‘തദ്ദേശ തെരഞ്ഞെടുപ്പിലെ 23,000 വോട്ട് ഇപ്പോൾ ഏഴായിരമായി കുറഞ്ഞതെങ്ങനെ?’
കൊല്ലം:പത്തനാപുരത്ത് ബിജെപി വോട്ടുകൾ കോൺഗ്രസിലേക്ക് ചോർന്നെന്ന് ബ്ലോക് പഞ്ചായത്ത് അംഗം അനന്തു.ജില്ലാ പഞ്ചായത്ത് മുൻ അംഗമായ അനന്തു ഡിവൈഎഫ് ഐ കൊല്ലം ജില്ലാ സെക്രട്ടേറിയറ്റ് അംഗവും സിപിഎം പത്തനാപുരം ഏരിയാ കമ്മിറ്റി അംഗവുമാണ്.ഫെയ്സ് ബുക്കിലൂടെയാണ് അനന്തു ഈ ആരോപണം ഉന്നയിച്ചത്.

അനന്തു

അനന്തുവിൻ്റെ ഫെയ്സ്ബുക് കുറിപ്പ്:
‘പത്തനാപുരത്തെ ജനവിധിയെ അംഗീകരിക്കുന്നു, അപ്പഴും തിരഞ്ഞെടുപ്പ് റിസൾട്ട്‌ വന്നതിന് ശേഷം പത്തനാപുരം രാഷ്ട്രീയത്തിൽ ഉണ്ടായ പുതിയ സംഭവവികാസങ്ങൾ
വലിയ ചർച്ചകൾക്ക് വഴിവെച്ചിരിക്കുകയാണ്.
കെ ബി ഗണേഷ്കുമാർ എന്ന ഇടതുപക്ഷ സ്ഥാനാർഥിയുടെ പരാജയം,ജ്യോതികുമാർ ചാമക്കാല നേടിയ വിജയം — ഇതെല്ലാം സാധാരണ രാഷ്ട്രീയ മാറ്റമെന്ന നിലയിൽ മാത്രം കാണാൻ കഴിയില്ല. വോട്ടുകളുടെ ഗണിതശാസ്ത്രം പരിശോധിക്കുമ്പോൾ,ഭാരതീയ ജനതാ പാർട്ടി (BJP) വോട്ടുകൾ കുറഞ്ഞതും, അവ നിർണായകമായ സ്വാധീനം ചെലുത്തിയതായും വ്യക്തമാണ്.
പത്തനാപുരംമണ്ഡലത്തിൽ കഴിഞ്ഞ തിരഞ്ഞെടുപ്പുകളിലെ പ്രവണതകൾ നോക്കുമ്പോൾ, ബിജെപിക്ക് സ്ഥിരമായ നിശ്ചിതമായ വോട്ടുബേസ് ഉണ്ടായിരുന്നുവെന്ന് കാണാം. എന്നാൽ ഇത്തവണ ആ വോട്ടുകൾ സ്വാഭാവികമായി അവരുടെ സ്ഥാനാർഥിക്ക് ഒന്നിച്ചുചേരാതെ,ഇന്ത്യൻ നാഷണൽ കോൺഗ്രസിന് അനുകൂലമായി
വഴിമാറുകയായിരുന്നു…
ഇത് വെറും ആരോപണമാണോ, അതോ രാഷ്ട്രീയ തന്ത്രത്തിന്റെ ഭാഗമായുണ്ടായ ഒരു ‘വോട്ട് ട്രാൻസ്ഫർ’ ആണോ എന്നത് ബിജെപിയുടെ ഉത്തരവാദിത്തപെട്ടവർ വ്യക്തമാകേണ്ടതാണ്.
ജനാധിപത്യത്തിൽ വോട്ടുകൾ ജനങ്ങളുടെ വിശ്വാസമാണ്. ആ വിശ്വാസം രാഷ്ട്രീയ ഡീലുകൾക്ക് വേണ്ടി വഴിമാറുകയാണെങ്കിൽ, അത് ചോദ്യം ചെയ്യപ്പെടേണ്ടതും ചര്‍ച്ച ചെയ്യപ്പെടേണ്ടതുമാണ്.
സത്യാവസ്ഥ എന്താണ്?
വോട്ടുകൾ സ്വാഭാവികമായി മാറിയതോ,
അതോ പിന്നാമ്പുറ ധാരണകളുടെ ഫലമോ?
ജനങ്ങൾ ഉത്തരം കാത്തിരിക്കുന്നു…
ഈ മണ്ഡലത്തിലെ തന്നെ എന്‍റെ പഞ്ചായത്തിൽ 15വാർഡുകൾ ഉള്ള ഇടത്തെ 10വാർഡുകൾ അടങ്ങുന്ന ബ്ലോക്ക്‌ പഞ്ചായത്ത്‌ ഡിവിഷനിലേക്ക് തിരഞ്ഞെടുപ്പിൽ മത്സരിച്ചു വിജയിച്ച വ്യക്തി ആണ് ഞാൻ. എന്‍റെ തിരഞ്ഞെടുപ്പ് ഫലം തന്നെ പരിശോധനനടത്തിയാൽ
ആ ഇലക്ഷനിൽ 15വാർഡുകൾ ഉള്ള പഞ്ചായത്തിൽ 10വാർഡുകളിൽ മാത്രം ആയി ബിജെപി യുടെ വോട്ട് 2500 ആയിരുന്നു.ഇതിന് മുൻപ് ഉള്ള തദ്ദേശ ഇലക്ഷന് 1900 ആയിരുന്നു ബ്ലോക്ക്‌ പഞ്ചായത്ത്‌ BJP ക്ക് ലഭിച്ചത്
എന്നാൽ ഈ നിയമസഭ തിരഞ്ഞെടുപ്പിൽ കേവലം 15 വാർഡുകളിൽ നിന്നും ആകെ ബിജെപിക്ക് ലഭിച്ചത് കേവലം 600 വോട്ടുകൾ മാത്രം ആണ്, ബാക്കി വോട്ടുകൾ എവിടെ പോയി?
ഇത് പോലെ തന്നെ ഈ മണ്ഡലത്തിലെ ഓരോ പഞ്ചായത്തിലെയും അവസ്ഥ…
6മാസം മുൻപ് നടന്ന തദ്ദേശഇലക്ഷനിൽ ഏകദേശം 23000വോട്ടുകൾ ആകെ മണ്ഡലത്തിൽ ബിജെപിക്ക് കിട്ടിയിരുന്നു. .
എന്നാൽ ഇത്തവണ കേവലം7000 വോട്ടുകൾ മാത്രം ആണ് ബിജെപി ക്ക് ലഭിച്ചിട്ടുള്ളത്…
പിആർ ഏജൻസികളുടെ പ്രവർത്തനത്തിൻ്റെയും, വോട്ട് കൈമാറ്റത്തിലൂടെയും നേടിയ വിജയങ്ങൾ താത്കാലികം മാത്രം ആയിരിക്കും..’