തിരുവനന്തപുരം:എസ്.എസ്.എൽ.സി. പരീക്ഷകൾ 2026 മാർച്ച് 5ന് ആരംഭിച്ച് 30ന്
അവസാനിക്കുമെന്ന് പൊതുവിദ്യാഭ്യാസ മന്ത്രി വി ശിവൻകുട്ടി അറിയിച്ചു.
പരീക്ഷകൾ രാവിലെ 9.30 ന് ആരംഭിക്കും. ഐ.ടി.മോഡൽ പരീക്ഷ ജനുവരി 12മുതൽ 22
വരെ നടക്കും.എസ്.എസ്.എൽ.സി ഐ.ടി. പരീക്ഷ ഫെബ്രുവരി 2ന് ആരംഭിച്ചു 13ന്
അവസാനിക്കും. എസ്.എസ്.എൽ.സി മോഡൽ പരീക്ഷ ഫെബ്രുവരി 16 മുതൽ 20 വരെ
നടക്കും.
എസ്.എസ്.എൽ.സി. പരീക്ഷക്ക് അപേക്ഷയും പരീക്ഷാ ഫീസും പിഴ കൂടാതെ
ഒടുക്കേണ്ട തീയതി 2025 നവംബർ 12 മുതൽ 19 വരെയാണ്. പിഴയോടു കൂടി അപേക്ഷ
സ്വീകരിക്കുന്ന തീയതി നവംബർ 21 മുതൽ 26 വരെ. മൂല്യനിർണയം 2026 ഏപ്രിൽ 7
മുതൽ 25 വരെ നടക്കും. ഫലപ്രഖ്യാപനം പ്രതീക്ഷിക്കുന്ന തീയതി മെയ് 8 .
ഗൾഫ് മേഖലയിൽ ഏഴ് കേന്ദ്രങ്ങളും ലക്ഷദ്വീപിൽ ഒമ്പത് കേന്ദ്രങ്ങളും
ഉൾപ്പെടെ ആകെ മൂവായിരത്തോളം കേന്ദ്രങ്ങളാണ് പരീക്ഷയ്ക്കായി
സജ്ജമാക്കുന്നത്. 4,25,000 കുട്ടികളാണ് മാർച്ചിൽ എസ്.എസ്.എൽ.സി. പരീക്ഷ
എഴുതുന്നത്.
ഹയർ സെക്കന്‍ററി/വൊക്കേഷണൽ ഹയർ സെക്കന്‍ററി ഒന്നും രണ്ടും വർഷ പരീക്ഷകൾ:
ഹയർ സെക്കന്‍ററി/വൊക്കേഷണൽ ഹയർ സെക്കന്‍ററി ഒന്നാം വർഷ പൊതു പരീക്ഷകൾ
2026 മാർച്ച് 5 മുതൽ മാർച്ച് 27 വരെ നടക്കുമെന്ന് മന്ത്രി അറിയിച്ചു.
രണ്ടാം വർഷ പൊതു പരീക്ഷകൾ മാർച്ച് 6 മുതൽ മാർച്ച് 28 വരെ നടക്കും.
ഒന്നാം വർഷ പൊതുപരീക്ഷകൾ ഉച്ചയ്ക്ക് ശേഷം 1.30 നും രണ്ടാം വർഷ പൊതു
പരീക്ഷകൾ രാവിലെ 9.30 നും ആരംഭിക്കുന്നതാണ്. വെള്ളിയാഴ്ച രാവിലെ 9.15 ന്
തുടങ്ങി ഉച്ചയ്ക്ക് 12.00 മണിക്ക് അവസാനിക്കും.
മാർച്ച് 27നുള്ള ഒന്നാം വർഷ പൊതു പരീക്ഷകളിൽ ഒരു സെഷൻ രാവിലത്തെ
സമയക്രമത്തിലും മറ്റൊരു സെഷൻ ഉച്ചക്കുള്ള സമയക്രമത്തിലുമാണ്
ക്രമീകരിച്ചിട്ടുള്ളത്.സ്‌കോൾ കേരള മുഖേന അഡീഷണൽ മാത്തമാറ്റിക്സിന്
രജിസ്റ്റർ ചെയ്ത 125 വിദ്യാർത്ഥികൾക്ക് മാത്രമേ അന്നേ ദിവസം രണ്ട്
സെഷനിലും പരീക്ഷ വരുകയുള്ളൂ.രണ്ടാം വർഷ വിദ്യാർത്ഥികളുടെ പ്രായോഗിക
പരീക്ഷകൾ ജനുവരി 22 ന് ആരംഭിക്കും. ഹയർ സെക്കന്‍ററി ഒന്നും രണ്ടും വർഷ
പൊതുപരീക്ഷകൾക്ക് മുന്നോടിയായിട്ടുള്ള മാതൃകാ പരീക്ഷകൾ ഫെബ്രുവരി 16
മുതൽ 26 വരെയുള്ള ദിവസങ്ങളിലായാണ് നിശ്ചയിച്ചിട്ടുള്ളത്.
