കേരളത്തിന് 2,924 കോടി രൂപയുടെ കൂടി അധിക വായ്പാനുമതി

തിരുവനന്തപുരം:വൈദ്യുതി മേഖലയിൽ സംസ്ഥാനം നടപ്പിലാക്കിയ മാതൃകാപരമായ പരിഷ്കാരങ്ങൾക്കും പ്രകടന മികവിനുമുള്ള അംഗീകാരമായി കേരളത്തിന് 2,924 കോടി രൂപയുടെ അധിക വായ്പ കൂടി എടുക്കാൻ കേന്ദ്ര സർക്കാർ അനുമതി നൽകിയതായി വൈദ്യുതി വകുപ്പ് മന്ത്രി കെ. കൃഷ്ണൻകുട്ടി അറിയിച്ചു.

വൈദ്യുതിമന്ത്രി കെ. കൃഷ്ണൻകുട്ടി

കേന്ദ്ര ഊർജ്ജ മന്ത്രാലയത്തിന്‍റെ ശുപാർശ പ്രകാരം ഭരണഘടനയുടെ അനുച്ഛേദം 293(3) ഉപയോഗിച്ചാണ് ഈ തുക അനുവദിച്ചിട്ടുള്ളത്. വൈദ്യുതി മേഖലയിലെ പ്രകടന മികവ് മുൻനിർത്തി സംസ്ഥാനത്തിന്‍റെ മൊത്തം ആഭ്യന്തര ഉൽപാദനത്തിന്റെ 0.22 ശതമാനം തുക (2,924 കോടി രൂപ) കഴിഞ്ഞ ആഴ്ച അനുവദിച്ചിരുന്നു. അതിന്‍റെ തുടർച്ചയായി, പരിഷ്കാരങ്ങളുമായി ബന്ധപ്പെട്ട രേഖകൾ കൃത്യസമയത്ത് സമർപ്പിച്ചതിനെത്തുടർന്നാണ് ഇപ്പോൾ തുല്യമായ തുക കൂടി സംസ്ഥാനത്തിന് ലഭ്യമായിരിക്കുന്നത്. ഇതോടെ ഈ വർഷം വൈദ്യുതി മേഖലയിലെ മികച്ച പ്രവർത്തനത്തിന്റെ അടിസ്ഥാനത്തിൽ മൊത്തം 5,848 കോടി രൂപയുടെ അധിക വായ്പാനുമതിയാണ് സംസ്ഥാനത്തിന് ലഭിച്ചത്.
കേന്ദ്ര ധനകാര്യ മന്ത്രാലയത്തിന്റെ എക്സ്പെൻഡിച്ചർ വിഭാഗം ഇത് സംബന്ധിച്ച ഔദ്യോഗിക അറിയിപ്പ് ഇതിനോടകം തന്നെ പുറപ്പെടുവിച്ചു കഴിഞ്ഞു.