‘ വെക്കേഷൻ ഫോസ്റ്റർ കെയർ’ പദ്ധതിയുമായി ഡി.സി.പി.യു

തിരുവനന്തപുരം: സ്നേഹത്തിന്‍റെയും കരുതലിന്‍റെയും കൈത്താങ്ങായി നമ്മുടെ കുഞ്ഞുങ്ങൾക്കൊപ്പം ഒരു കുഞ്ഞിനെ കൂടി കൂടെ കൂട്ടിയാലോ?
തിരുവനന്തപുരം ജില്ലിയിലെ അംഗീകൃത ശിശുസംരക്ഷണ സ്ഥാപനങ്ങളിൽ താമസിച്ചുവരുന്നവരും അവധിക്കാലത്ത് വീട്ടിലേക്ക് പോകാൻ സാധിക്കാത്തതുമായ കുട്ടികൾക്ക് വീടിന്‍റെയും കുടുംബത്തിന്‍റെയും തണലൊരുക്കുന്ന ഫോസ്റ്റർ കെയർ പദ്ധതിയുടെ ഭാഗമാകാൻ അവസരമൊരുക്കുകയാണ് ജില്ലാ ശിശു സംരക്ഷണ യൂണിറ്റ്.വനിത ശിശുവികസന വകുപ്പിന് കീഴിലെ ജില്ലാ ശിശു സംരക്ഷണ യൂണിറ്റിന്‍റെ വെക്കേഷൻ ഫോസ്റ്റർ കെയർ പദ്ധതിയുടെ ഭാഗമായി കുട്ടികളെ പോറ്റി വളർത്താൻ താൽപര്യമുള്ളവർക്ക് ഫെബ്രുവരി 15 വരെ അപേക്ഷകൾ സമർപ്പിക്കാം.കുട്ടികൾക്ക് സ്നേഹവും സുരക്ഷിതത്വവും ഉറപ്പുവരുത്തുകയെന്ന ലക്ഷ്യത്തിലാണ് പദ്ധതി നടപ്പിലാക്കുന്നത്. കുഞ്ഞുങ്ങളെ ഹ്രസ്വകാലത്തേക്ക് പോറ്റിവളർത്താൻ താൽപ്പര്യപെടുന്ന ജില്ലയിൽ താമസക്കാരായ ദമ്പതികൾക്കോ, സിംഗിൾ പാരന്‍റിനോ പൂജപ്പുരയിലുള്ള ഡി.സി.പി.യു (ഡിസ്ട്രിക്റ്റ് ചൈൽഡ് പ്രൊട്ടക്ഷൻ യൂണിറ്റ്) ഓഫീസിൽ നേരിട്ടെത്തി ഈ പദ്ധതിയെ കുറിച്ച് അന്വഷിക്കാനും രജിസ്റ്റർ ചെയ്ത് ഫോസ്റ്റർ പാരൻ്റ്സ് ആകാനും സാധിക്കും, ബാലനീതി നിയമപ്രകാരം രജിസ്റ്റർ ചെയ്തിട്ടുള്ള 61 ശിശുസംരക്ഷണ സ്ഥാപനങ്ങളിൽ നിന്ന് ആറ് വയസിന് മുകളിൽ പ്രായമുള്ള കുട്ടികളെയാണ് ഇതിനായി തെരഞ്ഞെടുക്കുന്നത്.

തിരുവനന്തപുരം ജില്ലയിൽ സ്ഥിരതാമസക്കാരായിട്ടുള്ള ദമ്പതിമാർക്കോ സിംഗിൾ പാരന്‍റിനോ പദ്ധതിയുടെ ഭാഗമാകാം. ഫോസ്റ്റർ രക്ഷിതാക്കളാകാൻ രജിസ്റ്റർ ചെയ്യുന്നവരുടെ സാമൂഹിക കുടുംബ പശ്ചാത്തലങ്ങൾ ഉദ്യോഗസ്ഥർ കൃത്യമായി വിലയിരുത്തും. ഇതിനുശേഷം ജില്ലാ ചൈൽഡ് പ്രൊട്ടക്ഷൻ യൂണിറ്റിലെ ജീവനക്കാർ കുട്ടികൾക്ക് പ്രത്യേക കൗൺസിലിംഗ് നൽകുകയും കുട്ടികളുടെയും രക്ഷിതാക്കളുടെയും വ്യക്തിത്വങ്ങൾ തമ്മിലുള്ള യോജിപ്പ് പരിശോധിക്കുകയും ചെയ്യും. തുടർന്ന് കുട്ടിയും രക്ഷിതാക്കളും തമ്മിൽ ചൈൽഡ് വെൽഫെയർ കമ്മിറ്റി (സി.ഡബ്ല്യൂ.സി) ഓഫീസിൽ നടത്തുന്ന ഇൻ്ററാക്ഷൻ സെഷനുകൾക്ക് കൂടി ശേഷമായിരിക്കും കുട്ടികളെ നൽകുക.

കുട്ടികൾ പുതിയ കുടുംബത്തോടൊപ്പം കഴിയുന്ന കാലയളവിൽ ചൈൽഡ് വെൽഫെയർ കമ്മിറ്റിയുടെ കൃത്യമായ മേൽനോട്ടം ഉണ്ടായിരിക്കും. വേനലവധി കാലയളവിൽ കുട്ടികൾക്ക് സാഹചര്യം മികച്ചതാണെന്ന് ബോധ്യപ്പെടുകയും ദീർഘകാലത്തേക്ക് കുട്ടികളെ പോറ്റി വളർത്താൻ ഫോസ്റ്റർ രക്ഷിതാക്കൾക്ക് താൽപ്പര്യമുണ്ടാവുകയും ചെയ്താൽ മറ്റ് സാങ്കേതിക പ്രക്രിയകൾക്ക് ശേഷം അതിനും അനുമതി ലഭിക്കും.

കൂടുതൽ വിവരങ്ങൾക്ക് 0471 2345121 .