കേന്ദ്ര സര്‍ക്കാര്‍ നിശ്ചയിച്ച 10,000 സംരംഭകര്‍ എന്ന ലക്ഷ്യം മറികടന്ന് 10,175 സംരംഭകര്‍ക്ക് വായ്പ ലഭ്യമാക്കാന്‍ സംസ്ഥാന വ്യവസായ വകുപ്പിന് സാധിച്ചു

തിരുവനന്തപുരം:കേന്ദ്ര ഭക്ഷ്യ സംസ്കരണ വ്യവസായ മന്ത്രാലയത്തിന്‍റെ പ്രധാന്‍ മന്ത്രി ഭക്ഷ്യ സംസ്കരണ സംരംഭ രൂപവല്‍ക്കരണ പദ്ധതി (പി.എം.എഫ്.എം.ഇ.) മികച്ച രീതിയില്‍ നടപ്പിലാക്കിയ സംസ്ഥാനത്തിനുള്ള ദേശീയ പുരസ്കാരം കേരളം ഏറ്റുവാങ്ങി. ന്യൂഡല്‍ഹിയിലെ ഇന്ത്യ ഹാബിറ്റാറ്റ് സെന്‍ററില്‍ നടന്ന പി.എം.എഫ്.എം.ഇ ഉച്ചകോടിയില്‍ വച്ച് കേന്ദ്ര ഭക്ഷ്യ സംസ്കരണ വ്യവസായ മന്ത്രി ചിരാഗ് പാസ്വാനില്‍ നിന്നും കൃഷി, കര്‍ഷക ക്ഷേമ വകുപ്പ് അഡീഷണല്‍ ചീഫ് സെക്രട്ടറി മിന്‍ഹാജ് ആലം , കേരള ബ്യൂറോ ഓഫ് ഇന്‍ഡസ്ട്രിയല്‍ പ്രൊമോഷന്‍ (കെ-ബിപ്പ്) ചീഫ് എക്സിക്യൂട്ടീവ് ഓഫീസര്‍ സൂരജ് എസ് എന്നിവര്‍ ചേര്‍ന്ന് അവാര്‍ഡ് സ്വീകരിച്ചു.

സംസ്ഥാനത്തെ ഭക്ഷ്യമേഖലയിലെ സംരംഭകര്‍ക്ക് നല്‍കിയ സമഗ്ര പിന്തുണ, സാമ്പത്തിക സഹായം, നൈപുണ്യ വികസനം, വിപണന പ്രോത്സാഹനം, തുടങ്ങിയവ കണക്കിലെടുത്താണ് സംസ്ഥാനത്തിന് ഈ അംഗീകാരം ലഭിച്ചത്. പദ്ധതി പ്രകാരം കേന്ദ്ര സര്‍ക്കാര്‍ നിശ്ചയിച്ച 10,000 സംരംഭകര്‍ എന്ന ലക്ഷ്യം മറികടന്ന് ഇതുവരെ 10,175 സംരംഭകര്‍ക്ക് വായ്പ ലഭ്യമാക്കാന്‍ സംസ്ഥാന വ്യവസായ വകുപ്പിന് സാധിച്ചു. കൂടാതെ 7,529 ഗുണഭോക്താക്കള്‍ക്കായി 195.04 കോടി രൂപയുടെ ഗ്രാന്‍റ്-ഇന്‍-എയ്ഡ് സബ്സിഡിയും അനുവദിച്ചിട്ടുണ്ട്.

സ്വയം സഹായ സംഘാംഗങ്ങള്‍ക്കുള്ള സീഡ് ക്യാപിറ്റല്‍ ധനസഹായമായി കുടുംബശ്രീ മുഖേന സംസ്ഥാന ഗ്രാമീണ ഉപജീവന മിഷന്‍ വഴി 6,297 അംഗങ്ങള്‍ക്ക് 19.60 കോടി രൂപയും നഗര ഉപജീവന മിഷന്‍ വഴി 1,060 അംഗങ്ങള്‍ക്ക് 3.90 കോടി രൂപയും വിതരണം ചെയ്തു. തൃശ്ശൂര്‍ വെള്ളാനിക്കര കാര്‍ഷിക സര്‍വകലാശാലയിലെ അഗ്രി ബിസിനസ് ഇന്‍കുബേറ്ററില്‍ 2.75 കോടി രൂപ ചെലവില്‍ അരി, പഴങ്ങള്‍, പച്ചക്കറികള്‍, സുഗന്ധവ്യഞ്ജന സംസ്കരണം എന്നിവയ്ക്കായി സജ്ജമാക്കിയ കോമണ്‍ ഇന്‍കുബേഷന്‍ സെന്‍ററും പദ്ധതിയുടെ ഭാഗമായി വിജയകരമായി പ്രവര്‍ത്തിച്ചുവരുന്നു.

കേന്ദ്ര-സംസ്ഥാന സര്‍ക്കാരുകള്‍ 60:40 എന്ന അനുപാതത്തില്‍ പങ്കാളിത്തം വഹിക്കുന്ന ഈ പദ്ധതിയില്‍ വ്യവസായ വാണിജ്യ വകുപ്പ് നോഡല്‍ ഡിപ്പാര്‍ട്മെന്‍റായും കെ-ബിപ്പ് നോഡല്‍ ഏജന്‍സിയായുമായാണ് പ്രവര്‍ത്തിക്കുന്നത്.