വാക്കത്തൺ മൂന്ന് കിലോമീറ്റർ

കൊച്ചി: ഇന്ത്യയിലെ ഏറ്റവും വലിയ ഹോസ്പിറ്റാലിറ്റി കമ്പനിയായ ഇന്ത്യൻ ഹോട്ടൽസ് കമ്പനി ലിമിറ്റഡ് (ഐ എച് സി എൽ), പാഥ്യ എന്ന തങ്ങളുടെ പാരിസ്ഥിതിക, സാമൂഹിക ഉദ്യമത്തിന്റെ ആഭിമുഖ്യത്തിൽ ഭാരത് ഏക്‌സാത്ത് വാക്കത്തോണിന്റെ കൊച്ചി പതിപ്പ് സംഘടിപ്പിച്ചു. ഉത്തരവാദിത്ത ടൂറിസത്തോടുള്ള പ്രതിബദ്ധത മുൻ നിറുത്തിയാണ് ഭാരത് ഏക് സാത്ത് വാക്കത്തോൺ സംഘടിപ്പിച്ചത്. എറണാകുളം മറൈൻ ഡ്രൈവിലുള്ള ഐ എച് സി എൽ ഹോട്ടലായ വിവാന്ത കേന്ദ്രീകരിച്ചാണ് വാക്കത്തോൺ നടന്നത്.

14 രാജ്യങ്ങളിൽ 200-ലധികം കേന്ദ്രങ്ങളിലായി ഐ എച് സി എൽ ജീവനക്കാർ, അവരുടെ കുടുംബങ്ങൾ, പ്രാദേശിക പങ്കാളികൾ, വെണ്ടർമാർ, എന്നിവരെ ഒരുമിച്ച് കൊണ്ടുവരുന്ന 3 കിലോമീറ്റർ നടത്തമാണ് ഭാരത് ഏക്‌സാത്ത് വാക്കത്തോൺ. പാഥ്യയുടെ നാലാം വാർഷികം ആഘോഷിക്കുന്ന ഐ എച് സി എൽ സംഘടിപ്പിക്കുന്ന ഈ വാക്കത്തോണിലൂടെ സമാഹരിച്ച തുക താജ് പബ്ലിക് സർവീസ് വെൽഫെയർ ട്രസ്റ്റിനെ ശക്തിപ്പെടുത്താനും ഐ എച് സി എല്ലിന്റെ സാമൂഹിക പ്രതിബദ്ധതയെ ശക്തിപ്പെടുത്താനുമാണ് ഉപയോഗിക്കുന്നത്.

കൊച്ചിയിൽ സംഘടിപ്പിച്ച വാക്കത്തോൺ നഗരത്തിലുടനീളമുള്ള ഐ എച് സി എൽ ഹോട്ടലുകളിൽ നിന്നുള്ള ജീവനക്കാരെ ഒരു അർത്ഥവത്തായ ലക്ഷ്യത്തിനു വേണ്ടി ഒരുമിച്ച് കൊണ്ടു വരികയായിരുന്നു. കൊച്ചിയിലെ താജ് മലബാർ റിസോർട്ട് ആൻഡ് സ്പാ, താജ് കൊച്ചി ഇന്റർനാഷണൽ എയർപോർട്ട്, താജ് കുമരകം റിസോർട്ട് ആൻഡ് സ്പാ, വിവാന്ത എറണാകുളം, വിവാന്ത കൊച്ചി, വിവാന്ത ആലുവ, ജിഞ്ചർ കൊച്ചി, ജിഞ്ചർ കളമശ്ശേരി, കൊച്ചിയിലെ അമാ സ്റ്റേസ് ആൻഡ് ട്രെയിൽസ് തുടങ്ങിയ ഹോട്ടലുകളിൽ നിന്നുള്ളവർ പങ്കെടുത്തു.

•  മറൈൻ ഡ്രൈവിൽ സജ്ജീകരിച്ച 3 കിലോമീറ്റർ നടത്തം മാർച്ച് 22നു രാവിലെ 8:15 ന് ആരംഭിച്ചു. കേന്ദ്ര ടൂറിസം മന്ത്രാലയം റീജിയണൽ ഡയറക്ടർ വെങ്കിടേശൻ ദത്താരേയൻ, എറണാകുളം ജില്ലാ കളക്ടർ ജി. പ്രിയങ്ക എന്നിവരുൾപ്പെടെയുള്ള വിശിഷ്ട വ്യക്തികൾ ഫ്ലാഗ് ഓഫ് ചെയ്തതിനെത്തുടർന്ന് എറണാകുളം വിവാന്തയിൽ നിന്നാരംഭിച്ച വാക്കത്തോൺ, കേരള ഹൈക്കോടതി വരെയും, അവിടെ നിന്ന് തിരിച്ച് എറണാകുളം വിവാന്തയിൽ എത്തിച്ചേരുകയും ചെയ്തു.