മനുഷ്യരുടെ ഓർമകളും ബന്ധങ്ങളും അവരുടെ പെരുമാറ്റത്തെ എങ്ങനെ സ്വാധീനിക്കുന്നു എന്നതാണ് ചിത്രത്തിന്‍റെ പ്രമേയമെന്ന് സംവിധായകൻ വൈശാഖ് റീത്ത

കൊച്ചി:ജാൻ എ മൻ,മഞ്ഞുമ്മൽ ബോയ്സ്, ബാലൻ: ദി ബോയ് എന്നീ ചിത്രങ്ങളിലൂടെ ശ്രദ്ധേയനായ സംവിധായകൻ ചിദംബരം നായകനാകുന്നു. നവാഗതനായ വൈശാഖ് റീത്ത സംവിധാനം ചെയ്യുന്ന ചിത്രത്തിന് ഇതുവരെ പേരിട്ടിട്ടില്ല. അന്ന ബെൻ ആണ് നായിക.കോമഡി ഡ്രാമ വിഭാഗത്തിൽ ഒരുങ്ങുന്ന ചിത്രത്തിന് തിരക്കഥ ഒരുക്കുന്നത് പുരുഷ പ്രേതം എന്ന ചിത്രത്തിന്‍റെ തിരക്കഥാകൃത്തായ അജിത്താണ്.
മനുഷ്യരുടെ ഓർമകളും ബന്ധങ്ങളും അവരുടെ പെരുമാറ്റത്തെ എങ്ങനെ സ്വാധീനിക്കുന്നു എന്നതാണ് ചിത്രത്തിന്‍റെ പ്രമേയമെന്ന് സംവിധായകൻ വൈശാഖ് റീത്ത പറയുന്നു.
ജ്യുവൽ മേരി, ജഗദീഷ്, പ്രശാന്ത് അലക്സാണ്ടർ, മനോജ് കാന തുടങ്ങിയവരും ചിത്രത്തിലെ താരനിരയിലുണ്ട്. അജ്മൽ ഹസ്ബുള്ളയാണ് സംഗീതസംവിധാനം നിർവഹിക്കുന്നത്. രാകേഷ് ചെറുമാടം എഡിറ്റിംഗിനൊപ്പം സഹസംവിധായകനായും പ്രവർത്തിക്കുന്നു. ശ്രീലക്ഷ്മി അതിപറമ്പാണ് ചീഫ് അസോസിയേറ്റ് ഡയറക്ടർ.ജോമോൻ ജേക്കബിന്‍റെയും വൈശാഖിന്‍റെയും റീത്ത ഫിലിംസ് ലിമിറ്റഡിന്‍റെ പിന്തുണയോടെയാണ് ചിത്രം ഒരുങ്ങുന്നത്.
ഇന്ത്യ _ യു.കെ സംയുക്ത സംരംഭമായി ഒരുങ്ങുന്ന ചിത്രത്തിന്‍റെ എക്സിക്യൂട്ടീവ് പ്രൊഡ്യൂസർ കെ.സി. പ്രണവ് രാജാണ്. ചിത്രത്തിന്‍റെ പ്രീ-പ്രൊഡക്ഷൻ ജോലികൾ പുരോഗമിക്കുകയാണ്. ജനുവരിയിൽ ചിത്രീകരണം ആരംഭിക്കുമെന്നാണ് പ്രതീക്ഷിക്കുന്നത്.ഈ വർഷം പുറത്തിറങ്ങിയ രതീഷ് ബാലകൃഷ്ണൻ പൊതുവാൾ–കുഞ്ചാക്കോ ബോബൻ ചിത്രം ഒരു ദുരൂഹ സാഹചര്യത്തിൽ എന്ന സിനിമയിലൂടെ ചിദംബരം അഭിനയരംഗത്തും അരങ്ങേറ്റം കുറിച്ചിരുന്നു. ചിത്രത്തിൽ പ്രതിനായക വേഷത്തിലാണ് അദ്ദേഹം എത്തിയത്. അതേസമയം, കാന്താരയിലൂടെ ശ്രദ്ധേയനായ ഋഷഭ് ഷെട്ടിയെ നായകനാക്കി രണ്ട് ചിത്രങ്ങൾ സംവിധാനം ചെയ്യാനും ചിദംബരം കരാറിലേർപ്പെട്ടിട്ടുണ്ട്.