തകരാർ പരിഹരിക്കാനുള്ള തീവ്രശ്രമം തുടരുകയാണെന്ന് മൈക്രോസോഫ്റ്റ് ടീം

ന്യൂയോർക്ക്:മൈക്രോസോഫ്റ്റിൽ സാങ്കേതിക തകരാർ.ഇതേ തുടർന്ന് ഒട്ടേറെ ഉപയോക്താക്കളുടെ സേവനം തടസപ്പെട്ടു. തകരാർ പരിഹരിക്കാനുള്ള തീവ്രശ്രമം തുടരുകയാണെന്ന് മൈക്രോസോഫ്റ്റ് ടീം അറിയിച്ചു.

ടീംസ്, ഔട്ട്‌ലുക്ക്, മൈക്രോസോഫ്റ്റിൻ്റെ എഐ സോഫ്റ്റ്‌വെയറായ കോപൈലറ്റ് എന്നിവ ഉൾപ്പെടെയുള്ള സേവനങ്ങളാണ് തടസപ്പെട്ടത്. ഇത് ഇന്ത്യ ഉൾപ്പെടെ 74-ലധികം രാജ്യങ്ങളിലെ ലക്ഷക്കണക്കിന് ഉപയോക്താക്കളെയും സ്ഥാപനങ്ങളെയും ബാധിച്ചിട്ടുണ്ട്.മൈക്രോസോഫ്റ്റിന്റെ സേവനങ്ങൾ തടസ്സപ്പെട്ടത് പ്രമുഖ നിർമ്മിത ബുദ്ധി (AI) പ്ലാറ്റ്‌ഫോമുകളായ ഓപ്പൺഎഐ (OpenAI), ആന്ത്രോപിക് (Anthropic) എന്നിവയുടെ പ്രവർത്തനങ്ങളെയും സാരമായി ബാധിച്ചു. ഈ എഐ കമ്പനികൾ ഉപയോഗിക്കുന്ന മൈക്രോസോഫ്റ്റ് 365 കണക്ടറുകൾ തകരാറിലായതോടെ പല എഐ ടൂളുകളുടെയും പ്രവർത്തനം മണിക്കൂറുകളോളം നിലച്ചു. ഇതോടെ ആഗോളതലത്തിൽ ഐടി മേഖലയിലുള്ളവരും കോർപ്പറേറ്റ് സ്ഥാപനങ്ങളും വലിയ പ്രതിസന്ധിയിലായി. ഇമെയിലുകൾ അയക്കാനോ ഓൺലൈൻ മീറ്റിംഗുകളിൽ പങ്കെടുക്കാനോ സാധിക്കാതെ വന്നതോടെ ഉപയോക്താക്കൾ സമൂഹമാധ്യമങ്ങളിലൂടെ വ്യാപകമായി പരാതികൾ ഉന്നയിച്ചു.

വേഡ്, എക്സൽ, പവർ പോയിൻ്റ്, ഷെയർപോയിൻ്റ് , വൺഡ്രൈവ് , മൈക്രോസോഫ്റ്റ് കോപൈലറ്റ്, മൈക്രോസോഫ്റ്റ് സ്റ്റോർ എന്നിവയുടെ പ്രവർത്തനത്തെയും ബാധിച്ചുവെന്നാണ് വിവരം.വെള്ളിയാഴ്ച രാവിലെ മുതൽ ഇന്ത്യയിലെ ഓഫീസ് ഉപയോക്താക്കൾക്കും ലോഗിൻ ചെയ്യുന്നതിലും ഇമെയിൽ ഉപയോഗിക്കുന്നതിലും വലിയ തോതിൽ തടസങ്ങൾ നേരിട്ടു. വിവിധ മേഖലകളിൽ അമിതമായ ലോഡ് അനുഭവപ്പെട്ടതാണ് കണക്റ്റിവിറ്റി പ്രശ്നങ്ങൾക്ക് കാരണമായതെന്ന് മൈക്രോസോഫ്റ്റ് എക്സിൽ പങ്കുവെച്ച കുറിപ്പിലൂടെ അറിയിച്ചു.

വ്യാഴാഴ്ച രാത്രിയോടെയാണ് ഔട്ട്ലുക്ക് ഉള്‍പ്പെടെയുള്ള മൈക്രോസോഫ്റ്റ് പ്ലാറ്റ്ഫോമുകളില്‍ വ്യാപകമായ തടസം നേരിട്ടത്. ഒട്ടേറെ ഉപയോക്താക്കള്‍ക്ക് അവരുടെ ഇമെയില്‍ അക്കൗണ്ടുകള്‍ ഉപയോഗിക്കുന്നതിലും ആപ്പുകളുടെ കൂട്ടത്തിലുടനീളം മറ്റ് പിശകുകള്‍ നേരിടുന്നതിലും പ്രശ്നം നേരിട്ടു.

ഔട്ട്ലോട്ട് ട്രാക്കര്‍ ഡൗണ്‍ഡിറ്റക്ടറിലെ ഏകദേശം 1,30,000 ഉപയോക്താക്കള്‍ ഔട്ട്ലുക്ക് ആക്സസ് ചെയ്യുന്നതില്‍ പ്രശ്നങ്ങള്‍ റിപ്പോര്‍ട്ട് ചെയ്തു. പിന്നീട് പരാതികളുടെ എണ്ണത്തില്‍ കുറവുണ്ടായെങ്കിലും, പലര്‍ക്കും ഇമെയിലുകള്‍ അയയ്ക്കാനോ സ്വീകരിക്കാനോ സാധിച്ചില്ല. ചിലര്‍ക്ക് ഇന്‍ബോക്‌സ് തുറക്കാന്‍ പോലും കഴിഞ്ഞില്ല.

എല്ലാ വിന്യാസങ്ങളും താല്‍ക്കാലികമായി നിര്‍ത്തിവച്ചതായും, ബാധിച്ച ഇന്‍ഫ്രാസ്ട്രക്ചറുകളില്‍ നിന്ന് അധിക ട്രാഫിക് വഴിതിരിച്ചുവിട്ടതായും, സേവനങ്ങള്‍ പുനഃസ്ഥാപിക്കുന്നതിനായി ബാധിച്ച സെര്‍വറുകള്‍ പുനരാരംഭിക്കാന്‍ തുടങ്ങിയതായും മൈക്രോസോഫ്റ്റ് അറിയിച്ചു.