ഫെലോഷിപ്പ് 50,000 രൂപ, മൂന്നാർ തേയിലത്തോട്ടം മേഖലയിലെ സ്ത്രീത്തൊഴിലാളികളുടെ അധ്വാനവും അതിജീവനവും സംബന്ധിച്ച പഠന ഗ്രന്ഥം രചിക്കുന്നതിന്

തിരുവനന്തപുരം:കേരളവികസനവുമായി ബന്ധപ്പെട്ട ഗവേഷണപുസ്തകരചനയ്ക്കുള്ള ഈ വർഷത്തെ എസ്. അനിൽ രാധാകൃഷ്ണൻ ഫെല്ലോഷിപ്പ് മാതൃഭൂമി കൊച്ചി യൂണിറ്റിലെ ചീഫ് സബ് എഡിറ്റർ ടി. പി. ഗായത്രിക്ക്.
മൂന്നാർ തേയിലത്തോട്ടം മേഖലയിലെ സ്ത്രീത്തൊഴിലാളികളുടെ അധ്വാനവും അതിജീവനവും സംബന്ധിച്ച പഠന ഗ്രന്ഥം രചിക്കുന്നതിനാണ് ഫെലോഷിപ്പ്. 50,000 രൂപയാണ് ഫെല്ലോഷിപ്പ് തുക.

എസ്. അനിൽ രാധാകൃഷ്ണൻ

2021 ൽ അന്തരിച്ച, ‘ദ ഹിന്ദു’ സ്റ്റേറ്റ് ബ്യൂറോ ചീഫ് എസ്. അനിൽ രാധാകൃഷ്ണൻ്റെ കുടുംബവും കേസരി സ്മാരക ജേണലിസ്റ്റ് ട്രസ്റ്റും ചേർന്നാണ് ഫെല്ലോഷിപ്പ് ഏർപ്പെടുത്തിയത്.

കേരളത്തിലെ വിവിധ വികസന മേഖലകളിലെ പഠനങ്ങൾക്കായി ഈ വർഷം ലഭിച്ച പ്രൊപ്പോസലുകളിൽ നിന്ന് കേരള സർവകലാശാല ജേണലിസം വകുപ്പു മുൻമേധാവി പ്രൊഫ. വി. വിജയകുമാർ, കേരള രാജ്ഭവൻ മുൻ പി.ആർ.ഒ. എസ്.ഡി. പ്രിൻസ്, പി.ആർ.ഡി മുൻ അഡീഷണൽ ഡയറക്ടർ പി.എസ്.രാജശേഖരൻ, കേസരി സ്മാരക ജേണലിസ്റ്റ് ട്രസ്റ്റ് ചെയർമാൻ ഷില്ലർ സ്റ്റീഫൻ, സെക്രട്ടറി അനുപമ ജി. നായർ, എസ്.എസ്.കെ. സംസ്ഥാന പ്രോഗ്രാം ഓഫീസർ എസ്.എസ്. സിന്ധു എന്നിവരടങ്ങിയ സമിതിയാണ് തെരഞ്ഞെടുപ്പ് നടത്തിയത്.

വൈക്കം സ്വദേശിനിയായ ടി.പി. ഗായത്രി 2002 മുതൽ പത്രപ്രവർത്തന രംഗത്ത് പ്രവർത്തിക്കുന്നു. ‘ കൊളുന്ത് : ഒരു പെൺ സമരത്തിൻ്റെ ആത്മഭാഷണം’ എന്ന പുസ്തകം രചിച്ചിട്ടുണ്ട്.2026 ജൂൺ 23ന്
പഠന ഗ്രന്ഥം തിരുവനന്തപുരത്ത് പ്രകാശനം ചെയ്യുകയാണ് ലക്ഷ്യം.