13 വർഷത്തിനു ശേഷം മമ്മൂട്ടിയും ധനുഷും ഒരുമിക്കുന്നു

ചെന്നൈ:മലയാളത്തിന്‍റെ മെഗാസ്റ്റാർ മമ്മൂട്ടിയും തമിഴ് സൂപ്പർസ്റ്റാർ ധനുഷും ഒരുമിച്ച് അഭിനയിക്കുന്ന പുതിയ ബിഗ് ബജറ്റ് തമിഴ് ചിത്രത്തിന്റെ പേര് ‘ഓം’ എന്ന് ഔദ്യോഗികമായി പ്രഖ്യാപിച്ചു. തമിഴിൽ ധനുഷിൻ്റെ 55-ാമത്തെ ചിത്രമായ ഇത്, ‘അമരൻ’ എന്ന സൂപ്പർഹിറ്റ് സിനിമയ്ക്ക് ശേഷം രാജ്കുമാർ പെരിയസാമിയാണ് സംവിധാനം ചെയ്യുന്നത്.
ഓമിൽ സായി പല്ലവിയും ശ്രീ ലീലയുമാണ് നായികമാർ. ഇന്ദ്രൻസാണ് മറ്റൊരു പ്രധാന താരം. സായ് അഭ്യങ്കറിൻ്റേതാണ് സംഗീതം. ധനുഷിൻ്റെ വണ്ടർബാർ ഫിലിംസും ആർടേക്ക് സ്റ്റുഡിയോസും ചേർന്ന് നിർമ്മിക്കുന്ന ചിത്രത്തെക്കുറിച്ചുള്ള ആരാധകരുടെ ആവേശം വർദ്ധിപ്പിച്ച് നിർമ്മാതാക്കൾ ചിത്രത്തിന്‍റെ ഔദ്യോഗിക ടൈറ്റിൽ പ്രഖ്യാപനത്തിന് മുന്നോടിയായി പുറത്തിറക്കിയ പ്രൊമോ വീഡിയോ ഇതിനകം മൂന്ന് ലക്ഷത്തിലധികം പേരാണ് കണ്ടത്. ഈ വീഡിയോ ഇതിനകം ആരാധകർക്കിടയിൽ വലിയ ചർച്ചകൾക്ക് വഴിവെച്ചിരിക്കുകയാണ്.
2013-ൽ പുറത്തിറങ്ങിയ മമ്മൂട്ടി ചിത്രം ‘കമ്മത്ത് ആൻഡ് കമ്മത്ത്’ എന്ന സിനിമയിൽ ധനുഷ് ഒരു അതിഥി വേഷത്തിൽ എത്തിയിരുന്നു. എന്നാൽ,13 വർഷത്തിനു ശേഷം ഇതാദ്യമായാണ് ഇരുവരും പൂർണ്ണ നീളമുള്ള പ്രധാന കഥാപാത്രങ്ങളായി ഒരുമിച്ച് ഒരു തമിഴ് സ്ക്രീനിൽ ഒന്നിക്കുന്നത്.
ധനുഷിനൊപ്പം മെഗാസ്റ്റാർ മമ്മൂട്ടിയും ഓമിൽ തുല്യ പ്രാധാന്യമുള്ളകഥാപാത്രത്തെ അവതരിപ്പിക്കുന്നു. മമ്മൂട്ടി ചിത്രത്തിൽ ഒരു പോലീസ് ഓഫീസറുടെ വേഷത്തിലാണ് എത്തുന്നതെന്നാണ് റിപ്പോർട്ടുകൾ.ചിത്രം ഒക്ടോബർ 16-ന് തിയേറ്ററുകളിൽ എത്തുമെന്നാണ് അണിയറപ്രവർത്തകർ അറിയിച്ചിരിക്കുന്നത്. ഒപ്പം ചിത്രത്തിന്‍റെ ഒടിടി അവകാശങ്ങൾ നെറ്റ്ഫ്ലിക്സ് സ്വന്തമാക്കിക്കഴിഞ്ഞു