റേറ്റിംഗും പരസ്യവരുമാനവും വർദ്ധിപ്പിക്കാൻ സർവേ  സഹായകരമാണെന്ന് ഡോ.ബി.ഇക്ബാൽ
തിരുവനന്തപുരം:തെരഞ്ഞെടുപ്പ് സർവേകൾ മാധ്യമങ്ങളുടെ അനിവാര്യമായ ഒരു ഉപജീവന മാർഗമാണെന്ന് കേരള സർവകലാശാല മുൻ വൈസ് ചാൻസലറും ആസൂത്രണ ബോർഡ് മുൻ അംഗവും പൊതുജനാരോഗ്യ പ്രവർത്തകനും ഇടത് സഹയാത്രികനുമായ ഡോ.ബി.ഇക്ബാൽ. റേറ്റിംഗും പരസ്യവരുമാനവും വർദ്ധിപ്പിക്കാൻ അവ അവർക്കു സഹായകരമാണെന്ന് അദ്ദേഹം വിശദീകരിക്കുന്നു.

ഡോ.ബി.ഇക്ബാൽ

ഡോ.ബി.ഇക്ബാൽ എഴുതിയത് വായിക്കാം
‘ടി.വിക്ക് മുന്നിലെ ഹൃദയമിടിപ്പും സർവേക്കണ്ണുകളും
രാഷ്ട്രീയ പ്രബുദ്ധരായ പ്രിയപ്പെട്ട സുഹൃത്തുക്കളുടെ ശ്രദ്ധയ്ക്ക്,
അസംബ്ലി തിരഞ്ഞെടുപ്പ് സർവേ ഫലങ്ങൾക്കായി ആകാംക്ഷയോടെ ടി.വിക്ക് മുന്നിലിരിക്കുന്നവർ മനസ്സിലാക്കേണ്ട ചില വസ്തുതകൾ അറിയിക്കട്ടെ. അസംബ്ളി തിരഞ്ഞെടുപ്പ് ഫലം എന്താകുമെന്ന് ആർക്കും പ്രവചിക്കാൻ കഴിയില്ലെങ്കിലും, വിവിധ മാധ്യമങ്ങളും ഏജൻസികളും പുറത്തുവിടുന്ന സർവേ ഫലങ്ങൾ നമുക്ക് മുൻകൂട്ടി പ്രവചിക്കാൻ സാധിക്കും!
ഓരോ ഏജൻസിയും തങ്ങളുടെ രാഷ്ട്രീയ താൽപ്പര്യങ്ങൾക്കും പക്ഷപാതിത്വങ്ങൾക്കും അനുസൃതമായാണ് പലപ്പോഴും സർവേകൾ തയ്യാറാക്കുന്നത്. ഒപ്പം നിക്ഷ്പക്ഷമെന്ന തോന്നലുണ്ടാക്കി വിശ്വസനീയത നേടാനും അവർ ശ്രമിക്കാറുണ്ട്.
പൊതുവെ ഇത്തരം സർവേകൾ താഴെ പറയുന്ന രീതിയിലായിരിക്കും വരുന്നത്:
• യു.ഡി.എഫ് അനുകൂല സർവേ: യു.ഡി.എഫ് 75-80+, എൽ.ഡി.എഫ് 60 -, എൻ.ഡി.എ 1 (യു.ഡി.എഫ് അധികാരത്തിലേക്ക് തിരിച്ചുവരുന്നു).
• എൽ.ഡി.എഫ് അനുകൂല സർവേ: എൽ.ഡി.എഫ് 85+, യു.ഡി.എഫ് 55-, എൻ.ഡി.എ 1 (എൽ.ഡി.എഫിന് ഭരണതുടർച്ച).
ഇതിനുപുറമേ, വ്യക്തിബന്ധങ്ങളുടെയും രാഷ്ട്രീയ താൽപ്പര്യങ്ങളുടെയും അടിസ്ഥാനത്തിൽ ചില പ്രത്യേക മണ്ഡലങ്ങളിൽ ചിലരെ വിജയിപ്പിക്കാനും മറ്റുചിലരെ തോൽപ്പിക്കാനും സർവേകൾ ‘ശ്രമിക്കാറുണ്ട്’.
അതിപ്രഗത്ഭർ നടത്തിയ 2024 പാർലമെൻ്റ് തിരഞ്ഞെടുപ്പ്, അടുത്തകാലത്ത് കേരളത്തിലെ തദ്ദേശ തിരഞ്ഞെടുപ്പ് കാലങ്ങളിൽ നടന്ന സർവേഫലങ്ങളും യഥാർത്ഥഫലങ്ങളും തമ്മിലുള്ള എല്ലാവരും മറന്നുകഴിഞ്ഞ വ്യത്യാസം ഓർത്തെടുക്കുക.
മെയ് നാലിന് യഥാർത്ഥ ഫലം വരുമ്പോൾ ഈ പ്രവചനങ്ങളെല്ലാം തെറ്റാണെന്ന് തെളിഞ്ഞാലും അടുത്ത തിരഞ്ഞെടുപ്പിലും ഇതെല്ലാം ആവർത്തിക്കും. അപ്പോഴും നമ്മളെല്ലാം അതേ ആകാംക്ഷയോടെയും ഹൃദയമിടിപ്പോടെയും ടി.വിക്ക് മുന്നിൽ തന്നെയിരിക്കും!!
ഇതൊക്കെയാണെങ്കിലും ഒരു നല്ലകാര്യമുണ്ട്. സർവേഫലമെല്ലാം കാണാൻ താത്പര്യം കാണിക്കുമ്പോൾ തന്നെ ഇതൊന്നും വോട്ടർമാരെ സ്വാധിനിക്കില്ലെന്നതാണ് സത്യം. ഇതിനകം നിശ്ചയിച്ച് കഴിഞ്ഞതനുസരിച്ച് എല്ലാവരും തങ്ങൾക്കിഷ്ടമുള്ളവർക്ക് തന്നെ വോട്ടു ചെയ്യും.
തിരഞ്ഞെടുപ്പ് സർവേകൾ മാധ്യമങ്ങളുടെ അനിവാര്യമായ ഒരു ഉപജീവന മാർഗമാണ്. റേറ്റിംഗും പരസ്യവരുമാനവും വർദ്ധിപ്പിക്കാൻ അവ അവർക്കു സഹായകരമാണ്. ജനാധിപത്യത്തിന്റെ കാവലാളുകളായ മാധ്യമങ്ങൾ നമ്മുടെ സുഹൃത്തുക്കളാണ്; മാധ്യമ നിലനിൽപ്പ് ജനാധിപത്യത്തിന്റെ ആരോഗ്യത്തിന് അത്യന്താപേക്ഷിതവുമാണ്. അതിനാൽ, സർവേ പരിപാടികളെ അത്രമേൽ പ്രാധാന്യത്തോടെ മാത്രം കാണുന്നതാണ് ഉചിതം. ‘