ചികിത്സാ പിഴവുകൾ ഇല്ലാതാക്കാൻ വേണ്ട തരത്തിലുള്ള സംവിധാനങ്ങൾ നടപ്പിലാക്കുമെന്ന് കെ.ജി.എം.സി.ടി.എ

തിരുവനന്തപുരം:കേരള ഗവൺമെൻ്റ് മെഡിക്കൽ കോളേജ് ടീച്ചേഴ്സ് അസോസിയേഷന്റെ (കെ.ജി.എം.സി.ടി.എ) പുതിയ സംസ്ഥാന ഭാരവാഹികൾ ചുമതലയേറ്റു. മേയ് 17-ന് തിരുവനന്തപുരത്ത് വെച്ച് ചേർന്ന സംയുക്ത കേന്ദ്ര നിർവാഹക സമിതി യോഗത്തിലാണ് പുതിയ ഭാരവാഹികളുടെ സ്ഥാനാരോഹണം നടന്നത്.

ഡോ.പി.എസ്. ഷാജഹാൻ

സംഘടനയുടെ പുതിയ സംസ്ഥാന പ്രസിഡന്‍റായി ഡോ.പി.എസ്. ഷാജഹാൻ ചുമതലയേറ്റു. നിലവിലുള്ള സംസ്ഥാന പ്രസിഡണ്ട് ആയ ഡോ. റോസ്നാര ബീഗത്തിൽ നിന്ന് ആണ് അദ്ദേഹം ചുമതല ഏറ്റെടുത്തത്. രണ്ട് ദശകങ്ങളായി കെ.ജി.എം.സി.ടി.എ യുടെ നേതൃ നിരയിൽ പ്രവർത്തിക്കുന്ന ഡോ ഷാജഹാൻ കൊല്ലം ഗവൺമെൻറ് മെഡിക്കൽ കോളേജിലെ പൾമണറി മെഡിസിൻ വിഭാഗം പ്രൊഫെസ്സറാണ്.
ജനറൽ സെക്രട്ടറിയായി ഡോ. സജിത് വിളമ്പിൽ ഇനി മുതൽ ചുമതല വഹിക്കും. പത്തു വർഷത്തോളം സംഘടനയുടെ സംസ്ഥാന ട്രഷറർ ആയി പ്രവർത്തിച്ച ഇദ്ദേഹം തൃശൂർ ഗവൺമെൻ്റ് മെഡിക്കൽ കോളേജിലെ ട്രാൻസ്ഫ്യൂഷൻ മെഡിസിൻ വിഭാഗം പ്രൊഫെസ്സറാണ്.

ഡോ. സജിത് വിളമ്പിൽ

ഡോ. ഷെഫ്നയെ സംസ്ഥാന ട്രഷററായും, ഡോ. ഗോപകുമാർ ടി.യെ ബുള്ളറ്റിൻ എഡിറ്ററായും, ഡോ. എ അർജുനെ ഐ.ടി. സെക്രട്ടറിയായും യോഗം തെരഞ്ഞെടുത്തു. ഡോ. റോസ്‌നരാ ബീഗം, ഡോ. മോഹൻദാസ് എന്നിവർ സംസ്ഥാന വക്താക്കളായും പ്രവർത്തിക്കും. പുതിയ ഭാരവാഹികളെ തിരഞ്ഞെടുത്തതിനൊപ്പം സംഘടനയുടെ സുഗമമായ പ്രവർത്തനങ്ങൾക്കായി വിവിധ സമിതികളും യോഗത്തിൽ രൂപീകരിച്ചു. ശമ്പളപരിഷ്കരണ സമിതിയുടെ കൺവീനർ ആയി ഡോ. അരവിന്ദ് സി എസി നേയും മുഖ്യ ഉപദേഷ്ടാവായി ഡോ. ശ്രീകാന്ത് എസ് നേയും നിയമിച്ചു.

ക്ലിനിക്കൽ സംവിധാനങ്ങൾ, രോഗികളുടെ എണ്ണം, ഉപകരണങ്ങളുടെ ലഭ്യതയും അവയുടെ പരിപാലനവും, അക്കാദമിക്-ഗവേഷണ സൗകര്യങ്ങൾ, ജീവനക്കാരുടെ കുറവ്, തുടർ വികസനം, state-of -art സർവീസ് തുടങ്ങിയ വിഷയങ്ങളാണ് കൃത്യമായി പഠിക്കാനും സർക്കാരിനോട് ചേർന്ന് നിന്ന് വികസന പ്രവർത്തനങ്ങൾ ആസൂത്രണം ചെയ്യാനും തീരുമാനിച്ചത്. ലോകോത്തര നിലവാരത്തിലുള്ള ചികിത്സയും മെഡിക്കൽ വിദ്യാഭ്യാസവും നൽകുന്നതിനായി മെഡിക്കൽ കോളേജുകളെ സജ്ജമാക്കുന്നതിനു വേണ്ടി ആവിഷ്‌ക്കരിക്കേണ്ട മാറ്റങ്ങളെ കുറിച്ചും കെ.ജി.എം.സി.ടി.എ. മാർഗനിർദേശം നൽകും

മെഡിക്കൽ കോളേജ് ജീവനക്കാർക്ക് ഭയരഹിതമായി ജോലി ചെയ്യാനുള്ള സുരക്ഷിതമായ തൊഴിൽ അന്തരീക്ഷം ഉറപ്പാക്കുവാനും, സൗകര്യങ്ങളുടെ അപര്യാപ്തത മൂലം ഉണ്ടാവുന്ന ചികിത്സാ പിഴവുകൾ ഇല്ലാതാക്കുവാനും വേണ്ട തരത്തിലുള്ള സംവിധാനങ്ങൾ നടപ്പിലാക്കുന്നത് കെ.ജി.എം.സി.ടി.എ യുടെ ഈ വർഷത്തെ മുഖ്യ ലക്ഷ്യങ്ങളിൽ ഒന്നായിരിക്കും.

മെഡിക്കൽ കോളേജുകളുടെ ഗുണനിലവാരം ഉയർത്തുന്നതിനും ഡോക്ടർമാരുടെയും രോഗികളുടെയും അവകാശങ്ങൾ സംരക്ഷിക്കുന്നതിനും രോഗീ പരിചരണം ശക്തമാക്കുന്നതിനും അധ്യാപനം മെച്ചപ്പെടുത്തുന്നതിനും ഗവേഷണം ഊർജിതമാക്കുന്നതിനും വേണ്ടി ശക്തമായ തുടർനടപടികളുമായി കെ.ജി.എം.സി.ടി.എ മുന്നോട്ട് പോകുന്നതാണെന്ന് സംഘടന അറിയിച്ചു