വർദ്ധിപ്പിച്ച നിരക്കിലുള്ള ഡിഎ/ഡിആർ ഫെബ്രുവരി മാസത്തെ ശമ്പളത്തോടും പെൻഷനോടും ഒപ്പം
തിരുവനന്തപുരം :കേരള സ്റ്റേറ്റ് ഇലക്ട്രിസിറ്റി ബോർഡ് ലിമിറ്റഡിലെ ജീവനക്കാർക്കും പെൻഷൻകാർക്കും ആശ്വാസമായി ക്ഷാമബത്തയും (ഡിഎ) ക്ഷാമാശ്വാസവും (ഡിആർ) വർദ്ധിപ്പിച്ചതായി വൈദ്യുതി മന്ത്രി കെ. കൃഷ്ണൻകുട്ടി .

വൈദ്യുതി മന്ത്രി കെ. കൃഷ്ണൻകുട്ടി

കെ.എസ്.ഇ.ബി ചെയർമാൻ ആൻഡ് മാനേജിംഗ് ഡയറക്ടറുടെ ശുപാർശ പരിഗണിച്ചാണ് 2024 ജനുവരി ഒന്ന് മുതൽ 2025 ജൂലൈ ഒന്ന് വരെയുള്ള നാല് ഗഡു ഡിഎ/ഡിആർ വർദ്ധനവിന് സർക്കാർ അനുമതി നൽകിയത്. പുതുക്കിയ നിരക്കുകൾ പ്രകാരം ജീവനക്കാർക്കും പെൻഷൻകാർക്കുമുള്ള ആനുകൂല്യങ്ങളിൽ ഗണ്യമായ വർദ്ധനവുണ്ടാകും.
ഈ ഉത്തരവ് പ്രകാരം 2024 ജനുവരി ഒന്ന് മുതൽ നിലവിലുള്ള 33 ശതമാനത്തിൽ നിന്ന് 37 ശതമാനമായും 2024 ജൂലൈ ഒന്ന് മുതൽ ഇത് 40 ശതമാനമായും വർദ്ധിക്കും. കൂടാതെ 2025 ജനുവരി ഒന്ന് മുതൽ 42 ശതമാനമായും 2025 ജൂലൈ ഒന്ന് മുതൽ 44 ശതമാനമായും ക്ഷാമബത്ത നിരക്കുകൾ പുതുക്കി നിശ്ചയിച്ചിട്ടുണ്ട്. ജീവനക്കാരുടെ ക്ഷേമം മുൻനിർത്തിയാണ് സർക്കാർ ഈ നടപടി സ്വീകരിച്ചിരിക്കുന്നത്.
വർദ്ധിപ്പിച്ച നിരക്കിലുള്ള ക്ഷാമബത്തയും ക്ഷാമാശ്വാസവും 2026 ഫെബ്രുവരി മാസത്തെ ശമ്പളത്തോടും പെൻഷനോടും കൂടി വിതരണം ചെയ്തു തുടങ്ങുന്നതാണ്. മുൻകാല കുടിശ്ശികയുടെ വിതരണം സംബന്ധിച്ച തീരുമാനം കെ.എസ്.ഇ.ബി.യുടെ സാമ്പത്തിക സ്ഥിതി മെച്ചപ്പെടുന്നതനുസരിച്ച് ബോർഡ് പിന്നീട് കൈക്കൊള്ളുന്നതാണെന്നും മന്ത്രി കൃഷ്ണൻകുട്ടി അറിയിച്ചു.