കൊല്ലം:സമൃദ്ധി നെയ്യ്, മില്‍മ പ്ലസ് ഫ്ളേവേര്‍ഡ് മില്‍ക്ക് കാന്‍, മില്‍മ ഗീ ഹല്‍വ, മില്‍മ കാന്താരി മോര്, ബനാനബര്‍ഫി -ദേശീയ ക്ഷീരദിനത്തോടനുബന്ധിച്ച് മില്‍മ പുതിയതായി വിപണിയില്‍ ഇറക്കുന്ന ഉല്‍പന്നങ്ങളാണിവ.
നെയ്യിന്‍റെ നിറവും മണവും രുചിയും ഘടനയും നിലനിര്‍ത്തിക്കൊണ്ട് മഡ്ക ഗ്ലാസ് ബോട്ടിലില്‍ തയ്യാറാക്കിയിരിക്കുന്ന ഉല്‍പ്പന്നമാണ് സമൃദ്ധി നെയ്യ്.500 എംഎലിന് 480 രൂപയും 1000 എംഎലിന് 900 രൂപയുമാണ് .പ്രധാനമായും സൂപ്പര്‍ മാര്‍ക്കറ്റുകളും ഓണ്‍ലൈന്‍ പ്ലാറ്റ് ഫോമുകളും വഴി വിപണനം ചെയ്യാനാണ് ഉദ്ദേശിക്കുന്നതെന്ന് മില്‍മ ചെയര്‍മാന്‍ കെ.എസ് മണി അറിയിച്ചു.

മില്‍മ പുതിയതായി വിപണിയില്‍ ഇറക്കുന്ന പുതിയ ഉല്‍പന്നങ്ങളുടെ പ്രകാശനം മില്‍മ ചെയര്‍മാന്‍ കെ.എസ് മണി മില്‍മ എം.ഡി ആസിഫ് കെ യൂസഫിന് നല്‍കിക്കൊണ്ട് നിര്‍വ്വഹിക്കുന്നു. മില്‍മ തിരുവനന്തപുരം മേഖല യൂണിയന്‍ ചെയര്‍മാന്‍ മണി വിശ്വനാഥ്, എറണാകുളം മേഖല യൂണിയന്‍ ചെയര്‍മാന്‍ സി.എന്‍ വത്സലന്‍ പിള്ള, മില്‍മ മലബാര്‍ മേഖല യൂണിയന്‍ എം.ഡി കെ.സി ജെയിംസ്, തിരുവനന്തപുരം മേഖല യൂണിയന്‍ എം.ഡി രാരാരാജ് എന്നിവര്‍ സമീപം.

മില്‍മയുടെ ആലപ്പുഴ ഡെയറിയില്‍ നിന്നും വിപണനം ചെയ്യുന്ന ഉല്‍പ്പന്നമാണ് മില്‍മ പ്ലസ് ഫ്ളേവേര്‍ഡ് മില്‍ക്ക് കാന്‍.പാല്‍, ബദാം എന്നിവ ചേര്‍ത്ത് തയ്യാറാക്കുന്ന ഈ ഉല്‍പന്നം വിവിധ ഫ്ളേവറുകളില്‍ ലഭ്യമാണ്.പ്രിസര്‍വേറ്റീവുകളും ചേര്‍ക്കാതെ സ്റ്റെറിലൈസേഷന്‍ സാങ്കേതികവിദ്യ ഉപയോഗിച്ച് നിര്‍മ്മിക്കുന്ന ഇത് 9 മാസം വരെ കേടുകൂടാതെ ഇരിക്കും. നവീകരിച്ച ഡിസൈനില്‍ ചോക്ലേറ്റ്, ബദാം, വാനില, റോസ് എന്നീ ഫ്ളേവറുകളില്‍ ലഭ്യമാക്കിയിട്ടുള്ള ഇതിന്‍റെ വില 38 രൂപയാണ്.
മില്‍മ നെയ്യ് ഉപയോഗിച്ച് മലബാര്‍ മില്‍മ പുതുതായി വിപണിയിലിറക്കുന്ന ഉല്‍പന്നമാണ് മില്‍മ ഗീ ഹല്‍വ.കോഴിക്കോടന്‍ ഹല്‍വയുടെയും മില്‍മ നെയ്യിന്‍റെയും രുചിഭേദങ്ങള്‍ സംയോജിപ്പിച്ചുകൊണ്ട് പ്രീമിയം ബ്രാന്‍ഡായിട്ടാണ് ഇത് വിപണിയിലിറങ്ങുന്നത്. 450 ഗ്രാം പാക്കറ്റില്‍ ലഭ്യമാകുന്ന ഈ ഉല്‍പന്നത്തിന് 260 രൂപയാണ്.
മലബാര്‍ മില്‍മ തയ്യാറാക്കിയിട്ടുള്ള പ്രീമിയം ഉല്‍പ്പന്നമാണ് മില്‍മ കാന്താരി മോര്. മില്‍മ തൈര്, ഉപ്പ്, കാന്താരി മുളക് എന്നിവ ചേര്‍ത്ത് ആരോഗ്യപ്രദമായി തയ്യാറാക്കിയിട്ടുള്ള ഈ ഉല്‍പന്നത്തിന്‍റെ 700 എംഎല്‍ ബോട്ടിലിന് 50 രൂപയാണ്.
മില്‍മ നെയ്യും നേന്ത്രപ്പഴവും ശര്‍ക്കരയും ചേര്‍ത്ത് നിര്‍മ്മിച്ച ഉല്‍പ്പന്നമാണ് മില്‍മ ബനാന ബര്‍ഫി. ഈ ഉല്‍പന്നം 100 ഗ്രാം കാര്‍ട്ടണിലും, 250 ഗ്രാം പ്ലാസ്റ്റിക് കണ്ടെയിനറിലും ലഭ്യമാണ്. 100 ഗ്രാമിന് 70 രൂപയും 250 ഗ്രാമിന് 160 രൂപയുമാണ്.
ഗുണനിലവാരത്തില്‍ വിട്ടുവീഴ്ച ചെയ്യാതെ ആകര്‍ഷകവും ലോകോത്തരവുമായ പാക്കേജിംഗിലൂടെ മറ്റ് ബഹുരാഷ്ട്ര കമ്പനികളുമായി മത്സരിക്കാന്‍ കഴിയുന്ന അന്താരാഷ്ട്ര ബ്രാന്‍ഡായി മില്‍മയെ പുനഃസ്ഥാപിക്കുന്നതിനുള്ള ശ്രമങ്ങളുടെ ഭാഗമാണ് പുതുതായി പുറത്തിറക്കിയ ഉല്‍പ്പന്നങ്ങളെന്ന് കെ.എസ്.മണി പറഞ്ഞു.