വനിതകളുടെ 50 മീറ്റർ റൈഫിൾ 3 പൊസിഷൻസ് ടീം ഇനത്തിലാണ് വിദർശയുടെ പുതിയ നേട്ടം
ടോക്കിയോ: ജപ്പാനിലെ നഗോയയിൽ നടക്കുന്ന 2026 ഏഷ്യൻ ഗെയിംസിൽ മലയാളി ഷൂട്ടിങ് താരം വിദർശ കെ. വിനോദ് വീണ്ടും വെള്ളി മെഡൽ സ്വന്തമാക്കി. വനിതകളുടെ 50 മീറ്റർ റൈഫിൾ 3 പൊസിഷൻസ് ടീം ഇനത്തിലാണ് വിദർശയുടെ ഈ പുതിയ നേട്ടം.
തിലോത്തമ സെൻ, ആഷി ചൗക്‌സി എന്നിവർക്കൊപ്പം ചേർന്നാണ് വിദർശ ഇന്ത്യൻ ടീമിനായി വെള്ളി മെഡൽ ഉറപ്പാക്കിയത്. മത്സരത്തിൽ 1,763 പോയിന്‍റാണ് ഇന്ത്യൻ സഖ്യം നേടിയത്. ഈ പ്രകടനത്തോടെ വിദർശയും തിലോത്തമ സെന്നും വ്യക്തിഗത ഇനത്തിന്‍റെ ഫൈനലിലേക്കും യോഗ്യത നേടിയിട്ടുണ്ട്.
ഈ ഏഷ്യൻ ഗെയിംസിൽ വിദർശ നേടുന്ന രണ്ടാമത്തെ മെഡലാണിത്. നേരത്തെ വനിതകളുടെ 10 മീറ്റർ എയർ റൈഫിൾ ടീം ഇനത്തിലും വെള്ളി മെഡൽ നേടിയിരുന്നു. ഇതോടെ ഏഷ്യൻ ഗെയിംസ് ഷൂട്ടിങ്ങിൽ മെഡൽ നേടുന്ന ആദ്യ മലയാളി എന്ന ചരിത്ര നേട്ടവും കോഴിക്കോട് തിരുവമ്പാടി സ്വദേശിനിയായ വിദർശ സ്വന്തമാക്കി.
കോഴിക്കോട് സ്വദേശിയായ 27കാരി വിദർഷയുടെ പ്രധാന ഇനങ്ങളിലൊന്നാണ് 50 മീറ്റർ റൈഫിൾ 3 പൊസിഷൻസ്. കോളേജ് കാലത്ത് എൻസിസി ട്രയൽസിലൂടെയാണ് ഷൂട്ടിങ്ങിലേക്ക് എത്തിയത്. സ്വന്തമായി റൈഫിൾ പോലും ഇല്ലാതെ തുടക്കകാലത്ത് പരിശീലനം നടത്തിയ വിദർഷ പിന്നീട് വായ്പയെടുത്താണ് മത്സരത്തിനാവശ്യമായ ഉപകരണങ്ങൾ സ്വന്തമാക്കിയത്.

വിദര്‍ശയും ഭർത്താവ് മനു എസ്. രവിയും ഏഷ്യൻ ഗയിംസ് വേദിയിൽ

ആദ്യഏഷ്യൻ ഗെയിംസിൽ തന്നെ രണ്ട് വെള്ളി മെഡലുകളാണ് വിദർഷ സ്വന്തമാക്കിയത്. വ്യക്തിഗത ഫൈനലിലും മെഡൽ നേടാനായാൽ ഒരേ ഏഷ്യൻ ഗെയിംസിൽ മൂന്ന് ഷൂട്ടിങ് മെഡലുകൾ നേടുന്ന അപൂർവ നേട്ടത്തിലേക്കാകും മലയാളി താരം എത്തുക.
കോഴിക്കോട് തിരുവമ്പാടി കൊച്ചാലുങ്കല്‍ വിനോദിന്റെയും അനിത വിനോദിന്റെയും മകളാണ് വിദര്‍ശ.
കൊവിഡ് മഹാമാരിക്ക് ശേഷം ഷൂട്ടിങ് റേഞ്ചില്‍ വെച്ചാണ് വിദര്‍ശ, മനു എസ്. രവിയെ പരിചയപ്പെടുന്നത്. വിദര്‍ശയുടെ സഹ ഷൂട്ടറായിരുന്ന മനുവുമായുള്ള സൗഹൃദം പിന്നീട് വിവാഹത്തില്‍ കലാശിക്കുകയായിരുന്നു.