ഗാങ്സ്റ്റർ ആക്ഷൻ – കോമഡി എൻ്റർടെയ്നറായി ‘മട്ടാഞ്ചേരി മാഫിയ’

കൊച്ചി:‘ഉണ്ട’ എന്ന സൂപ്പർ ഹിറ്റ്‌ ചിത്രത്തിന് ശേഷം മമ്മൂട്ടിയെ നായകനാക്കി ഖാലിദ് റഹ്മാൻ സംവിധാനം ചെയ്യുന്ന ‘മട്ടാഞ്ചേരി മാഫിയ’യുടെ ടൈറ്റിൽ പോസ്റ്റർ സോഷ്യൽ മീഡിയയിൽ മെഗാഹിറ്റ്. മമ്മൂട്ടിയോടൊപ്പം ആസിഫ് അലി,നസിലിൻ എന്നിവർ പ്രധാന വേഷങ്ങളിൽ എത്തുന്നു എന്ന പ്രത്യേകതയും ചിത്രത്തിനുണ്ട്. മലയാള സിനിമയിൽ തീപ്പൊരി പ്രതീക്ഷകൾ ഉയർത്തുന്ന ഗാങ്സ്റ്റർ ആക്ഷൻ – കോമഡി എൻ്റർടെയ്നറായി ഒരുങ്ങുന്ന ഈ ചിത്രം, മെഗാസ്റ്റാർ മമ്മൂട്ടിയുടെ കരിയറിൽ മറ്റൊരു ശ്രദ്ധേയമായ കഥാപാത്രം ആയിരിക്കുമെന്ന് അണിയറ പ്രവർത്തകർ ഉറപ്പുപറയുന്നു.
യുവതാരങ്ങളുമായുള്ള കൂട്ടുകെട്ട് പ്രേക്ഷക ആവേശം ഇരട്ടിയാക്കുന്നുണ്ട്. ചിത്രം സംവിധാനം ചെയ്യുന്നത് യുവ സംവിധായകനായ ഖാലിദ് റഹ്മാൻ ആണ്. ഖാലിദ് റഹ്മാൻ്റെ ആലപ്പുഴ ജിംഖാനയും, തല്ലുമാലയും , അനുരാഗ കരിക്കിൻ വെള്ളവും ഏറെ ശ്രദ്ധേയമായിരുന്നു. മട്ടാഞ്ചേരി മാഫിയയിലൂടെ പുതുമയാർന്ന വ്യത്യസ്ത സിനിമാനുഭവം പ്രതീക്ഷിക്കുകയാണ് പ്രേക്ഷകർ.
പ്ലാൻ ബി മോഷൻ പിച്ചേഴ്സിൻ്റെയും, യൂണിവേഴ്സൽ സിനിമസിൻ്റെയും ബാനറിൽ ബി.രാകേഷും ഖാലിദ് റഹ്മാനും ചേർന്നാണ് ചിത്രം നിർമ്മിക്കുന്നത്. ചിത്രത്തിന്‍റെ തിരക്കഥ ഒരുക്കുന്നത് നിയോഗ് കൃഷ്ണ , ഷറഫു -സുഹാസ് , തശ്രീഖ് അബ്ദുൽ സലാം, ക്യാമറ ജിംഷി ഖാലിദ്, എഡിറ്റർ നൗഫൽ അബ്ദുല്ല, മ്യൂസിക് റെക്സ് വിജയൻ, ബി ജി എം സുഷിൻ ശ്യാം, മേക്കപ്പ് റോണക്സ് സേവിയർ , സൗണ്ട് ഡിസൈൻ വിഷ്ണു ഗോവിന്ദ് , പ്രൊഡക്ഷൻ ഡിസൈൻ മാനവ് സുരേഷ് , കോസ്റ്റ്യൂം മാഷർ ഹംസ, വി എഫ് എക്സ് ഡിജി ബ്രിക്സ്, ലൈൻ പ്രൊഡ്യൂസർ വിഷാദ് കെ എൽ, സ്റ്റിൽസ് രോഹിത് കെ സുരേഷ്, ടൈറ്റിൽ ഡിസൈൻ ചാർളി ആൻഡ് ദി ബോയ്സ്, ഡിജിറ്റൽ മാർക്കറ്റിംഗ് ഒബ്സ്ക്യൂറ.