‘പട്ടിയെ പേപ്പട്ടിയാക്കി അടിച്ചു കൊല്ലുന്ന സമീപനമാണ് ഇവിടത്തെ ചില മാധ്യമങ്ങളുടേത്’

തിരുവനന്തപുരം:മാധ്യമങ്ങൾ ആഘോഷിക്കുന്ന ശബരിമല നെയ് അഴിമതിക്ക് പിന്നിൽ സംസ്ഥാനത്തേയും കർണാടക- തമിഴ്നാട് സംസ്ഥാനങ്ങളിലേയും നെയ്യുല്പാദക ലോബിയാണെന്നാണ് ദേവസ്വം ബോർഡിലെ ചില ഉന്നതരോട് അന്വേഷിച്ചതിൽ നിന്ന് അറിയുന്നതെന്ന് ഐ ആൻ്റ് പിആർഡി റിട്ട.അഡീഷണൽ ഡയറക്ടർ എൻ.ഇ മേഘനാദ്.സ്വകാര്യ കരാറുകാരുമായി ബന്ധമുള്ള ലോബി ഏതാനും മാധ്യമ പ്രവർത്തകരുമായി ചേർന്ന് മെനഞ്ഞ കഥയുടെ പരിണിതിയാണ് ” നെയ് അഴിമതി “.സർക്കാർ സ്ഥാപനമായ മിൽമയുമായി നെഗോഷ്യേറ്റ് ചെയ്ത് നെയ് വാങ്ങുന്നു. ഇതിൽ എന്താണ് അഴിമതി ? ടെണ്ടർ ക്ഷണിച്ച് തമിഴന്മാരുടെ ഡാൽഡ കലർന്ന നെയ് വാങ്ങിക്കുന്നതിലും നല്ലതല്ലേ ഒരു സർക്കാർ ഉത്പന്നം ഉപയോഗിക്കുന്നത് എന്ന ചോദ്യം പോലും ആരും ഉന്നയിക്കുന്നില്ലെന്നും മേഘനാദ് ചോദിക്കുന്നു.

എൻ ഇ മേഘനാദ്

എൻ.ഇ മേഘനാദ് എഴുതിയത് വായിക്കാം:

