വെറുതെയല്ല മൂന്ന് അംഗങ്ങളുള്ള ബി.ജെ.പി കേരളം ഭരിക്കുമെന്ന് ബി.ജെ.പി നേതാക്കൾ അവകാശപ്പെട്ടത്!

ഡോ.കെ.ടി ജലീൽ (മുൻമന്ത്രി)

1950 ജനുവരി 24-ന് ഭരണഘടനാ നിർമ്മാണ സഭയിൽ ഭരണഘടനാ ശില്പികൾ ചർച്ച ചെയ്തശേഷമാണ് രവീന്ദ്രനാഥ ടാഗോറിന്റെ ‘ജനഗണ മന’ ദേശീയഗാനമായും (National Anthem), ബങ്കിം ചന്ദ്ര ചാറ്റർജിയുടെ ‘വന്ദേമാതരം’ ദേശീയ ഗീതമായും (National Song) അംഗീകരിച്ചത്.
അക്കാലത്ത് ഒരു രാജ്യത്തിന്റെ ദേശീയഗാനത്തിന് പാശ്ചാത്യ ഓര്ക്കസ്ട്രയ്ക്കും സൈനിക ബാൻഡുകൾക്കും എളുപ്പത്തിൽ വായിക്കാൻ കഴിയുന്ന കൃത്യമായ താളവും ഈണവും അത്യാവശ്യമായിരുന്നു. ‘ജനഗണ മന’ ഇതിന് കൂടുതൽ അനുയോജ്യമാണെന്ന് കണ്ടെത്തി.
‘ജനഗണ മന’ ഇന്ത്യയിലെ വിവിധ പ്രദേശങ്ങളെയും നദികളെയും സംസ്കാരങ്ങളെയും ചേർത്തുപിടിക്കുന്ന, മതപരമായ പ്രതീകങ്ങളില്ലാത്ത ഒരു ഗാനമാണ്. അതേസമയം, ‘വന്ദേമാതര’ത്തിന് സ്വാതന്ത്ര്യസമര പോരാട്ടത്തിൽ വലിയ സ്ഥാനമുണ്ടായിരുന്നതിനാൽ, ദേശീയഗാനത്തിനൊപ്പം തുല്യ പദവിയും ആദരവും നൽകാൻ ഭരണഘടനാ നിർമ്മാണ സഭാ അധ്യക്ഷൻ ഡോ. രാജേന്ദ്ര പ്രസാദ് നിർദ്ദേശിക്കുകയും അത് അംഗീകരിക്കപ്പെടുകയും ചെയ്തു.
എന്തുകൊണ്ടാണ് ആദ്യ 2 ഖണ്ഡികകൾ (Stanzas) മാത്രം ഔദ്യോഗികമായി അംഗീകരിച്ചത്?
”വന്ദേമാതരം” എന്നത് ബങ്കിം ചന്ദ്ര ചതോപാധ്യായയുടെ ‘ആനന്ദമഠം’ എന്ന നോവലിലെ ഒരു ഭാഗമാണ്. ആകെയുള്ള ആറ് ഖണ്ഡികകളിൽ ആദ്യത്തെ രണ്ട് ഖണ്ഡികകൾ മാത്രമാണ് 1937-ൽ ഇന്ത്യൻ നാഷണൽ കോൺഗ്രസ് ഔദ്യോഗികമായി അംഗീകരിച്ചത്. ആദ്യത്തെ രണ്ട് ഖണ്ഡികകളിൽ ഭാരതമെന്ന മാതൃഭൂമിയുടെ പ്രകൃതിസൗന്ദര്യത്തെയും സസ്യസമൃദ്ധിയെയും നദികളെയുമാണ് വർണ്ണിക്കുന്നത്. ഇത് എല്ലാ വിഭാഗം ആളുകൾക്കും ഒരുപോലെ സ്വീകാര്യമാണ്.
തുടർന്നുള്ള ഖണ്ഡികകളിൽ മാതൃഭൂമിയെ ‘ദുർഗ്ഗാ ദേവി’, ‘ലക്ഷ്മി’, ‘സരസ്വതി’ തുടങ്ങിയ ഹിന്ദു ദേവതകളുമായി ഉപമിക്കുകയും പൂജിക്കുകയും ചെയ്യുന്നുണ്ട്. ഏകദൈവവിശ്വാസികളായ മുസ്ലീങ്ങൾ, ക്രിസ്ത്യാനികൾ തുടങ്ങിയ വലിയൊരു വിഭാഗം ജനങ്ങൾക്ക് അത് ഉൾക്കൊള്ളാൻ പ്രയാസമുണ്ടാക്കുമെന്ന് മുൻകൂട്ടി കണ്ട്, സ്വാതന്ത്ര്യസമരത്തിന്റെ ഐക്യം നിലനിർത്താനും കൂടി വേണ്ടിയാണ് രവീന്ദ്രനാഥ ടാഗോർ ഉൾപ്പെടെയുള്ളവരുടെ നിർദ്ദേശപ്രകാരം ആദ്യ 2 ഖണ്ഡികകൾ മാത്രം ഔദ്യോഗികമായി തിരഞ്ഞെടുക്കാൻ തീരുമാനിച്ചത്.
