കട്ടപ്പന: സംസ്ഥാന സ്കൂ‌ൾ കായികമേളയിൽ മൂന്നര പതിറ്റാണ്ടിലേറെ പഴക്കമുള്ള
റെക്കോർഡ് അട്ടിമറിച്ച് സ്വർണം നേടിയ കാൽവരിമൗണ്ട് കാൽവരി എച്ച്എസിലെ
ദേവപ്രിയ ഷൈബുവിന് വീടുവച്ചു നൽകാൻ സിപിഐ (എം).
ഈ കായിക വാഗ്ദാനത്തിന് സിപിഐ (എം) വീട് നിർമിച്ചുനൽകുമെന്ന് ഇടുക്കി
ജില്ലാ സെക്രട്ടറി സി വി വർഗീസ് അറിയിച്ചു.
സബ് ജൂനിയർ ഗേൾസ് 100 മീറ്റർ ഓട്ടത്തിൽ 38 വർഷം പഴക്കമുള്ള സിന്ധു
മാത്യുവിൻ്റെ റെക്കോർഡാണ് ദേവപ്രിയ തകർത്തത്.
മത്സരത്തിനു ശേഷം പരിശീലകൻ ടിബിൻ ജോസഫ് മാധ്യമങ്ങളോട്
സംസാരിക്കുന്നതിനിടെ ദേവപ്രിയയ്ക്ക് സ്വന്തമായി വീടില്ലാത്ത കാര്യം
പങ്കുവെച്ചിരുന്നു. ഇതുശ്രദ്ധയിൽപ്പെട്ടാണ് സിപിഐ (എം) ജില്ലാ സെക്രട്ടറി
പാർട്ടി വീട് നിർമിച്ചുനൽകാമെന്ന് അറിയിച്ചത്.
ഇടുക്കി റവന്യു ജില്ലാ കായികമേളയിൽ 100, 200, 80 ഹർഡിൽസ്, 4100 മീറ്റർ
റിലേ എന്നിവയിൽ സ്വർണം നേടി ദേവപ്രിയ വ്യക്തഗത ചാമ്പ്യൻപട്ടം
നേടിയിരുന്നു. കാൽവരി എച്ച്എസിലെ ഒമ്പതാം ക്ലാസ് വിദ്യാർഥിനിയാണ്. സഹോദരി
ദേവനന്ദയും റിലേയിലും ഹൈജമ്പിലും മത്സരിച്ചു. പത്രം ഏജൻ്റ് കാൽവരിമൗണ്ട്
പാലത്തുംതലയ്ക്കൽ ഷൈബുവിൻ്റെയും ബിസ്മിയുടെയും മകളാണ്.