ഇതിനകം റിലീസ് സെന്‍ററുകളിൽ നിന്ന് ഒരു കോടി രൂപയോളം ഗ്രോസ് കളക്ഷൻ

കൊച്ചി:നവാഗതനായ ജിത്തു സതീശൻ മംഗലത്ത് രചനയും സംവിധാനവും നിർവ്വഹിച്ച സംഭവം അദ്ധ്യായം ഒന്ന് സർപ്രൈസ് ഹിറ്റിലേക്ക് മുന്നേറുന്നു. ഇതിനകം റിലീസ് സെന്‍ററുകളിൽ നിന്ന് ചിത്രം ഒരു കോടി രൂപയോളം ഗ്രോസ് കളക്ഷൻ നേടിക്കഴിഞ്ഞു.
അസ്ക്കർ അലി, വിനീത് കുമാർ, സിദ്ധാർത്ഥ് ഭരതൻ, സെന്തിൽ കൃഷ്ണ തുടങ്ങിയവരാണ് പ്രധാന അഭിനേതാക്കൾ.കാടിന്‍റെ നിഗൂഢതകൾ പശ്ചാത്തലമാക്കി ഒരുക്കിയിരിക്കുന്ന ചിത്രമാണിത്.
ആനന്ദ് എന്ന സിവിൽ പൊലീസ് ഓഫീസർ പണിഷ്മെന്റ് ട്രാൻസ്ഫർ കിട്ടിശി ഒരു പുതിയ പൊലീസ് സ്റ്റേഷനിലേക്ക് ജോലിക്ക് പോകാനിരിക്കുകയാണ്. സ്റ്റേഷനിലേക്ക് പോകുന്ന വഴിയിൽ, ഒരു കാടിന്‍റെ സമീപത്ത് നടന്ന റോഡ് അപകടത്തിൽ അദ്ദേഹം ഇടപെടുന്നു. അതിലൂടെ തമിഴ്നാട് പോലീസിലെ ഒരു ഉദ്യോഗസ്ഥന്‍റെ ജീവൻ രക്ഷിക്കപ്പെടുന്നു.പിന്നീട്, ആ കാട്ടിനുള്ളിൽ കുടുങ്ങിയിരിക്കുന്ന മറ്റൊരു പോലീസുകാരനെ രക്ഷിക്കാനായി ആനന്ദും മറ്റ് പോലീസുകാരും കാടിനുള്ളിലേക്ക് പോകാൻ തീരുമാനിക്കുന്നു.തുടർന്നുള്ള സംഭവങ്ങളാണ് സംഭവം അദ്ധ്യായം ഒന്ന് പറയുന്നത്.
‘സമയത്തെ നിയന്ത്രിക്കുന്ന ദൈവം’ എന്ന ആശയത്തെ ആസ്പദമാക്കി ഒരുക്കുന്നൊരു ടൈം ട്രാവൽ ചിത്രമാണെന്ന സൂചനകളാണ് ട്രെയ്‌ലർ നൽകുന്നത്. ശ്രദ്ധ നേടിയ ‘സംഭവം’ എന്ന ഷോർട്ട് ഫിലിമിനെ ആസ്പദമാക്കിയാണ് ഈ സിനിമ ഒരുക്കിയിരിക്കുന്നത്.
പാലക്കാട് ജില്ലയിലെ ധോണി ഫോറസ്റ്റ് പ്രദേശത്തായിരുന്നു പ്രധാനമായും ചിത്രീകരണം. കേരള–തമിഴ്നാട് അതിർത്തിയിലുള്ള ഒരു ദുരൂഹ വനപ്രദേശം. അവിടെ ഒരിക്കൽ കയറിയവർ പിന്നീട് പുറംലോകം കണ്ടിട്ടില്ലെന്ന പ്രചാരണം. ആ നിഗൂഢതകളുടെ പിന്നിലെ സത്യമാണ് ചിത്രം അന്വേഷിക്കുന്നത്.
നല്ല സിനിമ പ്രൊഡക്ഷൻസിൻ്റെ ബാനറിൽ ഫഹദ് സിദ്ദിഖ്, ഫറാസ് മറ്റപ്പള്ളി, ഫയസ് മുഹമ്മദ്, എന്നിവർ നിർമ്മിക്കുന്ന ഈ ചിത്രത്തിൻ്റെ കോ പ്രൊഡ്യൂസർ നവീൻ ഊട്ടയും, എക്സിക്യൂട്ടീവ് പ്രൊഡ്യൂസര്‍ ആഷ്ന റഷീദുമാണ്. ചായാഗ്രഹണം നവീൻ നജോസ്, എഡിറ്റിംഗ് അർജുൻ പ്രകാശ്, ബാക്ക്ഗ്രൗണ്ട് സ്കോർ ഗോഡ്വിൻ തോമസ്, ഓഡിയോഗ്രഫി വിഷ്ണു ഗോവിന്ദ്, മേക്കപ്പ് പട്ടണം റഷീദ്, വസ്ത്രാലങ്കാരം സമീറ സനീഷ്, കലാസംവിധാനം സുജിത്ത് കൊല്ലനണ്ടി, സംഘട്ടനം അഷ്‌റഫ്‌ ഗുരുക്കൾ, സ്റ്റിൽസ് നിദാദ് കെ എൻ, ചീഫ് അസോസിയേറ്റ് ഡയറക്ടേഴ്സ് മെൽബിൻ മാത്യു, അനൂപ് മോഹൻ, പ്രൊഡക്ഷൻ കൺട്രോളർ പ്രവീൺ എടവണ്ണപ്പാറ.