പ്രസിദ്ധീകരിക്കുന്നത് കോഴിക്കോട് ‘ഒലിവ്’ പബ്ലിക്കേഷൻസ്

തിരുവനന്തപുരം:’ഒലിവ്’ പബ്ലിക്കേഷൻസ് പ്രസിദ്ധീകരിക്കുന്ന,നമ്മുടെമലയാളം ഡോട്ട് കോം എഡിറ്റർ എം.ബി.സന്തോഷിൻ്റെ രണ്ട് പുസ്തകങ്ങളുടെ പ്രകാശനം തിരുവനന്തപുരം പ്രസ്ക്ലബ്ബിലെ പി.സി സുകുമാരൻ നായർ ഹാളിൽ ജൂലായ് 18ന് വൈകുന്നേരം നാലിന് .’മെട്രൊവാർത്ത’യിലെ പംക്തിയായിരുന്ന ‘അതീത’ത്തിൽ പ്രസിദ്ധീകരിച്ച 48 കുറിപ്പുകളാണ് അതേപേരിൽ പുസ്തകമാവുന്നത്.’പ്രണയാനന്ദം’ കഴിഞ്ഞ ഓണപ്പതിപ്പിൽ പ്രസിദ്ധീകരിച്ച നോവലെറ്റ് വിപുലീകരിച്ചതാണ്.

‘അതീതം’ കേന്ദ്രസാഹിത്യ അക്കാഡമി അവാർഡ് ജേതാവുകൂടിയായ എഴുത്തുകാരൻ ഡോ.ജോർജ് ഓണക്കൂർ പ്രകാശനം ചെയ്യും.ഏറ്റുവാങ്ങുന്നത് എഴുത്തുകാരൻ ശ്രീകണ്ഠൻ കരിക്കകം.മുൻ മന്ത്രിയും എഴുത്തുകാരനും ഒലിവ് പബ്ലിക്കേഷൻസ് ചെയർമാനുമായ ഡോ.എം.കെ മുനീർ അധ്യക്ഷത വഹിക്കുന്ന ചടങ്ങിൽ ചലച്ചിത്ര സംവിധായകൻ ദീപുകരുണാകരൻ, ‘പ്രണയാനന്ദം’ചിത്രകാരൻ കാരയ്ക്കാമണ്ഡപം വിജയകുമാറിന് നൽകി പ്രകാശനം നിർവഹിക്കും.

കവിയും ഗാനരചയിതാവുമായ വിഭു പിരപ്പൻകോടാണ് പുസ്തകങ്ങൾ പരിചയപ്പെടുത്തുന്നത്. മാധ്യമ പ്രവർത്തകനും കഥാകൃത്തുമായ ടി.ബി ലാൽ പ്രസംഗിക്കും.’ന്യൂസ് 18′ ചാനൽ ന്യൂസ് എഡിറ്റർ ആർ. കിരൺ ബാബുവാണ് അവതാരകൻ.
എം ബി സന്തോഷിൻ്റെ നോവൽ ‘ഓട്ടോ ഡ്രൈവർ’ നിലവിൽ മലയാള മനോരമ ആഴ്ചപ്പതിപ്പിൽ തുടർച്ചയായി പ്രസിദ്ധീകരിച്ചു വരികയാണ്.
ആടുകഥ(പൂർണ),ഒന്നാം മരണം(സൈകതം),അഞ്ചും അഞ്ച്,കുട്ടനും കിളിയും(രണ്ടും ചിന്ത പബ്ലിഷേഴ്സ്),2018ലെ പ്രളയം പാഠം പ്രതിരോധം അതിജീവനം(കേരള ഭാഷാ ഇൻസ്റ്റിറ്റ്യൂട്ട്) എന്നീ കൃതികൾ ഇപ്പോൾ വിപണിയിൽ ലഭ്യമാണ്.