ബന്ധുക്കളെ യാത്രയയയ്ക്കാനായി വന്ദേഭാരത് എക്സ്പ്രസിനുള്ളിൽ കയറിയ 12 അംഗ സംഘം ട്രെയിന്റെ ഓട്ടോമാറ്റിക് വാതിലുകൾ അടഞ്ഞതോടെ അകത്തുകുടുങ്ങി,36000 രൂപ പിഴ

കാൺപൂർ സെൻട്രൽ റെയിൽവേ സ്റ്റേഷനിലാണ് ബന്ധുക്കൾക്ക് പിഴയൊടുക്കേണ്ടി വന്നത്
ഇറ്റാവ:കാൺപൂർ സെൻട്രൽ റെയിൽവേ സ്റ്റേഷനിൽ ബന്ധുക്കളെ യാത്രയയയ്ക്കാനായി വന്ദേഭാരത് എക്സ്പ്രസിനുള്ളിൽ കയറിയ 12 അംഗ സംഘം ട്രെയിന്റെ ഓട്ടോമാറ്റിക് വാതിലുകൾ അടഞ്ഞതോടെ അകത്തുകുടുങ്ങി. ബനാറസ്-ന്യൂഡൽഹി വന്ദേഭാരത് എക്സ്പ്രസിൽ ബന്ധുക്കളെ സീറ്റിൽ ഇരുത്തി യാത്രയാക്കാൻ കയറിയ സംഘത്തിനാണ് അപ്രതീക്ഷിതമായി 36000 രൂപ പിഴയൊടുക്കേണ്ടി വന്നത്.
ബന്ധുക്കളെയും ലഗേജും കോച്ചിനുള്ളിൽ കയറ്റിയ ശേഷം പുറത്തിറങ്ങാൻ വൈകിയതോടെയാണ് ട്രെയിന്റെ ഓട്ടോമാറ്റിക് വാതിലുകൾ അടഞ്ഞത്. സാധാരണഗതിയിൽ വന്ദേഭാരത് ട്രെയിനുകളുടെ വാതിലുകൾ നിശ്ചിത സ്റ്റോപ്പുകളിൽ മാത്രമേ തുറക്കുകയുള്ളൂ. കാൺപൂർ കഴിഞ്ഞാൽ ട്രെയിനിന് ന്യൂഡൽഹിയിലായിരുന്നു അടുത്ത സ്റ്റോപ്പ്. ഇതോടെ സ്ത്രീകളും കുട്ടികളുമടങ്ങുന്ന സംഘം പരിഭ്രാന്തരാവുകയും ട്രെയിൻ നിർത്തി തങ്ങളെ പുറത്തിറക്കണമെന്ന് ആവശ്യപ്പെട്ട് ബഹളം വെക്കുകയുമായിരുന്നു.
വന്ദേഭാരത് പോലൊരു പ്രീമിയം ട്രെയിൻ പാതിവഴിയിൽ നിർത്താനാവില്ലെന്ന് ജീവനക്കാർ വ്യക്തമാക്കിയതോടെ ഇവർ കോച്ചിനുള്ളിൽ വാക്കുതർക്കവും ബഹളവും ഉണ്ടാക്കി.ഇവരുടെ ബഹളം രൂക്ഷമായതോടെ ട്രെയിൻ ജീവനക്കാർ തുണ്ട്ല കൺട്രോൾ റൂമിൽ വിവരമറിയിച്ചു. കൺട്രോൾ റൂമിൻ്റെ പ്രത്യേക നിർദ്ദേശപ്രകാരം രാവിലെ 10:49-ന് ട്രെയിൻ ഇറ്റാവ ജംഗ്ഷനിൽ നിർത്തി. സ്റ്റേഷൻ സൂപ്രണ്ട് പി.എം. മീണ, ആർപിഎഫ് ഇൻസ്പെക്ടർ ദിനേശ് കുമാർ സിംഗ്, ജിആർപി ഇൻസ്പെക്ടർ യദുവീർ സിംഗ് എന്നിവരുടെ നേതൃത്വത്തിലുള്ള സംഘം സ്ഥലത്തെത്തി 12 പേരെയും ട്രെയിനിൽ നിന്ന് പുറത്തിറക്കി ആർപിഎഫ് പോസ്റ്റിലേക്ക് കൊണ്ടുപോയി.
ടിക്കറ്റോ പ്ലാറ്റ്ഫോം ടിക്കറ്റോ ഇല്ലാതെ ട്രെയിനിൽ പ്രവേശിച്ചതിനും കോച്ചിൽ ബഹളമുണ്ടാക്കിയതിനും വാണിജ്യ വിഭാഗം ഉദ്യോഗസ്ഥർ ഒരാൾക്ക് 3000 രൂപ വീതം ആകെ 36000 രൂപ പിഴ ചുമത്തി. മേലിൽ ഇത്തരം അബദ്ധങ്ങൾ ആവർത്തിക്കരുതെന്ന കർശന താക്കീത് നൽകിയ ശേഷമാണ് ഇവരെ വിട്ടയച്ചത്.






