നവംബര്‍ 1ന് ‘മലയാളം പള്ളിക്കൂടം ‘ ഒരുക്കുന്നു :’കേരം കേരളം ‘, ഭാഷാധിഷ്ഠിത പരിപാടി നവംബര്‍ 1 ന് രാവിലെ 11 ന് സാംസ്‌കാരികമന്ത്രി പി.സി.വിഷ്ണുനാഥ് ഉദ്ഘാടനം ചെയ്യും
തെങ്ങുമായി ബന്ധപ്പെട്ട നൂറുകണക്കിന് ഉല്പന്നങ്ങളുടെ പ്രദര്‍ശനോദ്ഘാടനം ഗതാഗത മന്ത്രി സി.പി.ജോണ്‍ നിര്‍വ്വഹിക്കും
തിരുവനന്തപുരം :എഴുപതാം കേരളപ്പിറവിദിനത്തില്‍ കേരത്തെ താരമാക്കിക്കൊണ്ട് മലയാളം പള്ളിക്കൂടം ഒരുക്കുന്ന ‘കേരം കേരളം’ എന്ന ഭാഷാധിഷ്ഠിത പരിപാടി നവംബര്‍ 1 ന് രാവിലെ 11 ന് സാംസ്‌കാരികമന്ത്രി പി.സി.വിഷ്ണുനാഥ് ഉദ്ഘാടനം ചെയ്യും. തെങ്ങുമായി ബന്ധപ്പെട്ട നൂറുകണക്കിന് ഉല്പന്നങ്ങളുടെ പ്രദര്‍ശനോദ്ഘാടനം ഗതാഗത മന്ത്രി സി.പി.ജോണ്‍ നിര്‍വ്വഹിക്കും.
തെങ്ങിന്‍റെ ചരിത്രം, ജീവശാസ്ത്രം, സാംസ്‌കാരിക പ്രസക്തി തുടങ്ങിയ പശ്ചാത്തലം മുന്‍നിര്‍ത്തി നടത്തുന്ന ‘കേരം കേരള’ത്തിലൂടെ തെങ്ങുമായി ബന്ധപ്പെട്ട നൂറില്‍ പരം പദങ്ങള്‍ കുട്ടികളിലേക്കെത്തിക്കുകയാണ് പള്ളിക്കൂടത്തിന്‍റെ ലക്ഷ്യം. സര്ക്കാരിന്റെ വൃക്ഷമിത്ര അവാര്‍ഡു നേടിയ നാല്പാമര ഷാജു, തേങ്ങയുടെ തൊണ്ടുകൊണ്ട് കൂറ്റന്‍ ശില്പങ്ങള്‍ നിര്‍മ്മിച്ച് കേന്ദ്ര സര്ക്കാരിന്റെ ശില്പ് ഗുരു പുരസ്‌കാരം നേടിയ ശില്പി പ്രതാപ് അര്‍ജുന്‍, കയര്‍ തൊഴിലാളികളുടെ ക്ഷേമത്തിനായി പ്രവര്‍ത്തിക്കുന്ന ആനത്തലവട്ടം ബിജു എന്നിവരെ ചടങ്ങില്‍ ആദരിക്കും. കേര വൃക്ഷത്തിന്‍റെ മാഹാത്മ്യം വെളിവാക്കുന്ന കവിതകള്‍, പാട്ടുകള്‍, കാവ്യശില്പം തുടങ്ങി വിവിധ പരിപാടികളുമായി സാംസ്‌കാരിക സദസ്സും ഒരുക്കിയിട്ടുണ്ട്. മലയാളം പള്ളിക്കൂടം പ്രവര്‍ത്തിക്കുന്ന തൈക്കാട് ഗവ.മോഡല്‍ എച്ച്.എസ്.എല്‍.പി. സ്‌കൂളിലാണ് കേരളപ്പിറവിദിന പരിപാടി നടക്കുകയെന്ന് സെക്രട്ടറി ഡോ.ജെസി നാരായണന്‍ അറിയിച്ചു.
