ജെൻറോബോട്ടിക് ഇന്നൊവേഷൻസാണ് പദ്ധതിക്കായി ബാൻഡിക്കൂട്ട് സ്‌കാവഞ്ചിംഗ് റോബോട്ടുകൾ ലഭ്യമാക്കുന്നത്
തിരുവനന്തപുരം :ഇന്ത്യൻ നിർമ്മിത റോബോട്ടുകളുപയോഗിച്ച് രാജ്യത്തെ ഏറ്റവും വലിയ റോബോട്ടിക് സീവേജ് ശുചീകരണ പദ്ധതികളിലൊന്ന് നടപ്പാക്കാനൊരുങ്ങി കേന്ദ്ര ആരോഗ്യ കുടുംബക്ഷേമ മന്ത്രാലയത്തിന് കീഴിലുള്ള പൊതുമേഖലാ സ്ഥാപനമായ എച്ച്എൽഎൽ ലൈഫ്‌കെയർ ലിമിറ്റഡ് (എച്ച്എൽഎൽ).
സ്ഥാപനത്തിന്‍റെ സസ്‌റ്റൈനബിൾ പ്രോജക്ട്സ് ഡിവിഷനാണ് മഹാരാഷ്ട്ര സർക്കാരിനു കീഴിലുള്ള മഹാത്മാ ഫൂലെ ബാക്ക്‌വേർഡ് ക്ലാസ് ഡെവലപ്‌മെന്റ് കോർപ്പറേഷൻ ലിമിറ്റഡുമായി ഇതിനായി കരാറിലെത്തി.
പദ്ധതിയുടെ ഭാഗമായി ബാൻഡിക്കൂട്ട് പരമ്പരയിലുള്ള 100 റോബോട്ടുകളെ മഹാരാഷ്ട്രയിലെ മുനിസിപ്പാലിറ്റികളിലുള്ള മാൻഹോളുകൾ വൃത്തിയാക്കാൻ വിതരണം ചെയ്യും. ഇതോടെ സംസ്ഥാനത്തെ സീവേജ് ശൃംഖലയിലെ മാൻഹോളുകളിൽ മനുഷ്യർ നേരിട്ടിറങ്ങി വൃത്തിയാക്കുന്ന രീതി ഒഴിവാക്കാനാകും.ജെൻറോബോട്ടിക് ഇന്നൊവേഷൻസാണ് പദ്ധതിക്കായി ബാൻഡിക്കൂട്ട് സ്‌കാവഞ്ചിംഗ് റോബോട്ടുകൾ ലഭ്യമാക്കുന്നത്.
ഇതുസംബന്ധിച്ച കരാറിൽ എച്ച്എൽഎൽ സസ്‌റ്റൈനബിൾ പ്രോജക്ട്സ് ഡിവിഷൻ ഡെപ്യൂട്ടി വൈസ് പ്രസിഡന്‍റ് ഡോ നിരീഷ് പി.എച്ചും എംപിബിസിഡിസിക്കു വേണ്ടി മാനേജിംഗ് ഡയറക്ടർ റുചേഷ് ജയ്‌വംശി ഐഎഎസും ഒപ്പുവച്ചു. ജെൻറോബോട്ടിക്സിന്റെയും എംപിബിസിഡിസിയുടെയും പ്രതിനിധികൾ ചടങ്ങിൽ പങ്കെടുത്തു.
അടിയന്തര സാഹചര്യങ്ങളിൽ വേഗത്തിൽ ഇടപെടാനും സംസ്ഥാനത്തെ സീവേജ് ശൃംഖലയുടെ പരിപാലനം കൂടുതൽ കാര്യക്ഷമമാക്കാനും ഈ പദ്ധതിയിലൂടെ സാധിക്കും. തൊഴിലാളികളുടെ സുരക്ഷയും തൊഴിൽ അന്തസ്സും ഉറപ്പാക്കുക കൂടിയാണ് പദ്ധതിയുടെ ലക്ഷ്യം. പൊതുജനാരോഗ്യ മേഖലയിലും ശുചിത്വപദ്ധതികളിലും എന്നും സർക്കാരുകളുടെ വിശ്വസ്ത പങ്കാളിയാണ് എച്ച്എൽഎൽ. സംസ്ഥാനത്തെ മാൻഹോൾ ശുചീകരണ സംവിധാനം ആധുനികവൽക്കരിക്കാനുള്ള മഹാരാഷ്ട്ര സർക്കാരിൻ്റെ ശ്രമങ്ങൾക്ക് ഈ കരാറിലൂടെ എച്ച്എൽഎൽ കൂടുതൽ കരുത്തുപകരും. മറ്റു സംസ്ഥാനങ്ങൾക്കും അനുകരണീയമായ മാതൃകയാണ് ഈ പദ്ധതിയെന്ന് അധികൃതർ ചൂണ്ടിക്കാട്ടി.