എന്തുകൊണ്ടാണ് വന്ദേമാതരത്തിൻ്റെ മൂന്നാം പാരഗ്രാഫ് മുതൽ പാടാൻ പ്രയാസമുണ്ടെന്ന് ഏകദൈവ വിശ്വാസികൾ പറയുന്നതെന്ന് ”വന്ദേമാത”രത്തിൻ്റെ മലയാള പരിഭാഷ വായിച്ചാൽ ആർക്കും മനസ്സിലാക്കാനാകും. മുഴുവൻ വരികളും ആലപിക്കണമെന്ന് ബി.ജെ.പിയുടെ നേതൃത്വത്തിലുള്ള കേന്ദ്ര സർക്കാർ പറഞ്ഞാൽ മനസ്സിലാക്കാം. ഏകദൈവ വിശ്വാസികളായ മുസ്ലിംലീഗിന് ഭരണ പങ്കാളിത്തമുള്ള സർക്കാർ വന്ദേമാതരം മുഴുവൻ ചൊല്ലണം എന്ന് പറഞ്ഞ് ഉത്തരവിറക്കിയതിൻ്റെ പൊരുൾ എത്ര ആലോചിച്ചിട്ടും മനസ്സിലാകുന്നില്ല?
ലീഗിന് വലിയ സ്വാധീനമുള്ള കേരളത്തിലെ വി.ഡി സതീശൻ സർക്കാർ വി.ഡി സവർക്കർ സർക്കാരായി മാറിയോ? വെറുതെയല്ല മൂന്ന് അംഗങ്ങളുള്ള ബി.ജെ.പി കേരളം ഭരിക്കുമെന്ന് ബി.ജെ.പി നേതാക്കൾ അവകാശപ്പെട്ടത്!
ലീഗ് വിദ്യാഭ്യാസ മന്ത്രി ഭരിക്കുന്ന വകുപ്പാണ് കുട്ടികൾക്കുളള ക്വിസ് മൽസരത്തിൽ സ്വാതന്ത്ര്യ സമരത്തിൽ ഏറ്റവും കൂടുതൽ ജയിലിൽ കിടന്ന സ്വാതന്ത്ര്യസമര സേനാനി “സവർക്കർ” ആണെന്ന തരത്തിൽ ഉത്തരം കിട്ടുന്ന ചോദ്യം ചോദിപ്പിച്ച് സവർക്കറെ വെള്ളപൂശാൻ ശ്രമിച്ചത്?
ബങ്കിം ചന്ദ്ര ചാറ്റർജിയുടെ ‘ആനന്ദമഠം’ എന്ന നോവലിൽ ഉൾപ്പെടുത്തിയിട്ടുള്ള ‘വന്ദേമാതരം’ എന്ന ദേശീയഗാനത്തിന്റെ പൂർണ്ണമായ മലയാള പരിഭാഷ താഴെ നൽകുന്നു:
വന്ദേമാതരം (മലയാള പരിഭാഷ)
1-ാം പാര
മാതാവേ, നിന്നെ വണങ്ങുന്നു!
സമൃദ്ധമായ ജലത്താൽ നിറഞ്ഞവളേ,
സമൃദ്ധമായ ഫലങ്ങളാൽ സമ്പന്നയായവളേ,
മലയപർവതത്തിൽ നിന്നെത്തുന്ന കാറ്റുപോലെ ശീതളയായവളേ,
പച്ചപ്പാർന്ന വിളകളാൽ ശോഭിക്കുന്നവളേ,
മാതാവേ, നിന്നെ വണങ്ങുന്നു!
വെൺനിലാവിന്റെ പ്രകാശത്തിൽ പുളകിതമായ രാത്രികളുള്ളവളേ,
വിടർന്ന പൂക്കളും വൃക്ഷലതാദളങ്ങളും കൊണ്ട് അലങ്കരിക്കപ്പെട്ടവളേ,
മധുരമായി പുഞ്ചിരിക്കുന്നവളേ,
മധുരമായി സംസാരിക്കുന്നവളേ,
സുഖവും സന്തോഷവും നൽകുന്നവളേ,
അനുഗ്രഹങ്ങൾ ചൊരിയുന്നവളേ,
മാതാവേ, നിന്നെ വണങ്ങുന്നു!
2
കോടിക്കണക്കിന് കണ്ഠങ്ങളിൽ മുഴങ്ങുന്ന നിന്റെ മഹത്വമേ,
കോടിക്കണക്കിന് കരങ്ങളിൽ ഉയരുന്ന നിന്റെ ശക്തിയേ!
അമ്മേ, നീ എങ്ങനെ ശക്തിയില്ലാത്തവളാകും?
നീ തന്നെയാണ് ശക്തിയുടെ ഉറവിടം.
