3 ലക്ഷം രൂപ നൽകി പുതിയ കൊഡിയാക് ആർ‌എസ് എസ്‌യുവി  ബുക്ക് ചെയ്യാം

തിരുവനന്തപുരം:ചെക്ക് വാഹന നിർമ്മാതാക്കളായ സ്കോഡയുടെ ഏറ്റവും പുതിയ പെർഫോമൻസ് എസ്‌യുവിയായ പുതിയ കൊഡിയാക് ആർ‌എസ് ഇന്ത്യയിൽ ഔദ്യോഗികമായി അവതരിപ്പിച്ചു.ജൂൺ 22 മുതൽ ഈ വാഹനത്തിൻ്റെ ഔദ്യോഗിക ബുക്കിംഗ് ആരംഭിച്ചിട്ടുണ്ട്.സിബിയു റൂട്ട് വഴി പൂർണ്ണമായും വിദേശത്ത് നിർമ്മിച്ച് ഇന്ത്യയിലേക്ക് ഇറക്കുമതി ചെയ്യുന്ന ഈ എസ്‌യുവി, ആദ്യ ഘട്ടത്തിൽ ആകെ 50 യൂണിറ്റുകൾ മാത്രമായി പരിമിതപ്പെടുത്തിയിരിക്കുന്നു. 3 ലക്ഷം രൂപ നൽകി ഉപഭോക്താക്കൾക്ക് ഈ വാഹനം ബുക്ക് ചെയ്യാം. ഇതിൻ്റെ എക്സ്-ഷോറൂം വില ഏകദേശം 50 ലക്ഷം മുതൽ 60 ലക്ഷം രൂപ വരെയായിരിക്കും എന്ന് പ്രതീക്ഷിക്കുന്നു.

സ്കോഡ ഓട്ടോ ഇന്ത്യ പുതിയ കൊഡിയാക് ആർ‌എസുമായി ഉയര്‍ന്ന പ്രകടനശേഷിയുള്ള ആർ‌എസ് പോർട്ട്‌ഫോളിയോ വികസിപ്പിക്കാന്‍ ഒരുങ്ങുന്നു. 50 വർഷത്തിലേറെയായുള്ള ആർ‌എസ് പാരമ്പര്യവും 125 വർഷത്തിലധികമായുള്ള മോട്ടോർസ്‌പോർട്ട് പൈതൃകവും കെട്ടിപ്പടുക്കുന്ന ഈ ഏറ്റവും പുതിയ കൂട്ടിച്ചേർക്കൽ ബ്രാൻഡിൻ്റെ ഉയര്‍ന്ന പ്രകടനശേഷിയുള്ള ഡിഎൻ‌എയെ അടിവരയിടുന്നു.

സ്കോഡ ഓട്ടോ ഇന്ത്യയുടെ ബ്രാൻഡ് ഡയറക്ടർ ആശിഷ് ഗുപ്ത: “ആർ‌എസ് ബാഡ്ജ് 50 വർഷത്തിലേറെ പഴക്കമുള്ള ആഗോള പ്രകടന പാരമ്പര്യവും രണ്ട് പതിറ്റാണ്ടിലേറെ മുമ്പ് ഒക്ടാവിയ ആർ‌എസ് എത്തിയതിനുശേഷം ഇന്ത്യയിൽ ശക്തനായ ഒരു പിന്‍ഗാമിയെ അവതരിപ്പിക്കുന്നു. കഴിഞ്ഞ വർഷം പുറത്തിറക്കിയ ഏറ്റവും പുതിയ ഒക്ടാവിയ ആർ‌എസ് വെറും 20 മിനിറ്റിനുള്ളിൽ വിറ്റുതീർന്നു, ഇത് വാഹനപ്രേമികൾക്കിടയിൽ അതിന്‍റെ അത്യുന്നത സ്ഥാനം എടുത്തുകാണിക്കുന്നു. ഇപ്പോൾ, ഐക്കണിക് ആർ‌എസ് ബാഡ്ജ് ധരിക്കുന്ന ഇന്ത്യയിലെ ആദ്യത്തെ ഏഴ് സീറ്ററും രാജ്യത്ത് ഇതുവരെയുള്ളതിൽ വച്ച് ഏറ്റവും വേഗതയേറിയ സ്കോഡയുമായ കൊഡിയാക് ആർ‌എസുമായി ഞങ്ങൾ ആ പരമ്പരയെ മുന്നോട്ട് കൊണ്ടുപോകുന്നു. ഇത് പ്രകടനപ്രാപ്തി, സ്ഥലസൗകര്യം, 4×4 ശേഷി എന്നിവയെ ഞങ്ങളുടെ റേസിംഗ് ഡി‌എൻ‌എയുടെ സുധീരവും സുവ്യക്തവുമായ പ്രകടനവുമായി സംയോജിപ്പിക്കുന്നു”

