‘ഗവേഷണം ഉൾപ്പെടെയുള്ള ആധുനിക സൗകര്യങ്ങളോടുകൂടിയുള്ള ഈ പരമോന്നത സ്ഥാപനം കേരളത്തിൽ യാഥാർത്ഥ്യമായാൽ അത് പൊതുജനാരോഗ്യ രംഗത്ത് വലിയ മാറ്റങ്ങൾ സൃഷ്ടിക്കും’

തിരുവനന്തപുരം: ആൾ ഇന്ത്യാ ഇൻസ്റ്റിറ്റ്യൂട്ട് ഓഫ് ആയുർവേദ കേരളത്തിൽ സ്ഥാപിക്കണമെന്ന് ആയുർവേദ മെഡിക്കൽ അസോസിയേഷൻ ഓഫ് ഇന്ത്യ (എ. എം. എ. ഐ )സംസ്ഥാന കമ്മറ്റി ആവശ്യപ്പെട്ടു.
രാജ്യത്ത് ദേശീയ പ്രാധാന്യമുള്ള മൂന്ന് പുതിയ അഖിലേന്ത്യാ ആയുർവേദ ഇൻസ്റ്റിറ്റ്യൂട്ടുകൾ സ്ഥാപിക്കുന്നതിന്‍റെ ഭാഗമായി കേരളത്തിനും ഔദ്യോഗികമായി ക്ഷണം ലഭിച്ച സാഹചര്യം ഏറെ സന്തോഷകരമാണെന്നും സംസ്ഥാനത്തിന്‍റെ തനതായ ആയുർവേദ പാരമ്പര്യവും ആരോഗ്യമേഖലയിലെ മുന്നേറ്റങ്ങളും മുൻനിർത്തി ഇതു നേടിയെടുക്കാൻ അടിയന്തര നടപടികൾ സ്വീകരിക്കണമെന്നും ഭാരവാഹികൾ പറഞ്ഞു.

നിലവിലെ മാതൃകയിൽ പ്രൊപ്പോസൽ സമർപ്പിക്കുമ്പോൾ ഭൂമി, അടിസ്ഥാന സൗകര്യങ്ങൾ, സർക്കാരിൻ്റെ പ്രതിബദ്ധത, നടപ്പാക്കാനുള്ള ശേഷി തുടങ്ങിയ മാനദണ്ഡങ്ങളിൽ ഏറ്റവും മികച്ച മാർക്ക് നേടുന്ന സംസ്ഥാനങ്ങൾക്കായിരിക്കും ഇൻസ്റ്റിറ്റ്യൂട്ട് ലഭിക്കുക. ഇതിനായി ഓരോ സംസ്ഥാനവും ഒരു നോഡൽ ഓഫീസറെ നിയോഗിച്ച് വിവരങ്ങൾ നൽകാനാണ് മന്ത്രാലയം ആവശ്യപ്പെട്ടിട്ടുള്ളത്. ദില്ലിയിലെ ആൾ ഇന്ത്യാ ഇൻസ്റ്റിറ്റ്യൂട്ട് ഓഫ് ആയുർവേദ യുടെ മാതൃകയിലാണ് പുതിയ കാമ്പസുകൾ സ്ഥാപിക്കുന്നത്.

ആയുർവേദത്തിന് ആഴത്തിലുള്ള ചരിത്രവും പാരമ്പര്യവും ഉള്ള കേരളത്തിന് ഇതൊരു വലിയ സുവർണ്ണാവസരമാണ്. ഗവേഷണം ഉൾപ്പെടെയുള്ള ആധുനിക സൗകര്യങ്ങളോടുകൂടിയുള്ള ഈ പരമോന്നത സ്ഥാപനം കേരളത്തിൽ യാഥാർത്ഥ്യമായാൽ അത് പൊതുജനാരോഗ്യ രംഗത്ത് വലിയ മാറ്റങ്ങൾ സൃഷ്ടിക്കുമെന്നും വലിയൊരു നിക്ഷേപ സാധ്യതയും ഇതിലൂടെ സംസ്ഥാനത്തേക്ക് എത്തിച്ചേരുമെന്നും എ എം എ ഐ സംസ്ഥാന പ്രസിഡൻ്റ് ഡോ: കെ. എസ്.വിഷ്ണു നമ്പൂതിരി , സംസ്ഥാന ജനറൽ സെക്രട്ടറി ഡോ: പി.കെ.ഹരിദാസ് എന്നിവർ പറഞ്ഞു.