കർണാടക വനംവകുപ്പിന്‍റെ അനാസ്ഥയ്ക്കെതിരെ നാട്ടുകാരുടെ പ്രതിഷേധം

ബംഗളുരു:വീടിനുള്ളിലിരുന്ന് ടിവി കാണുന്നതിനിടെ aമുന്നിലേക്ക് ഒരു പുലി കടന്നുവന്നതിൻ്റെ നടുക്കത്തിൽനിന്ന് കർണാടകയിലെ തുമകൂരു ജില്ലയിലുള്ള ബണ്ടിഗൗഡനപാല്യ ഗ്രാമത്തിലെ ചിക്കമരിയപ്പയും ഭാര്യ നരസമ്മയും. പുലിയെ കൺമുന്നിൽ അപ്രതീക്ഷിതമായി കണ്ടതിന്‍റെ ആഘാതത്തിൽ യുവതിയായ നരസമ്മ ബോധരഹിതയായി കുഴഞ്ഞുവീണു.
ദമ്പതികൾ വീട്ടിലിരുന്ന് ടിവി കാണുകയായിരുന്നു. ഇതിനിടെ വീടിന് പുറത്ത് കെട്ടിയിട്ടിരുന്ന ആട്ടിൻകുട്ടിയെ പിടികൂടിയ പുലി, തൊട്ടുപിന്നാലെ ചിക്കമരിയപ്പയുടെ വീടിനുള്ളിലേക്ക് പാഞ്ഞുകയറി.സ്വീകരണമുറിയിലേക്ക് പുലി കടന്നുവന്നത് കണ്ട ഇരുവരും പരിഭ്രാന്തരായി. മനസ്സാന്നിധ്യം വീണ്ടെടുത്ത് എങ്ങനെ വീടിന് പുറത്തേക്ക് ഓടിരക്ഷപ്പെട്ടുവെന്ന് ഇരുവർക്കും ഇപ്പോഴും ഓർമയില്ല. ഉടൻതന്നെ വാതിലടച്ച് പുലിയെ വീടിനുള്ളിൽത്തന്നെ പൂട്ടിയിട്ടു.അതിനുള്ളിൽ കൺമുന്നിൽ പുലിയെ കണ്ടതിന്‍റെ ഭീതി താങ്ങാനാവാതെ നരസമ്മ വീടിന് പുറത്ത് കുഴഞ്ഞുവീണു.
സംഭവമറിഞ്ഞ് ഓടിക്കൂടിയ നാട്ടുകാർ ഉടൻതന്നെ പൊലീസിനെയും വനംവകുപ്പ് ഉദ്യോഗസ്ഥരെയും വിവരമറിയിച്ചു. പിന്നാലെ സ്ഥലത്തെത്തിയ ഉദ്യോഗസ്ഥർ പുലിയെ പിടികൂടാനുള്ള ദൗത്യം ആരംഭിച്ചു. ഇതിനിടെ, വനംവകുപ്പിന്‍റെ അനാസ്ഥയ്ക്കെതിരെ നാട്ടുകാരുടെ ഭാഗത്തുനിന്ന് ശക്തമായ പ്രതിഷേധവുമുണ്ടായി. കഴിഞ്ഞ ഒരു മാസത്തോളമായി ഗ്രാമത്തിൽ പുലിയുടെ സാന്നിധ്യവും നീക്കവും ശ്രദ്ധയിൽപ്പെട്ടിരുന്നുവെന്നും, പലതവണ പരാതി നൽകിയിട്ടും വനംവകുപ്പ് യാതൊരു മുൻകരുതൽ നടപടിയും സ്വീകരിച്ചില്ലെന്നുമാണ് നാട്ടുകാരുടെ ആരോപണം. സ്ഥലത്തെത്തിയ റേഞ്ച് ഫോറസ്റ്റ് ഓഫീസർ ചൈത്രയ്ക്ക് നേരെയും നാട്ടുകാർ പ്രതിഷേധമുയർത്തി. ഒടുവിൽ, ഏകദേശം ആറ് മണിക്കൂർ നീണ്ട കഠിനമായ ദൗത്യത്തിനൊടുവിൽ കൂടും വലകളും ഉപയോഗിച്ച് വനംവകുപ്പ് ഉദ്യോഗസ്ഥർ പുലിയെ വീട്ടിനുള്ളിൽ നിന്നും സുരക്ഷിതമായി പിടികൂടി.