ഫൈനില്ലാതെ ഫീസ് ഒടുക്കേണ്ട അവസാന തീയതി 2025 നവംബർ 7 ആണ്. ഫൈനോടെ ഫീസ്
ഒടുക്കേണ്ട അവസാന തീയതി നവംബർ 13. സൂപ്പർ ഫൈനോടെ ഫീസ് ഒടുക്കേണ്ട അവസാന
തീയതി നവംബർ 25 ആണ്.
ഹയർ സെക്കന്‍ററി ഒന്നും രണ്ടും വർഷ പരീക്ഷകൾ ഏകദേശം 9 ലക്ഷം
വിദ്യാർത്ഥികൾ എഴുതുമെന്ന് കരുതുന്നു. 2026ലെ ഒന്നും രണ്ടും വർഷ ഹയർ
സെക്കന്‍ററി പരീക്ഷകൾക്കായി കേരളം, ഗൾഫ്, ലക്ഷദ്വീപ് എന്നിവിടങ്ങളിലെയും
ചേർത്ത് രണ്ടായിരത്തോളം പരീക്ഷാ കേന്ദ്രങ്ങൾ ഉണ്ടാകും. മൂല്യനിർണ്ണയം
2026 ഏപ്രിൽ 6 ന് ആരംഭിച്ച് മെയ് 22 ഓടുകൂടി ഫലപ്രഖ്യാപനം നടത്താൻ
കഴിയുമെന്ന് പ്രതീക്ഷിക്കുന്നതായി മന്ത്രി പറഞ്ഞു.
വൊക്കേഷണൽ ഹയർ സെക്കന്‍ററി ഒന്നാം വർഷം റെഗുലർ വിഭാഗത്തിൽ 26,822
വിദ്യാർത്ഥികളും രണ്ടാം വർഷം 26,826 വിദ്യാർത്ഥികളും പരീക്ഷ എഴുതും.
രണ്ടാം വർഷ സ്‌കിൽ ഇവാലുവേഷൻ 2026 ജനുവരിയിൽ പൂർത്തിയാക്കും. ഒന്നാം വർഷ
സ്‌കിൽ ഇവാലുവേഷൻ ജനുവരി അവസാനവാരം ആരംഭിക്കും.
പരീക്ഷ സംബന്ധിച്ച വിജ്ഞാപനം വരും ദിവസങ്ങളിൽ പുറത്തിറക്കും. വിശദമായ
ടൈംടേബിൾ അതോടൊപ്പം ഉൾപ്പെടുത്തും. എസ്.എസ്.എൽ.സി, ഹയർ സെക്കന്‍ററി
ഒന്നും രണ്ടും വർഷ പരീക്ഷകൾ, ഒന്നാം വർഷ ഇംപ്രൂവ്മെൻ്റ് പരീക്ഷകൾ
എന്നിവയോടൊപ്പം ഒന്നു മുതൽ ഒമ്പത് വരെ ക്ലാസ്സുകളിലെ വാർഷിക പരീക്ഷയും
നടത്തേണ്ടതുണ്ട്.എച്ച്.എസ് അറ്റാച്ച്ഡ് എൽ.പി വിഭാഗം പരീക്ഷകൾ 2026
മാർച്ച് 12 മുതൽ 26 വരെയും എച്ച്.എസ് അറ്റാച്ച്ഡ് യു.പി/ ഹൈസ്‌കൂൾ വിഭാഗം
പരീക്ഷകൾ 2026 മാർച്ച് 6 മുതൽ 27 വരെയുമാണ്.
ഹൈസ്‌കൂളിൻ്റെ ഭാഗമല്ലാതെ ഒറ്റപ്പെട്ട് നിൽക്കുന്ന എൽ.പി., യു.പി
ക്ലാസ്സുകളുടെ പരീക്ഷകൾ പ്രത്യേകം ചോദ്യപേപ്പർ തയ്യാറാക്കി മാർച്ച് 18
മുതൽ നടത്തും. ഒമ്പതാം ക്ലാസ്സിലെ കുട്ടികൾ എസ്.എസ്.എൽ.സി, ഹയർ
സെക്കന്‍ററി കുട്ടികൾക്ക് സ്‌ക്രൈബായി പരീക്ഷകൾ എഴുതാൻ പോകാറുണ്ട്.
ആയതിനാൽ എസ്.എസ്.എൽ.സി, ഹയർ സെക്കന്‍ററി പരീക്ഷകൾ നടക്കുന്ന ദിവസം
പരമാവധി ഒഴിവാക്കിയാണ് 1 മുതൽ 9 വരെ ക്ലാസ്സുകളിലെ പരീക്ഷകൾ നടത്തുന്നത്.
എൽഎസ്എസ്, യുഎസ്എസ് സർട്ടിഫിക്കറ്റുകൾ: ഈ വർഷം മുതൽ എൽഎസ്എസ്, യുഎസ്എസ്
സർട്ടിഫിക്കറ്റുകൾ പ്രഥമാധ്യാപകരുടെ ലോഗിൻ മുഖേന ഡൗൺലോഡ് ചെയ്യത്തക്ക
വിധം ക്രമീകരിക്കും. സർട്ടിഫിക്കറ്റുകൾ ലഭിക്കുന്നതിലെ കാലതാമസം ഇതിലൂടെ
ഒഴിവാക്കാൻ സാധിക്കുമെന്ന് മന്ത്രി വി.ശിവൻകുട്ടി അറിയിച്ചു.