സ്‌ക്കൂട്ടിൻ്റെ എയര്‍ബസ് എ321നിയോ, ബോയിംഗ് 787 ഡ്രീംലൈനര്‍ എന്നീ വിമാനങ്ങളില്‍ ‘സ്‌പൈഡര്‍മാന്‍’

തിരുവനന്തപുരം: സിംഗപ്പൂര്‍ എയര്‍ലൈന്‍സിൻ്റെ ബജറ്റ് എയര്‍ലൈന്‍ സ്‌ക്കൂട്ടും സോണി പിക്‌ചേഴ്‌സിൻ്റെ സ്‌പൈഡര്‍-മാന്‍: ബ്രാന്‍ഡ് ന്യൂ ഡേയുമായി കൈകോര്‍ക്കുന്നു.
സെപ്റ്റംബര്‍ 13 വരെ, ഈ സൂപ്പര്‍ഹീറോ സ്‌ക്കൂട്ടിൻ്റെ എയര്‍ബസ് എ321നിയോ, ബോയിംഗ് 787 ഡ്രീംലൈനര്‍ എന്നീ രണ്ട് വിമാനങ്ങളില്‍ യാത്രക്കാര്‍ക്കൊപ്പം ഉണ്ടാകും. ഹ്രസ്വ-ഇടത്തരം-ദീര്‍ഘദൂര ഫ്‌ളൈറ്റുകളിലെല്ലാം സിനിമയുടെ പശ്ചാത്തലത്തിലുള്ള ഈ സവിശേഷ അനുഭവം ആസ്വദിക്കാന്‍ യാത്രക്കാര്‍ക്ക് ഇതിലൂടെ അവസരം ലഭിക്കും.

വിമാനത്തില്‍ സ്‌പൈഡര്‍-മാന്‍ ചിത്രങ്ങളുള്ള ഡെക്കലുകളും പ്രത്യേക ഹെഡ്‌റെസ്റ്റ് കവറുകളും സജ്ജീകരിക്കുന്നതിനൊപ്പം സ്‌പൈഡര്‍-മാന്‍: ബ്രാന്‍ഡ് ന്യൂ ഡേയിലെ സംഗീതവും പശ്ചാത്തലത്തില്‍ ആസ്വദിക്കാം. കൂടാതെ യാത്രയില്‍ വിമാനത്തില്‍ നിന്നും പര്‍ച്ചേസ് ചെയ്യുന്നവര്‍ക്ക് ഒരു ഫ്‌ളൈറ്റ് ടാഗ് അല്ലെങ്കില്‍ മടക്കിവെക്കാവുന്ന ഇക്കോ ബാഗ് ഉള്‍പ്പെടെയുള്ള എക്‌സ്‌ക്ലൂസീവ് മെര്‍ച്ചന്‍ഡൈസുകള്‍ സമ്മാനമായി ലഭിക്കും.

ബോയിംഗ് 787 ഡ്രീംലൈനര്‍ വിമാനം ജൂണ്‍ 30-ന് ടോക്കിയോയിലേക്കും (ഹനേദ), എയര്‍ബസ് എ321നിയോ വിമാനം ജൂലൈ 1-ന് ചിയാങ് മായിലേക്കും ആദ്യ സര്‍വീസ് നടത്തും. തുടര്‍ന്ന്, ഓസ്ട്രേലിയ, ചൈന, ജപ്പാന്‍, ഫിലിപ്പീന്‍സ്, തായ്ലന്‍ഡ് എന്നീ രാജ്യങ്ങളിലെ തെരഞ്ഞെടുക്കപ്പെട്ട നഗരങ്ങളിലേക്ക് ഈ രണ്ട് സ്‌പൈഡര്‍-മാന്‍ തീം വിമാനങ്ങളും സര്‍വീസ് നടത്തും. എയര്‍ലൈനിൻ്റെ പതിവ് സര്‍വീസുകളുടെ ഭാഗമായി മറ്റ് റൂട്ടുകളിലും ഈ വിമാനങ്ങള്‍ ഉപയോഗിച്ചേക്കാം. അതിനാല്‍, ഈ പ്രത്യേക സര്‍വീസുകള്‍ മുന്‍കൂട്ടി ബുക്ക് ചെയ്യാത്ത യാത്രക്കാര്‍ക്കും അപ്രതീക്ഷിതമായി സ്‌പൈഡര്‍-മാന്‍ വിമാനങ്ങളില്‍ യാത്ര ചെയ്യാനുള്ള അവസരം ലഭിക്കാം.

സിംഗപ്പൂര്‍ ചാംഗി എയര്‍പോര്‍ട്ട് ടെര്‍മിനല്‍ 1-ലെ ചെക്ക്-ഇന്‍ കൗണ്ടറുകളില്‍ നിന്നാണ് സ്‌കൂട്ടിനൊപ്പമുള്ള സ്‌പൈഡര്‍-മാന്‍: ബ്രാന്‍ഡ് ന്യൂ ഡേ യാത്ര ആരംഭിക്കുന്നത്.
സ്‌ക്കൂട്ടിന്റെ വെബ്സൈറ്റ്, മൊബൈല്‍ ആപ്പ്, വീചാറ്റ് മിനി പ്രോഗ്രാം എന്നിവയിലൂടെ ഈ പ്രത്യേക തീം ഫ്‌ളൈറ്റുകള്‍ ബുക്ക് ചെയ്യാം. ഈ വിമാനങ്ങളുടെ യാത്രാ സമയക്രമം സ്‌ക്കൂട്ടിൻ്റെ വെബ്‌സൈറ്റില്‍ പ്രസിദ്ധീകരിക്കും