‘പ്രളയ്’ആദ്യ ഹിന്ദിചിത്രം

മുംബയ്:മലയാള സിനിമയിലെ എക്കാലത്തെയും ഏറ്റവും വലിയ ഹിറ്റായ ‘ലോക: ചാപ്റ്റർ1, ചന്ദ്ര’യിലൂടെ ചരിത്രം സൃഷ്ടിച്ച തെന്നിന്ത്യൻ നായിക കല്ല്യാണി പ്രിയദർശൻ ബോളിവുഡ് അരങ്ങേറ്റത്തിനൊരുങ്ങുന്നതായി വാർത്ത.
രൺവീർ സിംഗ് നായകനാകുന്ന ‘പ്രളയ്’ എന്ന ചിത്രത്തിലെ നായികയായാണ് കല്ല്യാണി ബോളിവുഡ്ഢിലെത്തുന്നതെന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.

കല്ല്യാണി പ്രിയദർശൻ

രൺവീർ സിംഗിന്‍റെ പുതിയ നിർമ്മാണ കമ്പനിയായ മാ കസം ഫിലിംസിൻ്റെ ബാനറിൽ നിർമ്മിക്കുന്ന ചിത്രം സംവിധാനം ചെയ്യുന്നത് നവാഗതനായ ജയ് മേത്തയാണ്. പ്രശസ്ത സംവിധായകൻ ഹൻസൽ മേത്തയുടെ മകനാണ് ജയ്.മുംബൈ നഗരത്തിന്‍റെ തകർച്ചയാണ് പ്രളയിൻ്റെ പ്രമേയമെന്നാണ് സൂചന.എഐ സാങ്കേതികവിദ്യ ഉപയോഗിച്ച് നിർമ്മിക്കുന്ന സെറ്റുകളും ഉപേക്ഷിക്കപ്പെട്ട നഗര ദൃശ്യങ്ങളും സിനിമയുടെ ഹൈലൈറ്റുകളായിരിക്കുമെന്നാണ് പ്രചാരണം.
ഏപ്രിലിൽ പ്രീ-പ്രൊഡക്ഷൻ ആരംഭിക്കാനാണ് പദ്ധതി. ജൂലൈ–ഓഗസ്റ്റ് മാസങ്ങളിൽ ചിത്രീകരണം തുടങ്ങുമെന്നാണ് കരുതുന്നത്. ഔദ്യോഗിക പ്രഖ്യാപനം ഉടനുണ്ടാകുമെന്നാണ് വിവരം.