‘മാധ്യമങ്ങൾ ആഘോഷിക്കുന്ന ശബരിമല നെയ് അഴിമതിക്ക് പിന്നിൽ സംസ്ഥാനത്തേയും കർണാടക- തമിഴ്നാട് സംസ്ഥാനങ്ങളിലേയും
നെയ്യുല്പാദക ലോബിയാണെന്നാണ് ദേവസ്വം ബോർഡിലെ ചില ഉന്നതരോട് അന്വേഷിച്ചതിൽ നിന്ന് അറിയുന്നത്.
മിൽമ എന്നത് സർക്കാർ സ്ഥാപനമാണ്. മിൽമാ ഉത്പന്നങ്ങളെ സംബന്ധിച്ച് നാളിതുവരെ ഗൗരവമുള്ള ഒരാരോപണവും ഉയർന്നിട്ടില്ല. ശബരിമലയിൽ മുൻകാലങ്ങളിൽ തമിഴ്നാട് – കർണാടക സംസ്ഥാനങ്ങളിലെ കരാറുകാരാണ് കേരളത്തിലെ ചില സ്ഥാപനങ്ങൾ മുഖേന നെയ് നൽകിവന്നിരുന്നത്. നെയ് എന്ന പേരിൽ ഡാൽഡയിൽ നെയ് ചേർത്ത് ലക്ഷങ്ങളാണ് ഈ ലോബി തട്ടിയെടുത്തത്. ശബരിമലയിൽ ആടിയ ശിഷ്ടം നെയ്യും പുറത്തു നിന്ന് വാങ്ങുന്ന നെയ്യുമാണ് അരവണ , അപ്പം എന്നിവയുടെ നിർമ്മാണത്തിന് ഉപയോഗിക്കുന്നത്.
പ്രശാന്ത് പ്രസിഡൻ്റ് ആയപ്പോൾ അധികം ആവശ്യമായ നെയ് വാങ്ങാൻ മിൽമയുമായി കരാറുണ്ടാക്കി. ലക്ഷങ്ങൾ തട്ടാൻ അവസരം നഷ്ടമായ സ്വകാര്യ ലോബി അന്നത്തെ രാഷ്ട്രീയ നേതൃത്വത്തെ സമീപിച്ചെങ്കിലും നടന്നില്ല . പുതിയ ഭരണം വന്ന ശേഷമാണ് ……. പ്രസാദത്തിൽ ഉപയോഗിക്കുന്ന നെയ്യിന് ഗുണനിലവാരമില്ലെന്ന ആരോപണമുയർന്നത്. സ്വകാര്യ. കരാറുകാരുമായി ബന്ധമുള്ള ലോബി ഏതാനും മാധ്യമ പ്രവർത്തകരുമായി ചേർന്നാണ് കഥ മെനഞ്ഞത്. അതിൻ്റെ പരിണിതിയാണ് ” നെയ് അഴിമതി ” .
സർക്കാർ സ്ഥാപനമായ മിൽമയുമായി നെഗോഷ്യേറ്റ് ചെയ്ത് നെയ് വാങ്ങുന്നു. ഇതിൽ എന്താണ് അഴിമതി ? ടെണ്ടർ ക്ഷണിച്ച് തമിഴന്മാരുടെ ഡാൽഡ കലർന്ന നെയ് വാങ്ങിക്കുന്നതിലും നല്ലതല്ലേ ഒരു സർക്കാർ ഉത്പന്നം ഉപയോഗിക്കുന്നത് എന്ന ചോദ്യം പോലും ആരും ഉന്നയിക്കുന്നില്ല. പ്രശാന്ത് അഴിമതിക്കാരനാണെന്ന് വരുത്താൻ നിലവിലെ ഭരണ നേതൃത്വത്തിലുള്ളവർക്ക് താത്പര്യമുണ്ട്. സ്വാഭാവികമായും സാമ്പത്തിക നേട്ടം സ്വകാര്യ ഏജൻസികളെ വച്ചാൽ ഉണ്ടാകും.
ഏതെങ്കിലും സ്വകാര്യ സ്ഥാപനത്തിന് ഏകപക്ഷീയ കരാർ നൽകിയാൽ ന്യായമായും സംശയിക്കാം. KSRTC , KSEB പോലെ സർക്കാരിനു മേൽക്കൈ ഉള്ള സ്ഥാപനത്തോട് പെട്ടന്ന് അയിത്തത്തിനു കാരണം സ്വകാര്യ ലോബിക്കു വേണ്ടിയുള്ള നിക്ഷിപ്ത താത്പര്യമാണ്. ഇത് ആഘോഷിക്കുന്ന എല്ലാ മാധ്യമങ്ങളിലും വരുന്ന വാർത്ത ഒരു കേന്ദ്രത്തിൽ നിന്ന് ഉത്പാദിപ്പിച്ച് നൽകുന്നതാണെന്ന് വായിച്ചാൽ മനസ്സിലാവും
. അഴിമതിക്കാരനായി മാധ്യമങ്ങൾ ചാപ്പ കുത്തുന്നവർക്കു വേണ്ടി സംസാരിക്കാൻ എല്ലാവർക്കും മടിയാണ്. അല്ലെങ്കിൽ ഇടതു പക്ഷം എന്തുകൊണ്ടാണ് മിൽമയുമായുള്ള ഇടപാട് ഉയർത്തിക്കാട്ടാത്തത് ? പട്ടിയെ പേപ്പട്ടിയാക്കി അടിച്ചു കൊല്ലുന്ന സമീപനമാണ് ഇവിടത്തെ ചില മാധ്യമങ്ങളുടേത്’