2026ലെ അനിൽ രാധാകൃഷ്ണൻ ഫെലോഷിപ്പ് ജേതാവായ ‘മാതൃഭൂമി’ ചീഫ് സബ് എഡിറ്റർ ടി.പി. ഗായത്രി രചിച്ച ‘ഇലരേഖകൾ’ മന്ത്രി സി.പി. ജോൺ പ്രകാശനം ചെയ്യും

തിരുവനന്തപുരം:’ദി ഹിന്ദു’പത്രത്തിൻ്റെ മുൻ സ്റ്റേറ്റ് ബ്യൂറോ ചീഫ് എസ്. അനിൽ രാധാകൃഷ്ണന്‍റെ അഞ്ചാം ചരമവാർഷികത്തോടനുബന്ധിച്ച് കേസരി സ്മാരക ജേണലിസ്റ്റ് ട്രസ്റ്റും അദ്ദേഹത്തിന്‍റെ കുടുംബവും സംയുക്തമായി ‘അനിലോർമ്മ’ അനുസ്മരണ സമ്മേളനവും പുസ്തകപ്രകാശനവും സംഘടിപ്പിക്കുന്നു. ജൂൺ 23 ചൊവ്വ വൈകിട്ട് 5.30-ന് തിരുവനന്തപുരം മാസ്കറ്റ് ഹോട്ടലിലാണ് പരിപാടി.
ഗതാഗത മന്ത്രി സി.പി. ജോൺ ഉദ്ഘാടനം ചെയ്യും. 2026ലെ അനിൽ രാധാകൃഷ്ണൻ ഫെലോഷിപ്പ് ജേതാവായ ‘മാതൃഭൂമി’ ചീഫ് സബ് എഡിറ്റർ ടി.പി. ഗായത്രി രചിച്ച ‘ഇലരേഖകൾ’ പുസ്തകത്തിന്‍റെ പ്രകാശനവും അദ്ദേഹം നടത്തും. വട്ടിയൂർക്കാവ് മുൻ എം.എൽ.എ. വി.കെ. പ്രശാന്ത് പുസ്തകം ഏറ്റുവാങ്ങും. അനിൽ സ്മാരക ഫെലോഷിപ്പ് കമ്മിറ്റി ചെയർമാനും കേരള സർവകലാശാല ജേണലിസം വകുപ്പ് മുൻ മേധാവിയുമായ എം. വിജയകുമാർ ചടങ്ങിൽ അധ്യക്ഷനാകും. പ്ലാനിങ് ബോർഡ് മുൻ അംഗം മിനി സുകുമാർ പുസ്തക പരിചയം നടത്തും.
കേസരി സ്മാരക ജേണലിസ്റ്റ് ട്രസ്റ്റ് ചെയർമാൻ ഷില്ലർ സ്റ്റീഫൻ ‘ ദ് ഹിന്ദു’ തിരുവനന്തപുരം റസിഡന്‍റ് എഡിറ്റർ എസ്. ആനന്ദൻ, രാജ്ഭവൻ മുൻ പിആർഒ എസ്.ഡി. പ്രിൻസ്, കേരള പത്രപ്രവർത്തക യൂണിയൻ സംസ്ഥാന കമ്മിറ്റി അംഗം സുരേഷ് വെള്ളിമംഗലം, ജനം ടിവി ചീഫ് എഡിറ്റർ പ്രദീപ് പിള്ള, കേസരി ട്രസ്റ്റ് സെക്രട്ടറി അനുപമ ജി. നായർ, ടൂറിസം സംരംഭകനായ പി.ഐ. ദിലീപ് കുമാർ, ടി.പി. ഗായത്രി, എസ്.എസ്. സിന്ധു എന്നിവർ സംസാരിക്കും.