68 ലക്ഷം പുസ്തകങ്ങളുടെ അച്ചടി ഇതിനോടകം പൂർത്തിയായി

തിരുവനന്തപുരം:സ്കൂൾ അടയ്ക്കും മുമ്പേ ഒരുക്കങ്ങൾ പൂർത്തിയായി; അടുത്ത അധ്യയന വർഷത്തെ പാഠപുസ്തക, യൂണിഫോം വിതരണത്തിന് തുടക്കമാകുന്നു. 2026-27 അധ്യയന വർഷത്തേക്കുള്ള പാഠപുസ്തകങ്ങളും യൂണിഫോമും വിദ്യാലയങ്ങൾ അടയ്ക്കുന്നതിന് മുൻപ് തന്നെ എത്തിക്കുക എന്ന ലക്ഷ്യം സർക്കാർ യാഥാർത്ഥ്യമാക്കുകയാണെന്ന് പൊതുവിദ്യാഭ്യാസമന്ത്രി വി.ശിവൻകട്ടി അറിയിച്ചു. വരാനിരിക്കുന്ന അധ്യയന വർഷത്തെ ഒന്നാം വാല്യത്തിലേക്കായി ഏകദേശം 3.5 കോടി പുസ്തകങ്ങളാണ് ഇത്തവണ അച്ചടിക്കുന്നത്. ഇതിൽ 68 ലക്ഷം പുസ്തകങ്ങളുടെ അച്ചടി ഇതിനോടകം പൂർത്തിയായിക്കഴിഞ്ഞു .
കൃത്യമായ ആസൂത്രണത്തിലൂടെ സെപ്റ്റംബറിൽ തന്നെ പ്രവർത്തനങ്ങൾ ആരംഭിച്ച്, പേപ്പർ വാങ്ങുന്നതിനായി 111 കോടി രൂപയുടെ ഭരണാനുമതി സർക്കാർ നൽകി. നിലവിൽ 51 ലക്ഷം പുസ്തകങ്ങൾ വിതരണത്തിനായി വിവിധ ഹബ്ബുകളിൽ എത്തിച്ചുകഴിഞ്ഞു. കൂടാതെ, 8 ലക്ഷത്തിലധികം കുട്ടികൾക്കുള്ള സൗജന്യ കൈത്തറി യൂണിഫോം വിതരണത്തിനുള്ള നടപടികളും പുരോഗമിക്കുകയാണ്.
പാഠപുസ്തകങ്ങളുടെയും യൂണിഫോമിൻ്റെയും സംസ്ഥാനതല വിതരണ ഉദ്ഘാടനം ഫെബ്രുവരി 13-ന് വൈകുന്നേരം 4.30-ന് മുഖ്യമന്ത്രി പിണറായി വിജയൻ പട്ടം സെന്‍റ് മേരീസ് സ്കൂളിൽ നിർവഹിക്കും.