വരുമാന പരിധി ബാധകമല്ല,ഇനി സർക്കാർ ആശുപത്രി പേവാർഡ് താല്പര്യമുള്ള രോഗികൾക്കെല്ലാം
പേ വാര്‍ഡ് സൗകര്യത്തിനുനുള്ള വരുമാന പരിധി ഒഴിവാക്കി ആരോഗ്യവകുപ്പ് ഉത്തരവിറക്കി
തിരുവനന്തപുരം:പ്രതിമാസം 1600 രൂപയിൽ താഴെ വരുമാനമുള്ളവർക്കും ഇനി സർക്കാർ ആശുപത്രികളിലെ പേവാർഡ് ലഭിക്കും.സര്‍ക്കാര്‍ ആശുപത്രികളിലെ പേ വാര്‍ഡ് സൗകര്യത്തിനുനുള്ള വരുമാന പരിധി ഒഴിവാക്കി ആരോഗ്യവകുപ്പ് ഉത്തരവിറക്കിയതോടെയാണിത്.എല്ലാ രോഗികള്‍ക്കും ഇനി മുതല്‍ പേവാര്‍ഡ് അനുവദിക്കണമെന്ന് ഉത്തരവില്‍ നിർദേശിച്ചിട്ടുണ്ട്.
നേരത്തെ 1600 രൂപയ്ക്ക് മുകളില്‍ മാസവരുമാനം ഉള്ളവര്‍ക്ക് മാത്രമേ പേ വാര്‍ഡ് നല്‍കിയിരുന്നുള്ളു. പലപ്പോഴും ആശുപത്രികളിലെത്തുന്നവര്‍ മാസവരുമാനം കുറച്ച് പറയുന്നതുകൊണ്ടുതന്നെ പിന്നീട് പേ വാര്‍ഡ് കിട്ടുന്നത് ശ്രമകരമായിരുന്നു. ഈ ചട്ടം മാറ്റണമെന്ന് വിവിധ കോണുകളില്‍ നിന്ന് ആവശ്യം ഉയര്‍ന്നതിൻ്റെ അടിസ്ഥാനത്തിലാണ് സര്‍ക്കാര്‍ നടപടി.
പുതിയ ഉത്തരവ് അനുസരിച്ച് ഇനി സര്‍ക്കാര്‍ ആശുപത്രികളില്‍ പേ വാര്‍ഡ് സൗകര്യം വരുമാനപരിധിയുടെ അടിസ്ഥാനത്തില്‍ ആയിരിക്കില്ല. വരുമാനം പരിഗണിക്കാതെ എല്ലാ രോഗികള്‍ക്കും പേ വാര്‍ഡ് നല്‍കാനാണ് ആരോഗ്യ മന്ത്രി കെ.മുരളീധരൻ്റെ നിര്‍ദേശം.
