മമ്മൂട്ടി നല്‍കിയിരിക്കുന്നത് 30 ദിവസം

കൊച്ചി:എറണാകുളത്ത് ചിത്രീകരണം പുരോഗമിക്കുന്ന അടൂർ ഗോപാലകൃഷ്ണന്‍റെ മമ്മൂട്ടി ചിത്രം ‘പദയാത്ര’യുടെ ചിത്രീകരണം 45 ദിവസം കൊണ്ട് പൂർത്തിയാകും. പദയാത്രയ്ക്ക് വേണ്ടി മമ്മൂട്ടി 30 ദിവസത്തെ ഡേറ്റാണ് നല്കിയിരിക്കുന്നത്.
‘പദയാത്ര’യ്ക്ക് ശേഷം റംസാൻ നൊയമ്പുകാലത്ത് അഭിനയ രംഗത്ത് നിന്ന് വിട്ടു നില്ക്കുന്ന മമ്മൂട്ടി തുടർന്ന് ‘അമര’ന് ശേഷം രാജ്കുമാർ പെരിയ സാമി സംവിധാനം ചെയ്യുന്ന ചിത്രത്തിൽ ധനുഷിനോടൊപ്പം അഭിനയിക്കും. തമിഴ് ചിത്രത്തിന് ശേഷം നീതീഷ് സഹദേവ് സംവിധാനം ചെയ്യുന്ന ചിത്രത്തിലാണ് മമ്മൂട്ടി നായകനാവുന്നത്.
മമ്മൂട്ടി കമ്പനി നിർമ്മിക്കുന്ന ‘പദയാത്ര ‘യിൽ ഗ്രേസ് ആന്‍റണിയാണ് നായിക. നേരത്തെ നയൻതാരയെയാണ് നായികയായി നിശ്ചയിച്ചിരുന്നത്. നയൻതാരയ്ക്ക് ഡേറ്റ് ക്ലാഷ് വന്നതിനാലാണ് ഗ്രേസ് ആന്‍റണിക്ക് നറുക്ക് വീണത്. ഇന്ദ്രൻസ്, പി.ശ്രീകുമാർ, അലിയാർ, ശ്രീഷ്മ ചന്ദ്രൻ എന്നിവരാണ് മറ്റ് അഭിനേതാക്കൾ. കാമറ – ഷഹ്നാദ് ജലാൽ,സംഗീതം – മുജീബ് മജീദ്, ആർട്ട് ഡയറക്ടർ – ഷാജി നടുവിൽ, സ്റ്റിൽസ് – നവീൻ മുരളി,പ്രൊഡക്ഷൻ കൺട്രോളർ – ബിനു മണമ്പൂര്, എക്സിക്യൂട്ടീവ് പ്രൊഡ്യൂസർ – ജോർജ്ജ് സെബാസ്റ്റ്യൻ, ലൈൻ പ്രൊഡ്യൂസർ – സുനിൽ സിംഗ്. വേ ഫെയറർ ഫിലിംസ് ‘പദയാത്ര ‘ പ്രദർശനശാലകളിലെത്തിക്കും.