നീതിന്യായവ്യവസ്‌ഥയ്ക്കും മെച്ചപ്പെടാനുള്ള അവസരമുണ്ട് എന്നോർമ്മിപ്പിക്കുന്ന വിധി
തിരുവനന്തപുരം :ഭാവനയ്ക്കും വിമൻ ഇൻ സിനിമ കളക്ടീവ് എന്ന സംഘടനയ്ക്കും ഐക്യദാർഢ്യം പ്രഖ്യാപിച്ച് പ്രമുഖ മാധ്യമ പ്രവർത്തകൻ കെ.ജെ ജേക്കബ്.തങ്ങൾ രാജിവച്ചപ്പോൾ കോടതി തന്നെ കൂറ് മാറി എന്ന് ഒരർത്ഥത്തിൽ രാജിവച്ച പ്രോസിക്യൂട്ടർമാർ പ്രഖ്യാപിക്കുകയാണ് ചെയ്തെന്ന് അദ്ദേഹം നിരീക്ഷിക്കുന്നു.

കെ.ജെ ജേക്കബ്

‘ഡെക്കാണ്‍ ക്രോണിക്കിൾ’ എക്സിക്യുട്ടീവ് എഡിറ്ററായ കെ.ജെ ജേക്കബ് ഫെയ്സ് ബുക്കിൽ എഴുതിയത് :
ഹീനമായ ഒരു കുറ്റകൃത്യം ചെയ്തു എന്നാരോപിക്കപ്പെട്ട പ്രതികൾ കുറ്റക്കാരാണെന്ന് കോടതി കണ്ടു.
അത്രയും ആശ്വാസം.
മലയാളത്തിലെ ഒരു മുൻനിര നടിയെ ഓടുന്ന വാഹനത്തിൽ കയറി വലിയ സാമ്പത്തിക-രാഷ്ട്രീയ-ക്രിമിനൽ സംഘ ബന്ധങ്ങളില്ലാത്ത പ്രതി ബലാൽസംഗം ചെയ്യണം എങ്കിൽ അയാൾക്ക് പിറകിൽ ആരോ ഉണ്ട് എന്ന് കോടതിയ്ക്ക് അത്ര ബോധ്യമായിട്ടില്ല. അല്ലെങ്കിൽ പ്രോസിക്യൂഷൻ പറഞ്ഞ പ്രതിയാണെന്ന് ബോധ്യമായിട്ടില്ല എന്നല്ലേ?
ആവട്ടെ.
***
സാക്ഷികൾ നിരനിരയായി കൂറുമാറിയതൊക്കെ പോട്ടെ.
എല്ലാ കോടതിയും രണ്ടുഭാഗത്തിൻ്റെയും വിശ്വാസത്തിന്‍റെ പുറത്തുതന്നെയാണ് പ്രവർത്തിക്കുന്നത്. തങ്ങളെ കേൾക്കുകയും നീതിയുക്തമായ, നിയമപരമായ തീരുമാനം കോടതി എടുക്കുകയും ചെയ്യും എന്ന വിശ്വാസത്തിൽത്തന്നെയാണ് കക്ഷികളും അവരെ പ്രതിനിധീകരിക്കുന്ന അഭിഭാഷകരും കോടതിയിൽ എത്തുന്നത്.
പോലീസും പട്ടാളവുമല്ല കോടതിയുടെ ബലം; നീതിബോധമുള്ള ജനങ്ങളുടെ വിശ്വാസമാണ്. ആ വിശ്വാസം തകർന്നാൽ തോൽക്കുന്നത് കക്ഷികളല്ല,
നീതിന്യായവ്യവസ്‌ഥയാണ്.
വിചാരണയ്ക്കിടയിൽത്തന്നെ നീതി കിട്ടുന്നില്ല എന്ന് കുറ്റകൃത്യത്തിന്റെ ഇരയും പ്രോസിക്യൂഷൻ അഭിഭാഷകരും പരാതിപ്പെട്ട ഒരു കേസാണിത്. രണ്ടു പ്രോസിക്യൂട്ടർമാർ രാജിവച്ചു പോവുകയും ചെയ്തു.
പ്രോസിക്യൂഷൻ സാക്ഷികൾ കൂറുമാറിയാൽ അത് പ്രഖ്യാപിക്കുന്നത് പ്രോസിക്യൂട്ടറാണ്. തങ്ങൾ രാജിവച്ചപ്പോൾ കോടതി തന്നെ കൂറ് മാറി എന്ന് ഒരർത്ഥത്തിൽ പ്രോസിക്യൂട്ടർമാർ പ്രഖ്യാപിക്കുകയാണ് ചെയ്തത്. മേൽക്കോടതി അത് കേൾക്കാൻ തയാറായുമില്ല.
പൗരന്മാർക്കു മാത്രമല്ല കോടതികൾക്കും നീതിന്യായവ്യവസ്‌ഥയ്ക്കും മെച്ചപ്പെടാനുള്ള അവസരമുണ്ട് എന്നോർമ്മിപ്പിക്കുന്ന വിധി.
***
ഭാവനയ്ക്ക്, വിമൻ ഇൻ സിനിമ കളക്ടീവ് എന്ന സംഘടനയ്ക്ക്, ഐക്യദാർഢ്യം. പോരാട്ടങ്ങൾ തുടരുക.
ബാലചന്ദ്രകുമാർ, നിങ്ങൾക്ക് ഒരിക്കൽക്കൂടി അഭിവാദ്യം. എപ്പോഴും ജയിക്കണമെന്നില്ല. എങ്കിലും നിങ്ങളുടെ വംശം ബാക്കിയുണ്ടാവട്ടെ.