ശാരീരിക അസ്വാസ്‌ഥ്യം ആർ.ശ്രീലേഖയെ അലട്ടുന്നത് ചുമതല വേണ്ടവണ്ണം നിർവ്വഹിക്കാൻ കഴിയില്ലേ എന്ന ചിന്ത യും ഉത്കണ്ടയും ഉണ്ടാക്കിയെന്ന് ബിജെപി സംസ്ഥാന ജനറൽ സെക്രട്ടറി എസ്.സുരേഷ്

തിരുവനന്തപുരം:റിട്ട.ഡിജിപിയും ശാസ്തമംഗലത്തെ ബിജെപി കൌൺസിലറുമായ ആർ.ശ്രീലേഖയുടെ രാജിഭീഷണി മുതിർന്ന നേതാക്കൾ ഇടപെട്ട് കോംപ്ളിമെൻ്റ്സാക്കി.ബിജെപി സംസ്ഥാന പ്രസിഡൻ്റ് രാജീവ് ചന്ദ്രശേഖർ നേരിട്ട് ഇടപെട്ട് നടത്തിയ ‘രക്ഷാപ്രവർത്തനം’ഫലിച്ചതായാണ് വിവരം. കൌൺസിലർ സ്ഥാനത്തുനിന്ന് താൻ രാജിവച്ചതായി ശ്രീലേഖതന്നെയാണ് ശാസ്തമംഗലത്തെ വാട്സാപ് ഗ്രൂപ്പിലൂടെ പുറത്തുവിട്ടത്.മേയർക്ക് രാജിക്കത്ത് സമർപ്പിച്ചതായും ജില്ലാ കലക്ടർക്ക് തിങ്കളാഴ്ച നൽകുമെന്നും അവർ അതിൽ അറിയിച്ചിരുന്നു.രാജിക്കത്ത് നഗരസഭാ സെക്രട്ടറിക്ക് നേരിൽ സമർപ്പിക്കണമെന്നിരിക്കേ അത് ചെയ്യാത്തത് വിലപേശൽ തന്ത്രത്തിൻ്റെ ഭാഗമാണെന്ന് ആക്ഷേപമുയർന്നിരുന്നു.അത് ശരിവയ്ക്കും വിധമാണ് വാർത്തകൾ പുറത്തുവന്നിട്ടുള്ളത്.രാജി ഉണ്ടായാൽ 101 അംഗ കൌൺസിലിൽ 50 അംഗങ്ങളുള്ള ബി.ജെ.പിക്ക് ഭരണം മുന്നോട്ട് കൊണ്ടുപോവുക പ്രയാസമാവുമായിരുന്നു.മേയർ സ്ഥാനം പ്രതീക്ഷിച്ച ശ്രീലേഖ അത് കിട്ടാതെ വന്നപ്പോഴുള്ള അതൃപ്തി പലതവണ പ്രകടിപ്പിച്ചിരുന്നു.പുതിയ സ്ഥാനമാനങ്ങൾക്കായുള്ള സമ്മർദമാണ് രാജിഭീഷണിക്ക് കാരണമെന്നാണ് ബിജെപിയിലെതന്നെ ഒരുവിഭാഗത്തിൻ്റെ വിലയിരുത്തൽ.

