‘ധുരന്ധർ’ ജനുവരി 30ന് നെറ്റിഫ്ലിക്സിൽ

മുംബയ്:ബോക്സ് ഓഫീസിൽ അഭൂതപൂർവമായ വിജയം നേടി ആദിത്യ ധർ-രൺവീർ സിങ് കൂട്ടുകെട്ടിലൊരുങ്ങിയ ‘ധുരന്ധർ’.ഈ ചിത്രം 31 ദിവസംകൊണ്ട് ലോകമെമ്പാടുമുള്ള ബോക്സ് ഓഫീസിൽ നിന്ന് വാരിക്കൂട്ടിയത് 1200 കോടി രൂപയാണ്. കന്നഡ സൂപ്പർഹിറ്റ് ചിത്രമായ കെ.ജി.എഫ് 2-ൻ്റെ റെക്കോർഡാണ് ധുരന്ധർ മറികടന്നത്. ഈ നേട്ടം കൈവരിക്കുന്ന ആറാമത്തെ ഇന്ത്യൻ സിനിമയായി മാറിയ ധുരന്ധർ, നിലവിൽ ഇന്ത്യൻ സിനിമാ ചരിത്രത്തിലെ അഞ്ചാമത്തെ ഏറ്റവും വലിയ ഹിറ്റായി മാറിയിരിക്കുകയാണ്.

ഇന്ത്യയിലെ ആഭ്യന്തര ബോക്സ് ഓഫീസിലും ചിത്രം മികച്ച പ്രകടനമാണ് തുടരുന്നത്. അഞ്ചാം വാരാന്ത്യത്തിൽ മാത്രം ഇന്ത്യയിൽ നിന്ന് 33 കോടി രൂപ നെറ്റ് കളക്ഷൻ നേടിയ ചിത്രം, 31 ദിവസത്തിനുള്ളിൽ മൊത്തം 772.25 കോടി രൂപ നെറ്റ് കളക്ഷൻ (926.7 കോടി ഗ്രോസ്) സ്വന്തമാക്കി. ‘അവതാർ: ഫയർ ആൻഡ് ആഷ്’, ‘ഇക്കിസ്’ തുടങ്ങിയ വമ്പൻ ചിത്രങ്ങളിൽ നിന്നുള്ള വെല്ലുവിളികളെ അതിജീവിച്ചാണ് ധുരന്ധർ ബോക്സ് ഓഫീസിൽ ഒന്നാം സ്ഥാനത്ത് തുടരുന്നത്.
വിദേശ വിപണികളിലും ചിത്രം മികച്ച ലാഭം നേടുന്നുണ്ടെങ്കിലും മിഡിൽ ഈസ്റ്റിലെ നിരോധനം ചിത്രത്തിന്‍റെ കളക്ഷനെ നേരിയതോതിൽ ബാധിച്ചിട്ടുണ്ട്. നിരോധനമുണ്ടായിട്ടും, ഇതുവരെ 31 ദശലക്ഷം ഡോളർ അന്താരാഷ്ട്ര തലത്തിൽ ചിത്രം നേടിയെടുത്തു.
കറാച്ചിയിലെ ഭീകരവാദ ശൃംഖലയിലേക്ക് നുഴഞ്ഞുകയറുന്ന ഹംസ എന്ന ഇന്ത്യൻ ഏജന്‍റായി രൺവീർ സിങ് എത്തുന്ന ഈ ചിത്രത്തിൽ അക്ഷയ് ഖന്ന, അർജുൻ രാംപാൽ, സഞ്ജയ് ദത്ത്, ആർ. മാധവൻ എന്നിവരും പ്രധാന വേഷങ്ങളിൽ അഭിനയിക്കുന്നു.സാറ അർജുനാണ് നായിക.
ചിത്രത്തിന്‍റെ രണ്ടാം ഭാഗത്തിനായുള്ള കാത്തിരിപ്പിലാണ് ആരാധകർ. ലഭ്യമായ സൂചനകൾ പ്രകാരം ധുരന്ധർ പാർട്ട് 2, മാർച്ചിൽ തിയേറ്ററുകളിലെത്തും.
ഡിസംബർ അഞ്ചിന് റിലീസ് ചെയ്ത ചിത്രം 21 ദിവസത്തിനകം ആയിരം കോടി ക്ലബ്ബിൽ ഇടംപിടിച്ചു.1200 കോടിയിലെത്തിയതോടെ ഷാരൂഖ് ഖാൻ (ജവാൻ), സൽമാൻ ഖാൻ (ബജ്‌രംഗീ ഭായ്ജാൻ), യഷ് (കെജിഎഫ്-2), രൺബീർ കപൂർ (അനിമൽ) തുടങ്ങിയ താരങ്ങളുടെ ഏറ്റവും വലിയ ഹിറ്റുകളുടെ കളക്ഷനെ രൺവീർ സിംഗ് മറികടന്നു.
ഇനി നാലു ചിത്രങ്ങൾ മാത്രമാണ് മുന്നിലുള്ളത് – ആമിർ ഖാന്‍റെ ‘ദംഗൽ’, എസ്.എസ്. രാജമൗലിയുടെ ‘ബാഹുബലി 2’, ‘ആർആർആർ’, അല്ലു അർജുൻ്റെ ‘പുഷ്പ 2’ എന്നിവയാണത്.
‘ദംഗൽ’ ഇപ്പോഴും എക്കാലത്തെയും മികച്ച വരുമാനം നേടിയ ഇന്ത്യൻ ചിത്രമായി തുടരുകയാണ്. റിലീസ് കഴിഞ്ഞ് ഏകദേശം പത്തുവർഷം പിന്നിടുമ്പോഴും ദംഗലിൻ്റെ 2070 കോടി രൂപ നേട്ടം മറികടക്കാൻ ഒരു ചിത്രത്തിനുമായിട്ടില്ല, ചിത്രത്തിന്‍റെ വരുമാനത്തിന്റെ 60 ശതമാനത്തിലധികവും ചൈന, ഹോങ്കോങ്, തായ്‌ലൻഡ് എന്നിവിടങ്ങളിൽ നിന്നുള്ളതാണ്.
ധുരന്ധർ ജനുവരി 30ന് നെറ്റിഫ്ലിക്സിലെത്തും.