തിരുമുല്ലവാരം ബീച്ചും തങ്കശ്ശേരി ഫോര്‍ട്ട് പാര്‍ക്കും നവീകരിക്കുന്നതിന് 5 കോടി
കൊല്ലം: തിരുമുല്ലവാരം ബീച്ചിലെ അടിസ്ഥാന സൗകര്യ വികസനത്തിനും തങ്കശ്ശേരി ഫോര്‍ട്ട് പാര്‍ക്ക് നവീകരണത്തിനുമായി അഞ്ച് കോടി രൂപയുടെ ഭരണാനുമതി. തങ്കശ്ശേരി-തിരുമുല്ലവാരം കോസ്റ്റല്‍ ടൂറിസം സര്‍ക്യൂട്ടിന്‍റെ ഭാഗമായാണ് പദ്ധതി നടപ്പാക്കുന്നത്.
നവകേരള സദസ്സില്‍ പരിഗണിച്ച വികസന പദ്ധതികളുടെ അടിസ്ഥാനത്തിലാണ് തുക അനുവദിച്ചത്. നിര്‍മ്മാണ പ്രവര്‍ത്തനങ്ങള്‍, ഇലക്ട്രോണിക്സ്, ഇലക്ട്രിക്കല്‍ ജോലികള്‍ എന്നിവയ്ക്കാണ് തുക വിനിയോഗിക്കുക.
തങ്കശ്ശേരി ഫോര്‍ട്ട് പാര്‍ക്ക്
കൊല്ലം നഗരത്തില്‍ സ്ഥിതിചെയ്യുന്ന അതീവ ചരിത്ര പ്രാധാന്യമുള്ള തങ്കശ്ശേരി ഫോര്‍ട്ടിലെ പാര്‍ക്കും തിരുമുല്ലവാരം ബീച്ചും നവീകരിക്കുന്നത് കൂടുതല്‍ വിനോദസഞ്ചാരികളെ കൊല്ലത്തേക്ക് ആകര്‍ഷിക്കുന്നതിന് സഹായകമാകുമെന്ന് ടൂറിസം വകുപ്പ് മന്ത്രി പി എ മുഹമ്മദ് റിയാസ് പറഞ്ഞു.