കൊഡിയാക് ആർ‌എസ്: പ്രകടനശേഷിയുടെ കാതല്‍

റാലി സ്‌പോർട്ടിൻ്റെ ചുരുക്കപ്പേരായ ആർ‌എസ് ബാഡ്ജ്, സ്കോഡ ഓട്ടോയുടെ പെർഫോമൻസ് എഞ്ചിനീയറിങ്ങിനോടുള്ള പ്രതിബദ്ധതയുടെ പ്രതീകമാകുന്നു. ആഗോളതലത്തിൽ, ആർ‌എസ് മോഡലുകൾ ചലനാത്മകശേഷി, കൃത്യത, ആകർഷകമായ ഡ്രൈവിംഗ് അനുഭവം എന്നിവയുടെ പര്യായമാണ്. കൊഡിയാക് ആർ‌എസിനൊപ്പം, ഈ തത്ത്വചിന്ത ഇപ്പോൾ ഇന്ത്യയിലെ ആഡംബര എസ്‌യുവി വിഭാഗത്തിലേക്ക് ആവേശിക്കപ്പെടുന്നു, വൈവിധ്യമാർന്ന, എല്ലാവിധ ഭൂപ്രകൃതികള്‍ക്കും അനുയോജ്യമായ പാക്കേജിനുള്ളിൽ കൂടുതൽ കൃത്യതയുള്ളതും ആവേശകരവുമായ ഡ്രൈവ് നൽകുന്നു. കൊഡിയാക് ആർ‌എസ് അതിന്റെ തന്ത്രപരമായ വ്യത്യസ്തതയിലുള്ള ശ്രദ്ധയും പ്രതിഫലിപ്പിക്കുന്നതിലൂടെ, എല്ലാ പ്രതീക്ഷകള്‍ക്കും വേണ്ടി രൂപകൽപ്പന ചെയ്‌ത ഒരു എസ്‌യുവി അതിന്റെ പോർട്ട്‌ഫോളിയോയെ കൂടുതൽ ശക്തിപ്പെടുത്തുന്നു.

സ്കോഡയുടെ റേസിംഗ് ഡിഎൻഎ

ഒരു നൂറ്റാണ്ടിലേറെയായി സ്കോഡ ഓട്ടോയുടെ അവിഭാജ്യ ഭാഗമാണ് മോട്ടോർസ്പോർട്ട്. കൈലാഖ്, കുഷാഖ്, സ്ലാവിയ മുതൽ കൊഡിയാക്, പരിമിതമായ വോള്യമുള്ള ഒക്ടാവിയ ആർഎസ് വരെയുള്ള ബ്രാൻഡിൻ്റെ കാറുകളുടെ സമ്പൂർണ്ണ കൂട്ടം ‘ഒരു സർക്യൂട്ടിലെ ഏറ്റവും വേഗതയേറിയ മൾട്ടി-കാർ റിലേ’ എന്നതിനുള്ള ഇന്ത്യ-ഏഷ്യ ബുക്ക് ഓഫ് റെക്കോർഡ് നേടി. ഈ അഞ്ച് കാറുകളും ചേര്‍ന്ന് കോയമ്പത്തൂരിലെ CoASTT ട്രാക്കിൽ ഡ്രൈവർ മാറ്റ സമയങ്ങൾ ഉൾപ്പെടെ ആകെ 12:30.97 ലാപ്പ് സമയം രേഖപ്പെടുത്തി. തുടര്‍ന്ന്, ബ്രാൻഡ് അതിന്‍റെ ‘ഗ്രേറ്റസ്റ്റ് ഓൺ എ ട്രാക്ക് ഈസ് എ സ്കോഡ ഓൺ എ ട്രാക്ക്’ എന്ന കാമ്പെയ്‌നും ആരംഭിച്ചു.
റെഗുലർ കോഡിയാഖിനെക്കാൾ കരുത്തനായിരിക്കും ആർഎസ് പതിപ്പ്. 265 എച്ച്പി പവറും 400 എൻഎം ടോർക്കുമേകുന്ന 2.0 ലിറ്റർ ടിഎസ്ഐ എൻജിനാണ് കോഡിയാഖ് ആർഎസിൻ്റെ ഹൃദയം.ഓൾ വീൽ ഡ്രൈവ് സംവിധാനത്തിനൊപ്പം ഏഴ് സ്പീഡ് ഡ്യുവൽ ക്ലെച്ച് ഓട്ടോമാറ്റിക് സംവിധാനമായിരിക്കും ഇതിലെ ട്രാൻസ്മിഷൻ. 6.3 സെക്കന്റിൽ പൂജ്യത്തിൽനിന്ന് 100 കിലോമീറ്റർ വേഗത കൈവരിക്കുന്ന ഈ വാഹനത്തിന്റെ പരമാവധി വേഗം മണിക്കൂറിൽ 231 കിലോമീറ്ററാണ്.