുരം: മലയാളികളും യുവ സംഗീത പ്രതിഭകളുമായ സഹോദരിമാര്ക്ക് ജര്മ്മനിയിലെ ‘ദി പ്ലേഫോര്ഡ്സ്’ മ്യൂസിക്കല് ബാന്ഡ് സംഘടിപ്പിക്കുന്ന പ്രശസ്തമായ പ്ലേഗ്രൗണ്ട് മ്യൂസിക് ഫെസ്റ്റിവലില് പങ്കെടുക്കാന് അപൂര്വ അവസരം.
കുലശേഖരം സ്വദേശികളായ അരുണിത മോഹനും ആന്യ മോഹനുമാണ് നവംബര് 7 മുതല് 9 വരെ നടക്കുന്ന പരിപാടിയിലേക്കുള്ള ക്ഷണം ലഭിച്ചത്. ജര്മ്മന് സാംസ്കാരിക കേന്ദ്രമായ ഗൊയ്ഥെ സെന്ട്രമാണ് ഇതിലേക്ക് വഴിതുറന്നത്.ലോകത്തിലെ ഏറ്റവും കൂടുതല് ആളുകള് കേള്വിക്കാരായുള്ള ആദ്യകാല യൂറോപ്യന് സംഗീതമേളകളില് ഒന്നാണ് പ്ലേഗ്രൗണ്ട് മ്യൂസിക് ഫെസ്റ്റിവല്.
സ്വാതി തിരുനാള് ഗവണ്മെന്റ് സംഗീത കോളേജില് പഠിച്ച അരുണിത പ്രൊഫഷണല് വീണാ വാദകയാണ്. ഇന്ത്യന് ക്ലാസിക്കല്, പാശ്ചാത്യ സംഗീതം എന്നിവ വയലിനില് വായിക്കുന്നതില് മികവ് പുലര്ത്തുന്ന ആന്യ പ്രൊഫഷണല് വയലിനിസ്റ്റ്, പിയാനിസ്റ്റ്, സംഗീതസംവിധായക തുടങ്ങിയ നിലകളില് ശ്രദ്ധേയ.
ജര്മ്മന് സാഹിത്യ ഇതിഹാസം ജോഹാന് വുള്ഫ് ഗാങ് വോണ് ഗൊയ്ഥെയുടെ ജന്മനാടായ വെയ്മറില് നിന്നുള്ള ബാന്ഡായ ‘ദി പ്ലേഫോര്ഡ്സി ‘ നൊപ്പമാണ് സഹോദരിമാര് സംഗീതപരിപാടി അവതരിപ്പിക്കുക. ‘അപ്പോണ് എ ഗ്രൗണ്ട് ‘ എന്ന തീമിനെ അടിസ്ഥാനമാക്കിയാണ് പരിപാടി.
യുവ സംഗീതജ്ഞര്ക്ക് ആദ്യകാല യൂറോപ്യന് സംഗീതത്തിലേക്ക് ആഴ്ന്നിറങ്ങാനുള്ള മികച്ച അവസരമാണ് ഫെസ്റ്റിവലിലേക്കുള്ള ക്ഷണത്തിലൂടെ ലഭിക്കുന്നതെന്ന് ഫെഡറല് റിപ്പബ്ലിക് ഓഫ് ജര്മ്മനിയിലെ ഓണററി കോണ്സല് ഡോ. സയ്യിദ് ഇബ്രാഹിം പറഞ്ഞു. കലാകാരികളുടെ യാത്രാച്ചെലവ്, താമസം എന്നിവയുള്പ്പെടെയുള്ള മുഴുവന് ചെലവുകളും ദി പ്ലേഫോര്ഡ്സും പ്ലേഗ്രൗണ്ടും വഹിക്കും.
