ഉദ്ഘാടനം മന്ത്രി വി.ശിവൻകുട്ടി, പൂജപ്പുരയിലെ സ്ത്രീകളുടെയും കുട്ടികളുടെയും ആശുപത്രിയിൽ രാവിലെ 11ന്

തിരുവനന്തപുരം:കുട്ടികളിലെ സ്വഭാവ വൈകല്യം.ചലന വൈഷമ്യങ്ങൾ,സംസാരബുദ്ധിമുട്ട്,ഓട്ടിസം,ഹൈപ്പർ അക്ടിവിറ്റി എന്നിവ ഉൾപ്പെടെ വളർച്ചാവൈകല്യങ്ങൾക്ക് ഫലപ്രദമെന്ന് ഇതിനകം തെളിഞ്ഞ ആയുർവേദ ചികിത്സാ പദ്ധതിയായ ‘സ്നേഹധാര’യുടെ പത്താം വാർഷികം ഫെബ്രുവരി 18ന് രാവിലെ 11ന് പൊതു വിദ്യാഭ്യാസ മന്ത്രി വി.ശിവൻകുട്ടി പൂജപ്പുരയിലെ സ്ത്രീകളുടെയും കുട്ടികളുടെയും ആശുപത്രിയിൽ ഉദ്ഘാടനം ചെയ്യും.

മന്ത്രി വി.ശിവൻകുട്ടി

തിരുവനന്തപുരം ജില്ലാ പഞ്ചായത്ത്,ഭാരതീയ ചികിത്സാ വകുപ്പ്,ഗവ.ആയുർവേദ കോളെജ് എന്നിവയുടെ നേതൃത്വത്തിൽ ഗവ.ആയുർവേദ കോളെജിലെ ബാലചികിത്സാവിഭാഗത്തിനാണ് പദ്ധതിയുടെ നടത്തിപ്പ്.ദേശീയ,സംസ്ഥാന പുരസ്കാരങ്ങൾക്കർഹമായ ഈ ചികിത്സാ പദ്ധതിയിൽ ചികിത്സ സൌജന്യമാണ്.മരുന്നുകൾക്കു പുറമെ സ്പീച്ച് തെറാപ്പി,ഫിസിയോ തെറാപ്പി,ബിഹേവിയർ തെറാപ്പി,സൈക്കോതെറാപ്പി എന്നിവയും സൌജന്യമായതാണ് ലഭിക്കുന്നത്.
തിരുവനന്തപുരം ജില്ലാ പഞ്ചായത്ത് പ്രസിഡൻ്റ് വി.പ്രിയദർശിനിയുടെ അധ്യക്ഷതയിൽ കൂടുന്ന യോഗത്തിൽ വൈസ് പ്രസിഡൻ്റ് ബി.പി മുരളി,ആയുർവേദ മെഡിക്കൽ വിദ്യാഭ്യാസ ഡയറക്ടർ ഡോ.ടി.ഡി ശ്രീകുമാർ, ഐഎസ് എം ഡയറക്ടർ ഡോ.കെ.എസ് പ്രിയ,ഐഎസ് എം ഡിഎംഒ ഡോ.മിനി എസ് പൈ,ആയുർവേദ കോളെജ് പ്രിൻസിപ്പൽ ഡോ.വി.കെ സുനിത, ജനപ്രതിനിധികൾ,കോളജധികൃതർ എന്നിവർ പങ്കെടുക്കും.പദ്ധതി കോർഡിനേറ്റർ ഡോ.രോഷ്നി അനിരുദ്ധൻ ചികിത്സാവിവരണം നിർവഹിക്കും.തുടർന്ന് കുട്ടികൾക്കുള്ള പരിശീലന ക്യാമ്പും നടക്കും.

2015 മാർച്ച് 26ന് നടന്ന ആദ്യ മെഡിക്കൽ സ്ക്രീനിംഗ് ക്യാമ്പിൽ പങ്കെടുത്ത 103 കുട്ടികൾക്ക് വിദഗ്ധ ചികിത്സ നൽകിക്കൊണ്ട് തുടങ്ങിയ ഈ പദ്ധതിയിലേക്ക് കൂടുതൽ കുഞ്ഞുങ്ങൾ വന്നെത്തിയതോടെ പൂജപ്പുരയിലെ ഗവൺമെൻ്റ് ആയുർവേദ കോളേജ് സ്ത്രീകളുടെയും കുട്ടികളുടെയും ആശുപത്രിയിൽ ഇതിനായി 20 ബെഡ്ഡുള്ള പ്രത്യേക ഐ.പി വാർഡ് ആരംഭിച്ചു.പദ്ധതിയുടെ വിജയത്തെ തുടർന്ന് 2017ൽ നാല് ഉപകേന്ദ്രങ്ങൾ ആരംഭിച്ചു.

വർക്കല,പാറശ്ശാല, പാലോട്, കിഴുവിലം ഗവൺമെൻ്റ് ആയുർവേദ ആശുപത്രികളിലായിരുന്നു ഇവ.
വർക്കല, പാറശ്ശാല കേന്ദ്രങ്ങളിൽ രോഗികളുടെ വരവ് വർധിച്ചതോടെ ഔട്ട്‌പേഷ്യൻ്റ് പഞ്ചകർമ്മ, സ്പീച്ച് തെറാപ്പി, ഫിസിയോതെറാപ്പി സേവനങ്ങളും ആരംഭിച്ചു. സംസ്ഥാന കോ-ഓർഡിനേഷൻ കമ്മിറ്റിയുടെ അനുമതിയോടെ അധിക ജീവനക്കാരെയും നിയമിച്ചു. ഈ വർഷം നെയ്യാറ്റിൻകര, പുളിമാത്ത്, വെങ്ങാനൂർ എന്നീ സർക്കാർ ആയുർവേദ ആശുപത്രികളിൽ പുതിയ കേന്ദ്രങ്ങൾ കൂടി ആരംഭിക്കാനുള്ള നടപടികൾ പുരോഗമിക്കുകയാണ് .
തിരുവനന്തപുരം ജില്ലാ പഞ്ചായത്തിന് സംസ്ഥാന പുരസ്കാരമായ സ്വരാജ് ട്രോഫി (2017, 2018, 2019) നേടുന്നതിനും, ദേശീയ തലത്തിൽ ദീൻ ദയാൽ ഉപാധ്യായ ശാക്തീകരണ പുരസ്കാരം നേടുന്നതിനും ഈ പദ്ധതി പങ്കു വഹിച്ചു.

ഡോ. രോഷ്നി അനിരുദ്ധൻ

പദ്ധതി കോ-ഓർഡിനേറ്റനായ ഡോ. രോഷ്നി അനിരുദ്ധന് 2018–19 വർഷത്തിൽ മികച്ച പ്രോജക്റ്റ് കോ-ഓർഡിനേറ്റർ സംസ്ഥാന പുരസ്കാരം ലഭിച്ചിരുന്നു