പുട്ടുണ്ടാക്കിയ കഥ രുചികരമായി അനുഭവിപ്പിക്കുകയാണ് നോവലിസ്റ്റും കഥാകൃത്തും പ്രവാസിയുമായ ദിലിപ്രസാദ് സുരേന്ദ്രൻ

ദിലിപ്രസാദ് സുരേന്ദ്രൻ

പുട്ടുണ്ടാക്കിയ കഥ രസകരമായി അവതരിപ്പിക്കുകയാണ് നോവലിസ്റ്റും കഥാകൃത്തും പ്രവാസിയുമായ ദിലിപ്രസാദ് സുരേന്ദ്രൻ.സ്വന്തം വീട്ടിലെ ആ അടുക്കളക്കഥ എഴുത്തിൻ്റെ രുചികരമായ അനുഭവമായി മാറിയത് വായിച്ചറിയാം:
‘പുട്ടിൻ്റെ ഗുണങ്ങളെ കുറിച്ചു ചുമ്മായൊന്ന് ഭാര്യക്ക് ക്ലാസ് എടുത്തതാണ്.
പുട്ട് എട്ടുഗുണം..
ആറിയാൽ ആറുഗുണം..
മുറുന്നാൽ മൂന്നുഗുണം..
ഇതെല്ലാം പറയുമ്പോൾ ലവൾ എണ്ണം പറഞ്ഞു തലയാട്ടിയത് ഇതിനായിരുന്നു, എന്ന് അപ്പോൾ അറിഞ്ഞില്ല.
അന്നേരം മുതൽ പണിയെടുക്കാൻ തുടങ്ങിയതാണ്..ദാ ഇതുവരെ വിശ്രമിച്ചിട്ടില്ല.
ആദ്യം തേങ്ങ പൊതിക്കാൻ പറഞ്ഞു..
മഴയത്ത് കുടപിടിച്ചു നിന്നാണ് തേങ്ങ റെഡിയാക്കിയത്. അപ്പോ പറയുന്നു, ചിരട്ട പൊട്ടിച്ചു തേങ്ങ കഷണങ്ങൾ ആക്കണമെന്ന്. ആയുധം കൊണ്ടുള്ള കളിയാണ് എന്നറിഞ്ഞിട്ടും ഒരു കരുണയും കിട്ടിയില്ല.
തേങ്ങ കഷണങ്ങളാക്കി കൊണ്ടുചെന്നപ്പോൾ പറയുകയാണ്, സവാള തൊലി കളഞ്ഞു കൊടുക്കണമെന്ന്, അതുകഴിഞ്ഞു മുഴുവൻ സവാള കിറുകിരെ അരിഞ്ഞു തള്ളാമെന്ന് കരുതിയപ്പോൾ പറയുകയാണ് സവാള മുറിക്കാൻ പാടില്ലെന്ന്.

ഇഞ്ചി വൃത്തിയാക്കിച്ചു, വെളുത്തുള്ളി തോൽ കളയിച്ചു, തക്കാളി കഴുകിച്ചു. ഇത്രയെല്ലാം കഴിഞ്ഞപ്പോൾ കുതിർത്ത കടലയും, മുഴുവൻ സവാളയും തക്കാളിയും തേങ്ങ കഷണങ്ങളും പട്ടയും ഗ്രാമ്പുവും ഏലക്കായും കുരുമുളകും തക്കോലവും ഉപ്പും മഞ്ഞൾപൊടിയും കൂടി കുക്കറിലിട്ട് അടച്ചു അടുപ്പിൽ വെച്ചിട്ട് മ്മളെ വിസിൽ എണ്ണാൻ നിറുത്തി.
കൂടെയൊരു ഭീഷണിയും, കൃത്യം ആറ് വിസിൽ അടിക്കണം ഒന്ന് കുറയാനോ കൂടുവാനോ പാടില്ലാത്രേ. അങ്ങനെ വിസിൽ പരിപാടി പൂർത്തിയാക്കിയപ്പോ പറയുകയാണ്, കുക്കർ തണുത്തിട്ട്, കുക്കറിൽ നിന്ന് കടല വേർത്തിരിക്കണമത്രേ.

ദിലിപ്രസാദ് സുരേന്ദ്രനും കുടുംബവും

കടല തിരഞ്ഞു മാറ്റുന്ന നേരത്ത് ലവൾ മിക്സി മുന്നിലോട്ട് വെച്ചുതന്നു. ബാക്കിയെല്ലാം കൂടി മിക്സിയിലോട്ട് ഇട്ടോളാന് പറഞ്ഞു. അതെല്ലാം കൂടി അരച്ചു മസാലയാക്കി, കടുകും കറിവേപ്പിലയും പച്ചമുളകും മൂപ്പിച്ച ചീനച്ചട്ടിയിലേക്ക്, മുളകുപൊടിയും ഇച്ചിരി മല്ലിപ്പൊടിയും ചേർത്തിളക്കിയതിൽ തട്ടി മിക്സിയിലെ വെള്ളവും ചേർത്തിളക്കിയപ്പോൾ, ൻ്റെ സാറേ.. അതുവരെ അധ്വാനിച്ച ക്ഷീണമെല്ലാം മറന്നുപോയി.
പാത്രത്തിലേക്ക് ആവിപറക്കുന്ന ചിരട്ടപ്പുട്ട് വെച്ചു, അതിലേക്ക് കടലക്കറി കോരിയൊഴിച്ചു, അതിൻ്റെ മേൽ പപ്പടം വെച്ചു, കൂട്ടത്തിൽ ഒരു കട്ടനും കൂടി കൊണ്ടുവച്ചു തന്നപ്പോൾ അതുവരെ ഉണ്ടായിരുന്ന ക്ഷീണമെല്ലാം പമ്പകടന്നു.
പിന്നെ പോരാട്ടമായിരുന്നു, പൊരിഞ്ഞ പോരാട്ടം’