നിന്റെ മക്കളുടെ ഹൃദയങ്ങളിൽ
നിന്റെ മഹത്വവും ശക്തിയും നിറഞ്ഞിരിക്കുന്നു.
മാതാവേ, നിന്നെ വണങ്ങുന്നു!
3
നീ തന്നെയാണ് വിദ്യ,
നീ തന്നെയാണ് ധർമ്മം,
നീ തന്നെയാണ് ഹൃദയത്തിലും പ്രാണനിലും നിറഞ്ഞിരിക്കുന്ന സത്യം.
നീ തന്നെയാണ് നമ്മുടെ ശരീരത്തിലെ പ്രാണശക്തി,
നീ തന്നെയാണ് നമ്മുടെ ഭുജങ്ങളിലെ ബലം,
നീ തന്നെയാണ് നമ്മുടെ ഹൃദയത്തിലെ ഭക്തിയും വിശ്വാസവും.
നിന്റെ പ്രതിമയെ ക്ഷേത്രങ്ങളിൽ മാത്രം അല്ല,
നമ്മുടെ ഹൃദയങ്ങളിലും ഞങ്ങൾ ആരാധിക്കുന്നു.
മാതാവേ, നിന്നെ വണങ്ങുന്നു!
4
നീ തന്നെയാണ് ദുർഗ്ഗ —
പത്ത് ആയുധങ്ങളുമായി ദുഷ്ടശക്തികളെ നശിപ്പിക്കുന്ന ശക്തിസ്വരൂപിണി.
നീ തന്നെയാണ് കമല —
സൗന്ദര്യത്തിന്റെയും സമൃദ്ധിയുടെയും ലക്ഷ്മീസ്വരൂപം.
നീ തന്നെയാണ് വാണി —
വിദ്യയുടെയും ജ്ഞാനത്തിന്റെയും സരസ്വതീസ്വരൂപം.
നിന്നെ ഞാൻ വണങ്ങുന്നു,
നിന്നെ ഞാൻ വണങ്ങുന്നു,
നിന്നെ ഞാൻ വണങ്ങുന്നു!
മാതാവേ, നിന്നെ വണങ്ങുന്നു!
5
നീ തന്നെയാണ് ഭൂമി,
നീ തന്നെയാണ് ജലം,
നീ തന്നെയാണ് വായു,
നീ തന്നെയാണ് ആകാശം.
നിന്റെ പർവതനിരകളിൽ
ഞങ്ങളുടെ അഭിമാനം നിറഞ്ഞുനിൽക്കുന്നു. നിന്റെ നദികളിൽ
ഞങ്ങളുടെ ജീവൻ ഒഴുകുന്നു.
നിന്റെ പച്ചപ്പാർന്ന വയലുകളിൽ
ഞങ്ങളുടെ സമൃദ്ധി വിരിയുന്നു.
നിന്റെ മക്കളുടെ ശക്തിയിലും,
അവരുടെ ഭക്തിയിലും,
അവരുടെ ത്യാഗത്തിലും
നിന്റെ മഹത്വം നിലകൊള്ളുന്നു.
നീ ഞങ്ങളുടെ മാതാവാണ്;
നീ ഞങ്ങളുടെ ശക്തിയാണ്;
നീ ഞങ്ങളുടെ സമ്പത്താണ്;
നീ ഞങ്ങളുടെ വിദ്യയാണ്.
നിന്നെ വണങ്ങുന്നത്
ഞങ്ങളുടെ അഭിമാനമാണ്.
മാതാവേ, നിന്നെ വണങ്ങുന്നു!
വന്ദേ മാതരം!
വന്ദേ മാതരം!
വന്ദേ മാതരം!
കമ്മ്യൂണിസ്റ്റ് പാർട്ടിയെ തകർത്തെറിത്ത ബംഗാളിൽ മദ്രസ്സകൾ ‘വന്ദേമാതരം’ ചൊല്ലിയേ തുടങ്ങാവൂ എന്ന് അവിടുത്തെ ബി.ജെ.പി സർക്കാർ ഉത്തരവിറക്കിയത് നാം കണ്ടു. ഇങ്ങ് കേരളത്തിൽ വന്ദേമാതരം മുഴുവൻ പാടാൻ ഉത്തരവിറക്കിയ ലീഗ് പങ്കാളിത്ത വീഡീ സർക്കാർ, മസ്ജിദുകളിൽ 5 നേരവും ബാങ്കിന് മുമ്പ് വന്ദേമാതരം ആലപിക്കണമെന്ന് നിർദ്ദേശിച്ച് ഉത്തരവിറക്കിയാലും”അൽഭുത”പ്പെടാനില്ല? ആരും ഞെട്ടുകയും വേണ്ട! ആർ.എസ്.എസ്സിനെ പ്രതിരോധിക്കാൻ ലീഗിനെയും കോൺഗ്രസ്സിനെയും അധികാരത്തിലേറ്റിയ “നിഷ്കളങ്കരേ” കോൾമയിർകൊള്ളിൻ! ആഹ്ലാദിപ്പിൻ!