ഷോയിൽ പങ്കെടുക്കാൻ പോകുന്നതിനിടെ മേക്കപ്പ് ബാഗ് എടുക്കാൻ മറന്നുപോയ കലാഭവൻ ഷാജോണിൻ്റെ അനുഭവം
കൊച്ചി:മോഹൻലാലിനൊപ്പം ഒരു ഷോയിൽ പങ്കെടുക്കാൻ പോയപ്പോഴുണ്ടായ മറക്കാനാകാത്ത അനുഭവം പങ്കുവച്ച് കലാഭവൻ ഷാജോൺ. ഷോയിൽ പങ്കെടുക്കാൻ പോകുന്നതിനിടെ മേക്കപ്പ് ബാഗ് എടുക്കാൻ മറന്നുപോയതോടെയാണ് രസകരമായ സംഭവത്തിന് തുടക്കമായതെന്ന് ഷാജോൺ സോഷ്യൽ മീഡിയയിൽ കുറിച്ചു.
ഷോ നടക്കുന്ന സ്ഥലത്തെത്തിയപ്പോഴാണ് മേക്കപ്പ് ബാഗ് കൊണ്ടുവരാൻ മറന്ന കാര്യം ഷാജോൺ ഓർത്തത്. എന്ത് ചെയ്യുമെന്നറിയാതെ സ്റ്റേജിന്‍റെ പുറകിൽ നിൽക്കുന്നതിനിടെ മോഹൻലാലിന്‍റെ പേഴ്സണൽ അസിസ്റ്റന്‍റായ വിജീഷിനെ കാണുകയും കാര്യം പറയുകയും ചെയ്തു. തുടർന്ന് മേക്കപ്പ് ചെയ്യാനുള്ള സാധനങ്ങൾ ഒന്ന് സഹായിക്കാമോ എന്ന് വിജീഷിനോട് ചോദിച്ചു.
കുറച്ചുസമയത്തിന് ശേഷം വിജീഷ് വന്ന് ഷാജോണിനെ വിളിച്ചു. ഗ്രീൻ റൂമിലേക്ക് ചെന്നപ്പോൾ മോഹൻലാൽ മേക്കപ്പ് ചെയ്തുകൊണ്ടിരിക്കുകയായിരുന്നു.
‘ഇങ്ങോട്ട് വാ മോനേ, നിനക്ക് ഞാൻ മേക്കപ്പ് ചെയ്ത് തരാം’ – മോഹൻലാൽ പറഞ്ഞതോടെ ഷാജോൺ അക്ഷരാർഥത്തിൽ ഞെട്ടിപ്പോയി.
ഇത്രയും വലിയ ഭാഗ്യമാണെന്ന് അറിഞ്ഞിട്ടും ആദ്യം ഷാജോൺ വേണ്ടെന്ന് പറഞ്ഞെങ്കിലും മോഹൻലാൽ നിർബന്ധിച്ച് പിടിച്ചിരുത്തി മേക്കപ്പ് ചെയ്ത് നൽകുകയായിരുന്നു.
‘താങ്ക്യൂ സോ മച്ച് ലാലേട്ടാ..’ എന്ന കുറിപ്പോടെയാണ് ഷാജോൺ ഈ മനോഹരമായ അനുഭവം പങ്കുവച്ചത്. ഒപ്പം പിന്തുണ നൽകിയതിനും ചിത്രങ്ങൾ പകർത്തിയതിനും വിജീഷിനും നന്ദി അറിയിച്ചിട്ടുണ്ട്.