ന്യൂസ് ഡിസൈന്‍ സംബന്ധിച്ച് ലോകപ്രസിദ്ധ വെബ്‌സൈറ്റായ NewspaperDesign.org-യുടെ എഡിറ്റോറിയല്‍ ഡയറക്ടറാണ് ടി കെ സജീവ് കുമാര്‍

സിംഗപ്പൂർ:ലോകത്തിലെ അച്ചടി, ദൃശ്യ, നവമാധ്യമരംഗത്തെ മാധ്യമപ്രവര്‍ത്തകരുടെ ഏറ്റവും വലിയ കൂട്ടായ്മയായ സൊസൈറ്റി ഫോര്‍ ന്യൂസ് ഡിസൈന്‍(എസ് എൻ ഡി) പ്രസിഡൻ്റ്സ് അവാർഡ് മലയാളിയും ന്യൂസ് പേപ്പർ ഡിസൈൻ എഡിറ്റോറിയൽ ഡയറക്ടറുമായ ടി.കെ സജീവ് കുമാറിന്. സിംഗപ്പൂരിൽനടന്ന പ്രൌഡഗംഭീരമായ ചടങ്ങിൽ എസ് എൻ ഡി പ്രസിഡൻ്റ് ജോൺ വിൽ സജീവിന് അവാർഡ് സമർപ്പിച്ചു.

ടി കെ സജീവ് കുമാര്‍

ന്യൂസ് ഡിസൈനിലെ സമഗ്ര സംഭാവനയ്ക്കുള്ള ഈ പുരസ്കാരത്തിന് ആദ്യമായാണ് ഒരു ഇന്ത്യക്കാരൻ അർഹമാവുന്നത്.രാജ്യാന്തര തലത്തിൽ ന്യൂസ് ഡിസൈൻ പ്രൊത്സഹിപ്പിക്കുന്നതിനും നവീകരിക്കുന്നതിനും പുതുമകൾ കണ്ടെത്തുന്നതിലും NewspaperDesign.org മുഖേന നടത്തിയ ശ്രമങ്ങൾ പരിഗണിച്ചാണ് അവാർഡ്.
1979-ൽ സ്ഥാപിതമായതും യുണൈറ്റഡ് സ്റ്റേറ്റ്സ് ആസ്ഥാനമായി പ്രവർത്തിക്കുന്നതുമായ എസ്എൻഡി, ലോകമെമ്പാടുമുള്ള ദൃശ്യ പത്രപ്രവർത്തനത്തിലെ മികവും നവീകരണവും പ്രോത്സാഹിപ്പിക്കുന്ന പ്രസ്ഥാനമാണ്.എസ് എൻ ഡി ഡയറക്ടര്‍ ബോര്‍ഡിലേക്ക് ഏഷ്യയില്‍ നിന്നുള്ള ഏക അംഗമാണ് സജീവ് കുമാർ .അതിനുമുമ്പ് ആറ് വർഷം എസ്എൻഡിയിൽ ഏഷ്യ-സൗത്ത് പസഫിക് ഡയറക്ടറായി അദ്ദേഹം പ്രവർത്തിച്ചിരുന്നു.

ന്യൂസ് ഡിസൈന്‍ സംബന്ധിയായ ലോകപ്രസിദ്ധ വെബ്‌സൈറ്റായ NewspaperDesign.org-യുടെ എഡിറ്റോറിയല്‍ ഡയറക്ടറാണ് ടി കെ സജീവ് കുമാര്‍. മാധ്യമപ്രവര്‍ത്തനരംഗത്ത് മൂന്നുപതിറ്റാണ്ടിലേറെയായി പ്രവര്‍ത്തിച്ചുവരികയാണ്.കേരളകൌമുദി ഡെപ്യുട്ടി എഡിറ്ററും വിഷ്വൽ എഡിറ്ററുമായിരുന്നു.

ടി കെ സജീവ് കുമാര്‍ സിംഗപ്പൂരിൽ

തിരുവനന്തപുരം പ്രസ് ക്ലബ്ബിൻ്റെ മികച്ച ഡിസൈനിനുള്ള അവാർഡ് രണ്ടുതവണ ലഭിച്ച സജീവ് വേൾഡ് ന്യൂസ്‌പേപ്പർ അസോസിയേഷൻ്റെ ഏഷ്യൻ മീഡിയ അവാർഡിന് ആറ് തവണ ജൂറി അംഗമായി പ്രവർത്തിച്ചു.
കേരള മീഡിയ അക്കാദമി പ്രസിദ്ധീകരിച്ച “ന്യൂസ്‌പേപ്പർ ഡിസൈൻ” ഉൾപ്പെടെ നാല് പുസ്തകങ്ങൾ പ്രസിദ്ധീകരിച്ചിട്ടുണ്ട്.
ഭാര്യ എം ഗായത്രി റാണി,മക്കൾ: ഗൗരി ജി പണിക്കർ, മീനാക്ഷി ജി പണിക്കർ

ടി കെ സജീവ് കുമാര്‍