മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവെക്കുംവരെ സമരം തുടരുമെന്ന് എസ്എഫ്ഐ, സിജെപി, എഐഎസ്എഫ് നേതാക്കൾ

ന്യൂഡൽഹി:മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിൻ്റെ രാജി ആവശ്യപ്പെട്ട് ഡൽഹി ജന്തർ മന്തറിന് സമീപം നടന്ന കോക്രോച്ച് ജനതാ പാർട്ടി പ്രക്ഷോഭത്തിൽ പങ്കെടുക്കാൻ ശ്രമിക്കവെ പ്രതിപക്ഷ നിരയിലെ പ്രമുഖ നേതാക്കളെ ഡൽഹി പൊലീസ് കസ്റ്റഡിയിലെടുത്തുവെങ്കിലും രാജ്യതലസ്ഥാനമാകെ ജന്തർമന്തറായി മാറുന്ന അപൂർവ കാഴ്ചയ്ക്കാണ് സാക്ഷ്യം വഹിച്ചുകൊണ്ടിരിക്കുന്നത്. മുൻ കേരള മുഖ്യമന്ത്രി പിണറായി വിജയൻ, മുൻ പശ്ചിമ ബംഗാൾ മുഖ്യമന്ത്രി മമത ബാനർജി, മുൻ ഡൽഹി മുഖ്യമന്ത്രി അരവിന്ദ് കെജ്‌രിവാൾ,മുൻ ത്രിപുര മുഖ്യമന്ത്രി മണിക് സർക്കാർ എന്നിവരെയാണ് പൊലീസ് കസ്റ്റഡിയിലെടുത്തത്.
കേന്ദ്രസർക്കാർ ഒരുക്കിയ വിലക്കുകളെ മറികടന്ന് പതിനായിരങ്ങൾ സിജെപിയും ഇടതുപക്ഷസംഘടനകളും പ്രഖ്യാപിച്ച സമരത്തിന്റെ ഭാ​ഗമായി. മർദിച്ചും അന്യായ തടങ്കലിൽവെച്ചും സമരം അടിച്ചമർത്താൻ ശ്രമിക്കുന്നുണ്ടെങ്കിലും ഓരോ നിമിഷവും പുതിയ സമരകേന്ദ്രങ്ങൾ സൃഷ്ടിക്കപ്പെടുകയാണ്.
ജന്തർ മന്തറിലേക്കുള്ള എല്ലാ വഴികളും പൊലീസ് ബാരിക്കേഡുകൾ ഉപയോഗിച്ച് തടഞ്ഞിരുന്നു. മമത ബാനർജിയെ കസ്റ്റഡിയിലെടുത്തത് കുത്തിയിരിപ്പ് പ്രതിഷേധത്തിനിടെയാണ്. പാട്ട് പാടിയും വാ മൂടിക്കെട്ടിയും മമത പ്രതിഷേധിച്ചത്. അരവിന്ദ് കെജ്‌രിവാളിനെ അദ്ദേഹത്തിൻ്റെ വസതിക്ക് സമീപത്തുനിന്നുമാണ് കസ്റ്റഡിയിലെടുത്തത്.

പൊലീസ് കസ്റ്റഡിയിലെടുത്ത പിണറായി വിജയനെ സ്റ്റേഷനിലെത്തിക്കാതെ വാഹനത്തിൽ വട്ടം കറക്കിയത് മൂന്നരമണിക്കൂറാണ്.അതിനുശേഷമാണ് മന്ദിർമാർഗ് സ്റ്റേഷനിലെത്തിച്ചത് . പിണറായി വിജയൻ, ജോൺ ബ്രിട്ടാസ് എംപി ഉൾപ്പെടെയുള്ള ഇടതുപക്ഷ നേതാക്കളെ ഛത്രസാൽ സ്റ്റേഡിയത്തിലെ താൽക്കാലിക തടങ്കൽ കേന്ദ്രത്തിലേക്ക് മാറ്റി.
എസ്എഫ്ഐ പാർലമെൻ്റിലേക്ക് നടത്തിയ മാർച്ച് സംഘർഷഭരിതമായി. മാർച്ചിൽ ഐഷി ഘോഷ് അടക്കമുള്ള നേതാക്കൾക്ക് മർദനമേറ്റു. നേഹാ ബോറ ഉൾപ്പെടെ ഐസ നേതാക്കളെ കസ്റ്റഡിയിലെടുത്തു. മാധ്യമപ്രവർത്തകർക്ക് നേരെയും പൊലീസ് അതിക്രമം നടത്തി. പുരുഷ പൊലീസുകാർ വനിതാപ്രവർത്തകരോട് മോശമായി പെരുമാറിയെന്നും പരാതിയുണ്ട്. കേരളത്തിനുള്ള റിപ്പോർട്ടർ ചാനൽ പ്രതിനിധികളെയും പൊലീസ് കസ്റ്റഡിയിലെടുത്തു.

ജനാധിപത്യപരമായി പ്രതിഷേധിക്കാനുള്ള അവകാശത്തെ സർക്കാർ അടിച്ചമർത്തുകയാണെന്നും ഡൽഹിയെ തുറന്ന ജയിൽ പോലെയാക്കി മാറ്റിയിരിക്കുകയാണെന്നും നേതാക്കൾ ആരോപിച്ചു. ഈ വിഷയം തിങ്കളാഴ്ച സുപ്രീം കോടതിയുടെ ശ്രദ്ധയിൽപ്പെടുത്തുമെന്ന് ഇന്ത്യാസഖ്യം നേതാക്കൾ അറിയിച്ചു. വോട്ടർപട്ടിക പുതുക്കിയതിലെ ക്രമക്കേടുകൾ ആരോപിച്ചും, മുഖ്യതെരഞ്ഞെടുപ്പ് കമ്മീഷണറുടെ രാജി ആവശ്യപ്പെട്ടുമാണ് പ്രതിപക്ഷ പാർട്ടികളും വിദ്യാർഥി സംഘടനകളും പ്രതിഷേധം സംഘടിപ്പിച്ചത്.
ഗ്യാനേഷ് രാജിവെക്കുംവരെ സമരം തുടരുമെന്ന് എസ്എഫ്ഐ, സിജെപി, എഐഎസ്എഫ് നേതാക്കൾ സംയുക്ത വാർത്താസമ്മേളനത്തിൽ അറിയിച്ചു. കസ്റ്റഡിയിലെടുത്തവരെക്കുറിച്ച് യാതൊരുവിവരവും ലഭിക്കുന്നില്ല. അഭിജീത് ദീപ്കെ ഉൾപ്പെടെയുള്ള സിജെപി നേതാക്കൾ എവിടെയെന്ന് അറിയില്ല. പ്രക്ഷോഭകരെ ക്രൂരമായാണ് പൊലീസ് മർദിച്ചത്. ഇവർക്ക് വെള്ളംപോലും പൊലീസ് നൽകുന്നില്ല. ഡൽഹിയിൽ അപ്രഖ്യാപിത അടിയന്തരവാസ്ഥയാണ് നടപ്പാക്കുന്നതെന്നും നേതാക്കൾ ചൂണ്ടിക്കാട്ടി.