അറുന്നൂറോളം പേരിൽനിന്ന് തെരഞ്ഞെടുത്ത 25 ഫൈനലിസ്റ്റുകള്‍ മാറ്റുരയ്ക്കും

തിരുവനന്തപുരം :ഐ ടി മേഖലയിലെ സാംസ്കാരിക പ്രൗഢിയും സര്‍ഗ്ഗാത്മകതയും ഒത്തുചേരുന്ന സൗന്ദര്യ-പ്രതിഭാ മത്സരമായ ‘ മലയാളി മങ്ക- കേരള ശ്രീമാന്‍ (എംഎംകെഎസ്)’ ഗ്രാന്‍ഡ് ഫിനാലെയ്ക്ക് നവംബര്‍ ഒന്നിന് ടെക്നോപാര്‍ക്ക് വേദിയാകും.

ഐടി ജീവനക്കാര്‍ക്കായി ഉച്ചയ്ക്ക് 2 മണി മുതല്‍ വൈകുന്നേരം 6 മണി വരെ ടെക്നോപാര്‍ക്ക് ഫേസ് 1-ലെ ട്രാവന്‍കൂര്‍ ഹാളിലാണ് മത്സരം . കേരളത്തനിമയും പാരമ്പര്യവും സംസ്കാരവും ക്രിയാത്മകതയും ഐടി ജീവനക്കാരുടെ വ്യക്തിത്വവും ആഘോഷമാക്കുന്ന മത്സരത്തിന്‍റെ 11-ാം പതിപ്പാണിത്. ഐടി ജീവനക്കാരുടെ ഓണ്‍ലൈന്‍ മാധ്യമ കൂട്ടായ്മയായ ‘ടെക്നോപാര്‍ക്ക് ടുഡേ’ ആണ് സംഘാടകര്‍.

ടെക്നോപാര്‍ക്ക് തിരുവനന്തപുരം, ഇന്‍ഫോപാര്‍ക്ക് കൊച്ചി, സൈബര്‍പാര്‍ക്ക് കോഴിക്കോട് തുടങ്ങി കേരളത്തിലെ പ്രധാന ഐടി പാര്‍ക്കുകളില്‍ നിന്നായി അറുന്നൂറോളം പേരാണ് ഇത്തവണത്തെ മത്സരത്തില്‍ പങ്കെടുത്തത്. മൂന്ന് ഘട്ടങ്ങളിലായി നടന്ന സ്ക്രീനിംഗിനും തെരഞ്ഞെടുപ്പുകള്‍ക്കും ശേഷമാണ് 25 പേര്‍ അവസാന റൗണ്ടിലേക്ക് യോഗ്യത നേടിയത്. ഈ ഫൈനലിസ്റ്റുകളാണ് നവംബര്‍ ഒന്നിന് മലയാളി മങ്ക, കേരള ശ്രീമാന്‍ 2026 കിരീടങ്ങള്‍ക്കായി മാറ്റുരയ്ക്കുന്നത്.

ബെസ്റ്റ് മലയാളം (മികച്ച ഭാഷാശേഷി), ബെസ്റ്റ് ഔട്ട്ഫിറ്റ് (മികച്ച വസ്ത്രധാരണം), ബെസ്റ്റ് ക്രിയേറ്റര്‍ (മികച്ച സര്‍ഗാത്മക അവതരണം) തുടങ്ങി വിവിധ സബ് ടൈറ്റില്‍ പുരസ്കാരങ്ങളും വിജയികളെ കാത്തിരിക്കുന്നു.

വര്‍ഷങ്ങളായി കേരളത്തിലെ ഐടി സമൂഹത്തിന്‍റെ പ്രമുഖ സാംസ്കാരിക വേദി കൂടിയായി മാറിയ മലയാളി മങ്ക – കേരള ശ്രീമാന്‍ മത്സരം, ജോലിത്തിരക്കുകള്‍ക്കിടയിലും ഐടി ജീവനക്കാരുടെ സര്‍ഗ്ഗാത്മകതയും കേരളീയ വ്യക്തിത്വവും പ്രകടിപ്പിക്കാനുള്ള മികച്ച അവസരം ഒരുക്കുന്നതായി സംഘാടകർ അറിയിച്ചു