കോട്ടയം:മുൻ ധനമന്ത്രിയും കേരളാ കോണ്‍ഗ്രസ് സ്ഥാപക നേതാക്കളിലൊരാളുമായ കെ.എം മാണിയുടെ പ്രശസ്തമായ ‘അധ്വാന വർഗ സിദ്ധാന്ത’ത്തിൽ മകനും കേരളാ കോണ്‍ഗ്രസ്(എം) അധ്യക്ഷനുമായ ജോസ് കെ മാണി എംപിയുടെ ഭാര്യ നിഷക്ക് ഡോക്ടറേറ്റ്.മഹാരാഷ്ട്ര, പൂനയിലെ ശ്രീ ബാലാജി യൂണിവേഴ്സിറ്റിയിൽ നിന്നും ഹ്യൂമൻ റിസോഴ്‌സ് മാനേജ്‌മെൻ്റിലാണ് പി എച്ച് ഡി ലഭിച്ചത്.

ജൻഡർ ബജറ്റിംഗിൻ്റെ സ്വാധീവും പഠനവിഷയമായിരുന്നു.സർക്കാർ ഇപ്പോള്‍ ബജറ്റിൽ 20 ശതാനത്തിലേറെ തുക സ്ത്രീ കേന്ദ്രീകൃത പദ്ധതികള്‍ക്കായി നീക്കവയ്ക്കുന്നുണ്ട്.ഇതിൻ്റെ വിനിയോഗം സ്ത്രീകള്‍ക്ക് എത്രമാത്രം ഗുണകരമാവുന്നു എന്നായിരുന്നു പഠനത്തിലെ ഒരു വിഷയം.

നിഷയും ജോസ് കെ മാണിയും

അധ്വാന വർഗത്തെക്കുറിച്ച് പറയുമ്പോഴും ഒഴിവാക്കപ്പെടുന്ന വീട്ടമ്മമാരെയും നിഷ ഈ പഠനത്തിൽ ഉള്‍പ്പെടുത്തി.
ഈ പഠനത്തിനിടയിലാണ് നിഷ കാൻസർബാധിതയായത്. രോഗലക്ഷണങ്ങള്‍ ഒന്നും ഉണ്ടായിരുന്നില്ല. എല്ലാ വര്‍ഷവും നടത്താറുള്ള മാമോഗ്രാം 2023ല്‍ നടത്തിയപ്പോഴാണ് സ്തനാര്‍ബുദം കണ്ടെത്തിയത്.കാന്‍സറിനെ തോല്‍പ്പിക്കുമെന്ന ഉറച്ച ആത്മവിശ്വാസം ഉണ്ടായിരുന്നതായി നിഷ ജോസ് പറഞ്ഞു. 2013 മുതല്‍ കാന്‍സര്‍ രോഗികളുടെ പുനരധിവാസവും ബോധവല്‍ക്കരണവുമായി സജീവമാണ് നിഷാ ജോസ്.
‘ഭര്‍ത്താവ് ജോസ് കെ മാണിയും കുട്ടികളും സഹോദരങ്ങളും വലിയ പിന്തുണയുമായി ഒപ്പമുണ്ടായിരുന്നതാണ് പിഎച്ച് ഡി നേടാനും കാൻസർ അതിജീവിക്കാനും സഹായകമായത് .ദൈവം തന്ന ഏറ്റവും വലിയ ഭാഗ്യമാണത്’-നിഷ ജോസ് പറഞ്ഞു.