ദൈവദശകത്തിലെ മൂന്ന് പദ്യങ്ങൾ സംസ്ഥാന പ്രാർഥനാ ഗീതമായി പ്രഖ്യാപിക്കണമെന്നും ശിവഗിരി മഠം

തിരുവനന്തപുരം:വാർഷിക ശിവഗിരി തീർഥാടനത്തിനെത്തുന്ന ലക്ഷക്കണക്കിന് ഭക്തർക്കായി അടിസ്ഥാന സൗകര്യങ്ങൾ വിപുലീകരിക്കുന്നതിന് ആറേക്കർ ഭൂമി ലഭ്യമാക്കണമെന്ന് ശിവഗിരി മഠം ആവശ്യപ്പെട്ടു. അധികാരമേറ്റ ശേഷം ആദ്യ ഔദ്യോഗിക സന്ദർശനത്തിൻ്റെ ഭാഗമായി ശിവഗിരിയിലെത്തിയ മുഖ്യമന്ത്രി വി.ഡി. സതീശന് മുന്നിലാണ് മഠം ഈ ആവശ്യം ഉൾപ്പെടെയുള്ള വിവിധ നിർദേശങ്ങൾ സമർപ്പിച്ചത്. ആവശ്യങ്ങൾ ഗൗരവമായി പരിഗണിച്ച് നടപടികൾ സ്വീകൾകരിക്കുമെന്ന് മുഖ്യമന്ത്രി ഉറപ്പുനൽകി.
ശിവഗിരി മഠം പ്രസിഡന്‍റ് സ്വാമി സച്ചിദാനന്ദ , ജനറൽ സെക്രട്ടറി സ്വാമി ശുഭാംഗാനന്ദ, ട്രഷറർ സ്വാമി ശാരദാനന്ദ ഉൾപ്പെടെയുള്ള സന്യാസിമാരുമായി മുഖ്യമന്ത്രി കൂടിക്കാഴ്ച നടത്തി. തുടർന്ന് സമാധി മന്ദിരത്തിലെത്തി പ്രാർഥനാ ചടങ്ങിൽ പങ്കെടുത്തു.
മാധ്യമങ്ങളോട് സംസാരിച്ച മുഖ്യമന്ത്രി, എല്ലാവരും സഹോദരങ്ങളായി ജീവിക്കുന്ന കേരളമെന്ന ശ്രീനാരായണ ഗുരുദേവന്‍റെ ദർശനത്തോട് പ്രതിബദ്ധത പുലർത്തുന്നതാണ് സംസ്ഥാന സർക്കാരെന്ന് പറഞ്ഞു.
“ശ്രീനാരായണ ഗുരുദേവന്‍റെ സാന്നിധ്യത്താലും സ്പർശത്താലും പുണ്യമായ ശിവഗിരി കേരളത്തിലെ പ്രധാന തീർഥാടന കേന്ദ്രങ്ങളിലൊന്നാണ്. ശിവഗിരിയെ അന്താരാഷ്ട്ര നിലവാരത്തിലുള്ള തീർഥാടന കേന്ദ്രമായി ഉയർത്തുന്നതിനാവശ്യമായ എല്ലാ പിന്തുണയും സർക്കാർ നൽകും,” അദ്ദേഹം പറഞ്ഞു.
വാർഷിക തീർഥാടന വേളയിൽ ഭക്തർക്കായി കൂടുതൽ സൗകര്യങ്ങൾ ഒരുക്കുന്നതിനുള്ള അധിക സ്ഥലം കണ്ടെത്തുക എന്നതാണ് മുഖ്യമന്ത്രിക്ക് മുന്നിൽ ഉന്നയിച്ച പ്രധാന ആവശ്യമെന്ന് സച്ചിദാനന്ദ സ്വാമി പറഞ്ഞു.
“ഉപയോഗശൂന്യമായി കിടക്കുന്ന ശിവഗിരി തുരങ്കത്തിന്‍റെ മുകൾഭാഗം കോൺക്രീറ്റ് ചെയ്ത് മൂടി ആറേക്കർ സ്ഥലം വീണ്ടെടുക്കണം. തീർഥാടന കാലത്ത് തീർഥാടകർക്കാവശ്യമായ സൗകര്യങ്ങളും മറ്റ് അടിസ്ഥാന സംവിധാനങ്ങളും ഒരുക്കാൻ ഈ സ്ഥലം ഉപയോഗിക്കാനാകും,” അദ്ദേഹം പറഞ്ഞു.
ഈ പദ്ധതി പ്രതിവർഷം ശിവഗിരിയിലെത്തുന്ന ലക്ഷക്കണക്കിന് ഭക്തർക്ക് വലിയ ആശ്വാസമാകുമെന്നും സർക്കാരിന് ഗണ്യമായ വരുമാനസാധ്യതയും സൃഷ്ടിക്കുമെന്നും അദ്ദേഹം ചൂണ്ടിക്കാട്ടി.
ദൈവദശകത്തിലെ മൂന്ന് പദ്യങ്ങൾ സംസ്ഥാന പ്രാർഥനാ ഗീതമായി പ്രഖ്യാപിക്കുക, ശിവഗിരി മഠത്തിന്‍റെ പോഷകസംഘടനയായ ഗുരുധർമ്മ പ്രചരണ സഭയെ സംസ്ഥാന സർക്കാരിൻ്റെ മദ്യവിരുദ്ധ ബോധവത്കരണ പ്രവർത്തനങ്ങളിൽ പങ്കാളിയാക്കുക തുടങ്ങിയ ആവശ്യങ്ങളും മഠം മുഖ്യമന്ത്രിക്ക് മുന്നിൽ അവതരിപ്പിച്ചു. മഠം മുന്നോട്ടുവച്ച എല്ലാ നിർദേശങ്ങളും വിശദമായി പരിശോധിക്കുമെന്ന് മുഖ്യമന്ത്രി വ്യക്തമാക്കി.