സംവിധായകൻ മിഷ്കിൻ നടി സ്വാസികയുടെ അഭിനയത്തെ പ്രശംസിച്ച് അവരുടെ കാൽതൊട്ട് വണങ്ങിയത് വാർത്തകളിൽ ഇടം നേടി

ചെന്നൈ:തമിഴിൽ തരംഗമാവുമെന്ന സൂചനയിൽ ‘നൂറു സാമി’. ജൂൺ 19-ന് തിയേറ്ററുകളിൽ റിലീസ് ചെയ്യുന്ന ഒരു തമിഴ് കുടുംബ പശ്ചാത്തലത്തിലുള്ള ഡ്രാമ ചിത്രമാണിത്.വിജയ് ആൻ്റണിയെ നായകനാക്കി ‘പിച്ചൈക്കാരൻ’ എന്ന സൂപ്പർഹിറ്റ് ചിത്രം ഒരുക്കിയ സംവിധായകൻ ശശിയാണ് ‘നൂറു സാമി’യുടേയും സംവിധായകൻ.
വിജയ് ആന്‍റണി, സ്വാസിക, അജയ് ധിഷൻ, ലിജോ മോൾ, കാവ്യ അനിൽ, അരുൾദോസ് എന്നിവരാണ് പ്രധാന അഭിനേതാക്കൾ.

സംഗീതം: ബാലാജി ശ്രീറാം.നിർമ്മാണം: വിജയ് ആന്‍റണി ഫിലിം കോർപ്പറേഷൻ, സർവന്ത് രാം ക്രിയേഷൻസ്.
ഒരു യാഥാസ്ഥിതിക ഗ്രാമത്തിൽ തൻ്റെ രണ്ട് ആൺമക്കളെ വളർത്താൻ ജീവിതം സമർപ്പിക്കുന്ന സെൽവി എന്ന വിധവയായ അമ്മയുടെയും മകന്‍റെയും വൈകാരികമായ ബന്ധത്തിന്‍റെ കഥയാണ് ചിത്രം പറയുന്നത്. വർഷങ്ങൾക്ക് ശേഷം ദീർഘകാലമായുള്ള ആചാരങ്ങളെയും പാരമ്പര്യങ്ങളെയും വെല്ലുവിളിച്ചുകൊണ്ട് അവളുടെ പൂർത്തീകരിക്കപ്പെടാത്ത സ്വപ്നങ്ങൾ വീണ്ടും ഉയർന്നുവരുന്നതാണ് ചിത്രത്തിന്‍റെ പ്രധാന പശ്ചാത്തലം.

ഈ ചിത്രത്തിന്‍റെ പ്രീ-റിലീസ് ചടങ്ങിനിടെ പ്രശസ്ത തമിഴ് സംവിധായകൻ മിഷ്കിൻ, നടി സ്വാസികയുടെ അഭിനയത്തെ പ്രശംസിച്ചുകൊണ്ട് വേദിയിൽ വെച്ച് അവരുടെ കാൽതൊട്ട് വണങ്ങിയത് വലിയ രീതിയിൽ വാർത്തകളിൽ ഇടം നേടിയിരുന്നു. സ്വാസിക തന്‍റെ കരിയറിലെ ഏറ്റവും മികച്ച പ്രകടനമാണ് ഈ ചിത്രത്തിൽ കാഴ്ചവെച്ചിരിക്കുന്നത് എന്നാണ് അണിയറപ്രവർത്തകർ നൽകുന്ന സൂചന