ശനി, തിങ്കൾ ദിവസങ്ങളിൽ ഊട്ടി–മേട്ടുപ്പാളയം റൂട്ടിൽ പ്രത്യേക സർവീസ്

ഊട്ടി:വേനലവധിക്കാലത്ത് ഊട്ടി പൈതൃക ട്രെയിൻ പ്രത്യേക സർവീസ് ആരംഭിച്ചു കഴിഞ്ഞെന്നു സതേൺ റെയിൽവേ . ജൂലൈ 6 വരെയുള്ള വെള്ളി, ശനി, ഞായർ, തിങ്കൾ ദിവസങ്ങളിലാണു പ്രത്യേക സർവീസ്. വെള്ളി, ഞായർ ദിവസങ്ങളിൽ മേട്ടുപ്പാളയം–ഊട്ടി റൂട്ടിലും ശനി, തിങ്കൾ ദിവസങ്ങളിൽ ഊട്ടി–മേട്ടുപ്പാളയം റൂട്ടിലുമാണു പ്രത്യേക സർവീസുകൾ നടത്തുക.

രാവിലെ 9.10 ന് മേട്ടുപ്പാളയത്തു നിന്നു പുറപ്പെടുന്ന ട്രെയിൻ 2.25ന് ഊട്ടിയിൽ എത്തും. ഊട്ടിയിൽ നിന്നു 11.25ന് യാത്ര തുടങ്ങുന്ന ട്രെയിൻ 4.20ന് മേട്ടുപ്പാളയത്തെത്തും. കൂടാതെ ഊട്ടി – കേത്തി – ഊട്ടി 3 സർവീസുകളും ഈ ദിവസങ്ങളിൽ നടത്തും. ദിവസേന രാവിലെ 7ന് മേട്ടുപ്പാളയത്തു നിന്ന് ഊട്ടിയിലേക്കും ഉച്ചയ്ക്കു 2ന് ഊട്ടിയിൽ നിന്നു മേട്ടുപ്പാളയത്തേക്കും ഉള്ള സർവീസുകൾ തുടരും. കൂനൂർ- ഊട്ടി ദിവസേന 4 സർവീസുകളുമുണ്ട്

റഗുലർ ട്രെയിനിൽ ഊട്ടിയിൽനിന്ന് മേട്ടുപ്പാളയം പോകാൻ ഫസ്റ്റ് ക്ലാസിന് 600 രൂപയും സെക്കന്‍ഡിന് 295 രൂപയുമാണ് നിരക്ക്.സ്പെഷ്യൽ ട്രെയിനിന്‍ 150 രൂപ മുതൽ 1495 രൂപ വരെ വ്യത്യസ്ത നിരക്കുകളിലുള്ള ടിക്കറ്റുകൾ ലഭ്യമാണ്.ഊട്ടി-കൂനൂർ റൂട്ടിൽ സെക്കൻ്റ് ക്ലാസിന് 150 മുതൽ 365 രൂപ വരെയും ഫസ്റ്റ് ക്ലാസിന് 350 രൂപ മുതൽ 525 രൂപവരെയും ടിക്കറ്റിന് നൽകണം.ഐആർസിടിസി വെബ് സൈറ്റിലൂടെയും റെയിൽ ആപ് മുഖേനയും ടിക്കറ്റെടുക്കാം.റെയിൽവേ സ്റ്റേഷനുകളിലും ടിക്കറ്റ് ലഭ്യമാണ്.