കെപിസിസിക്ക് പുതിയതായി 17 അംഗ കോര് കമ്മിറ്റി
തിരുവനന്തപുരം: കേരളത്തിലെ കോണ്ഗ്രസിന് 17 അംഗ കോര് കമ്മിറ്റി. എഐസിസി ജനറല് സെക്രട്ടറി ദീപ ദാസ് മുന്ഷിയാണ് കമ്മിറ്റിയുടെ കണ്വീനര് .
ദീപാ ദാസ് മുൻഷി
സംസ്ഥാനത്തെ ഏറ്റവും സീനിയറായ നേതാക്കളില് പ്രമുഖനും മുന് പ്രതിരോധ മന്ത്രിയും പ്രവര്ത്തക സമിതി അംഗവുമായ എ.കെ. ആന്റണി,എ ഐ സി സി ജനറല് സെക്രട്ടറി കെ.സി.വേണുഗോപാല്, കെപിസിസി പ്രസിഡൻ്റ് സണ്ണി ജോസഫ്,പ്രതിപക്ഷനേതാവ് വി.ഡി സതീശൻ,മുൻ പ്രസിഡൻ്റുമാരായ രമേശ് ചെന്നിത്തല,കെ.സുധാകരന്,കെ.മുരളീധരന്, വി.എം.സുധീരന്, എം.എം.ഹസ്സന്, മുല്ലപ്പള്ളി രാമചന്ദ്രന്,യുഡിഎഫ് കണ്വീനര് അടൂര് പ്രകാശ്,ശശി തരൂര്, കൊടിക്കുന്നില് സുരേഷ്, എ.പി.അനില് കുമാര്, പി.സി.വിഷ്ണുനാഥ്, ഷാഫി പറമ്പില്, ഷാനിമോള് ഉസ്മാന് എന്നിവരാണ് അംഗങ്ങള്.
പുനഃസംഘടനയില് കെപിസിസി പ്രസിഡൻ്റിന് പുറമെ 3 വര്ക്കിങ് പ്രസിഡൻ്റുമാരെയും 13 വൈസ് പ്രസിഡൻ്റുമാരെയും 59 ജനറല് സെക്രട്ടറിമാരെയും നിയമിച്ച സാഹചര്യത്തില് കൂടിയാലോചനകള്ക്കുപോലും സാധ്യമാകാതെ വന്നു.രാഷ്ട്രീയകാര്യസമിതി അംഗങ്ങളുടെ എണ്ണം 39 ആയി ഉയര്ത്തുകകൂടിയായപ്പോള് ആ സമിതിയും അടിയന്തരഘട്ടത്തില് പ്രയോജനപ്പെടുത്താനാവാത്ത സ്ഥിതിയിലാണ് പുതിയ കമ്മിറ്റിയുടെ രൂപീകരണം.
സംഘടനാപരമായ കാര്യങ്ങള് ക്രോഡീകരിക്കാനും കൂട്ടായ തീരുമാനങ്ങള് എടുക്കാനുമാണ് പുതിയ സമിതി . ഡല്ഹിയില് കേരളത്തിലെ മുതിര്ന്ന കോണ്ഗ്രസ് നേതാക്കളുമായി നടത്തിയ കൂടിക്കാഴ്ചകള്ക്കൊടുവിലാണ് പുതിയ കോര് കമ്മിറ്റി രൂപീകരണം.