എസ്.സുരേഷ്

ബിജെപി സംസ്ഥാന ജനറൽ സെക്രട്ടറി എസ്.സുരേഷിൻ്റെ ഫെയ്സ്ബുക് പോസ്റ്റ് വായിക്കാം:
‘ശ്രീലേഖ ചേച്ചിയെ ആശുപത്രിയിൽ സന്ദർശിച്ചു.. കുറച്ചു ദിവസങ്ങളായി ശാരീരിക അസ്വാസ്‌ഥ്യം അവരെ അലട്ടുന്നു. അതുകാരണം ജനപ്രതിനിധി എന്ന നിലയിലുള്ള ചുമതല വേണ്ടവണ്ണം നിർവ്വഹിക്കാൻ കഴിയില്ലേ എന്ന ചിന്ത യും ഉത്കണ്ടയും ഉണ്ട്, അത് ഏറ്റവും വേണ്ടപ്പെട്ടവരുടെ ശ്രദ്ധയിൽപ്പെടുത്തി എന്നു മാത്രം, ദൗർഭാഗ്യവശാൽ അത് മാധ്യമ ചർച്ചക്ക് കാരണമായി. R.ശ്രീലേഖ രാജിവച്ചു എന്ന വാർത്ത ശരിയല്ല.
അവർ മറ്റു രാഷ്ട്രീയപാർട്ടികളിൽ ചേർന്നേക്കും, എന്തോ പോസ്റ്റ് കിട്ടാത്തതുകൊണ്ടാണ് , പാർട്ടിയുമായി വിലപേശുകയാണ് എന്ന നിലയിലൊക്കെ ചിലമാധ്യമങ്ങൾ കഥകളുണ്ടാക്കിയത് സമാന്യമര്യാദക്ക് നിരക്കുന്നതല്ല. ചിലർ BJP യുടെ കോർപ്പറേഷൻ ഭരണം ഇപ്പോതാഴെ പോകും എന്നൊക്കെ ദിവാസ്വപ്നം കണ്ടുതുടങ്ങി.. ആ വെള്ളം വാങ്ങിവച്ചോളൂ അഞ്ച് വർഷം മാത്രമല്ല തുടർന്നും തിരുവനന്തപുരം BJP തന്നെ ഭരിക്കും. കേരളത്തിലെ ആദ്യവനിത IPS കാരിയും DGP യും എന്ന നിലക്ക് അവരെ ശ്രീ. കെ. സുരേന്ദ്രൻ ആണ് BJPയിൽ ചേർത്തത്. തുടർന്ന് പാർട്ടിയോടുള്ള പ്രതിബദ്ധത അവർ എപ്പോഴും കാത്ത് സൂക്ഷിച്ചിട്ടുണ്ട്.

പാർട്ടി സംസ്ഥാന വൈസ് പ്രസിഡൻ്റ് എന്ന നിലയിൽ മികവുറ്റ പ്രവർത്തനമാണ് നടത്തുന്നത്. പാർട്ടി ആവശ്യപ്പെട്ടപ്പോൾ കൗൺസിലർ സ്ഥാനാർത്ഥിയായി മത്സരിക്കാൻ തയ്യാറായതും അവർക്ക് പാർട്ടിയോടുള്ള വിധേയത്വം തെളിയിക്കുന്നു. പാർട്ടിയുടെ മൂന്ന് ദിവസം നീണ്ടു നിന്ന ജില്ലാതല പഠനശിബിരത്തിൽ ഒരു സാധാരണ പ്രവർത്തകയെ പോലെ ശ്രീലേഖയുണ്ടായിരുന്നു അഴിമതിക്കെതിരെ എന്നും പോരാടിയിട്ടുള്ള R.ശ്രീലേഖക്ക് അനധികൃത സമ്പാദ്യമൊന്നുമില്ല, സ്വന്തം പെൻഷൻ പണമെടുത്താണ് അവർ വാർഡിലെ ജനങ്ങളെ സേവിക്കുന്നത്.
പരമ്പരാഗത രാഷ്ട്രീയക്കാരിയല്ല R ശ്രീലേഖ, അവർ ഒരു സ്ത്രീയാണ് , ഒരു അമ്മയാണ്…
അവർ എന്നും ജനങ്ങൾക്കൊപ്പം സേവനനിരതയായി നിലകൊള്ളും…
എത്രയും പെട്ടന്ന് ആരോഗ്യം വീണ്ടെടുക്കട്ടെ എന്ന് ആശംസിക്കുന്നു..
എന്നോടൊപ്പം സംസ്ഥാന വൈസ് പ്രസിഡൻ്റ് കെ.സോമൻ ഉണ്ടായിരുന്നു. ജില്ലാ പ്രസിഡൻ്റ് കരമന ജയനും , മേയർ വി.വി. രാജേഷും അവരെ അശുപത്രിയിലെത്തി കണ്ടു’