നവരാത്രി സാംസ്കാരിക പരിപാടികളിലേക്ക് ഗംഗയ്ക്ക് പ്രത്യേക ക്ഷണം

തിരുവനന്തപുരം:വയലിൻ്റെ മായികലോകത്ത് അത്ഭുതങ്ങൾ സൃഷ്ടിച്ച് ശ്രദ്ധേയയായ ബാലപ്രതിഭ കുമാരി ഗംഗ ശശിധരൻയും ഗംഗാ തരംഗം ടീമും മുൻ ചീഫ് സെക്രട്ടറിയും, തിരുവിതാംകൂർ ദേവസ്വം ബോർഡ് പ്രസിഡന്‍റും കവിയും  ഗാനരചയിതവുമായ കെ. ജയകുമാറിനെ ദേവസ്വം ബോർഡ് ആസ്ഥാനത്ത് സന്ദർശിച്ചു.
കെ. ജയകുമാർ രചിച്ചസിനിമയിലെ ഭക്തിഗാനങ്ങൾ ഗംഗയും സംഘവും അദ്ദേഹത്തിനായി സംഗീതാർച്ചനയായി അവതരിപ്പിച്ചു. ഗംഗയുടെ വയലിനിൽ നിന്ന് ഒഴുകിയെത്തിയ ഗാനങ്ങൾ ഏറെ ശ്രദ്ധയോടെയും ആസ്വാദനത്തോടെയും കേട്ടിരുന്ന കെ. ജയകുമാർ, താൻ രചിച്ച കവിതകളും ഗാനങ്ങളും പുതുമയാർന്ന സംഗീതാവിഷ്കാരമായി പുനർജന്മം പ്രാപിക്കുന്നത് കാണുന്നതിൽ അതിയായ സന്തോഷവും സംതൃപ്തിയും രേഖപ്പെടുത്തി.

തിരുവിതാംകൂർ ദേവസ്വം ബോർഡ് പ്രസിഡന്‍റും കവിയും ഗാനരചയിതവുമായ കെ. ജയകുമാർ ഗംഗയ്ക്ക് പൊന്നാട ചാർത്തുന്നു

ഗംഗയ്ക്ക് സംഗീതസഹായവുമായി ഗംഗാ തരംഗം ടീമിലെ അംഗങ്ങളായ തൃപ്പൂണിത്തുറ ശ്രീകുമാർ, മാഞ്ഞൂർ ഉണ്ണികൃഷ്ണൻ, വിജയകുമാർ വൈക്കം, ആകാശ് കൃഷ്ണ എന്നിവർ വിവിധ സംഗീതോപകരണങ്ങളുമായി പങ്കുചേർന്നു.
ദേവസ്വം ബോർഡ് സംസ്ഥാന കാര്യാലയത്തിലെ നവരാത്രി സാംസ്കാരിക പരിപാടികളുമായി ബന്ധപ്പെട്ട് ഗംഗയ്ക്ക് പ്രത്യേക ക്ഷണവും ലഭിച്ചു. ചടങ്ങിനിടെ കെ. ജയകുമാർ ഗംഗയെ പൊന്നാട അണിയിച്ച് ആദരിച്ചതിനു പുറമെ പുസ്തകങ്ങൾ, ഡയറി, ഉപഹാരങ്ങൾ എന്നിവയും സമ്മാനിച്ചു. ഗംഗയുടെ സംഗീത പ്രതിഭയെ പ്രശംസിച്ച അദ്ദേഹം, കലാരംഗത്ത് കൂടുതൽ ഉയരങ്ങൾ കീഴടക്കാൻ ആശംസകൾ നേർന്നു.